120,000 iku peranak Sarawak minta pengawa puang ba SPA

KUCHING: Dalam timpuh lima bulan keterubah taun 2014, bisi 120,000 iku ari Sarawak ke minta pengawa ba Suruhanjaya Perkhidmatan Awam Malaysia (SPA).

Chairman SPA Malaysia Tan Sri Mahmood Adam madahka penyampau nya nambah berindik ari atur pengawa baka program outreach tauka Karnival Kerjaya ti udah dipejalaika dua taun ke udah.

“Taun tu dalam timpuh lima bulan keterubah (Januari-Mei) bisi 120,000 iku udah minta pengawa ba SPA, tu asil ari program Outreach, karnival sereta kerejasama enggau Gerempuang Ukai Dikuasa Perintah (NGO) ari bansa China, Melayu enggau Dayak.

“Dalam taun 2013 bisi 196,000 peminta pengawa ari Sarawak dirikot ba SPA.

“Aku arap endar kami deka terus bekerejasama enggau NGO ngambika ulih meri mayuh agi peluang ngagai peminta pengawa puang ari menua pesisir di nengeri Sarawak.

“Kami diatu ngemeran sereta ngemeratka polisi pengawa puang di nengeri tu ungkup peranak Sarawak aja. Lalu enti sema udah chukup peminta ari Sarawak baru kami muka peluang ngagai peranak nengeri bukai,” ku iya.

Mahmood mansutka pekara nya lebuh dikerandau pengarang berita pengudah bejadika Karnival Kerjaya sereta Sesi Interasi Chairman (iya) SPA Malaysia enggau ketuai opis perintah, Opis ba Perintah Besai/Nengeri ti diatur ba Kompleks Dagang Temuai Sarawak ditu, kemari.

Nambahka nya iya madahka penyampau peranak Malaysia ti minta pengawa ba SPA dalam taun 2013 bisi 2.1 juta iku.

Dalam kandang lima bulan keterubah taun tu di serata Malaysia, bisi 1.1 juta iku ke minta pengawa puang nengah SPA, ku iya.

Kelimpah ari nya, iya madahka di Sarawak diatu bisi 75 iti pengawa puang nyadi Pemantu Bejalaika Pengawa ba Pekara Wang, ke alai sida ke bisi minta pengawa nya ti ditemu bepengelandik deka dikanggauka ngagai interviu.

“Diatu bisi 75 iti pengawa puang nyadi Pemantu Bejalaika Pengawa ba Pekara Wang di Sarawak. Kami udah minta NGO (Melayu, Dayak enggau China) ngangauka 1,165 iku peranak menua Sarawak datai ngagai interviu ke berengkah dipejalaika ari 7 nyentuk ke 17 Julai tu ila.

“Pengawa puang nya (75) semina diungkup tauka dibuka ngagai peranak menua Sarawak aja. Enti sema pengawa ke puang nya bisi ba sesebengkah kandang menua, dia kami deka meri peluang ngagai peranak ari kandang menua nya empu.

“Kami ari SPA ke bejalaika interviu nya bisi tiga iku ke mega peranak Sarawak,” ku iya.

Berebak enggau nya, lebuh ke ditanya enti sema orang ke dikanggauka ngagai interiviu nya enda datai, bisi enda sida diberi peluang baru, iya madah peluang nya seruran bisi laban pengulih nya bepelasarka komputer.

“Kami endang meri peluang, reti iya nadai nama dichelumka berindik ari ti enda datai lebuh ke dikanggau ngagai interviu, enti suba engka bisi tang diatu nadai agi baka nya.

“Kebuah pia laban diatu komputer ti nentuka iya bepelasarka penuai, merit, enggau pengelandik. Enti suba kami interviu bepelasarka kuota tang diatu milih ti pemadu manah ari ke manah,” ku iya. -BP