Seo Services
Results for Berita Iban

Sarawak ngarap diungkupka RM2.5 bilion ba bajet taun baru

October 07, 2018

KUCHING: Sarawak ngarapka ambis nadai RM2.5 bilion diungkupka dikena ngaga baru sekula ti udah kelalu jai tauka repuk ba nengeri tu dalam Bajet taun baru ari perintah besai.

Menteri Pelajar, Sains enggau Pemansik Teknologi Dato Sri Michael Manyin Jawong madahka, RM2.5 bilion nya ukai semina ngaga setengah ari sekula ke udah kelalu jai tauka repuk di Sarawak.

“Di Sarawak ari 1,020 sekula jai tauka repuk, 415 iya nya ti kelalu jai tayiak repuk ke enda ulih dikemanah kelimpah ari digaga baru.

“Dikena bejalaika semua tu kitai melabaka minimum RM5 bilion, tang dini kitai deka bulih ungkup belanja sepenyampau nya, nya alai kitai ngarapka sida (perintah besai) ulih ngungkupka setengah iya nya RM2.5 bilion dikena setaun ke deka datai,” ku iya.

Iya mansutka pekara nya lebuh dikerandau raban pengarang berita pengudah bejadika Majlis Penyampaian Hadiah Junior Innovate & Sarawak Next Sparks 2018 diatur Saradise ti digulu Ketuai Pegawai Eksekutif Kumpulan Saradise, Datuk Chris Chung ba Saradise innovation Space ditu, kemari.

Bejaku baru Manyin madahka piak iya udah nganggarka belanja nya enggau kerejasama Jabatan Kerja Raya (JKR) Sarawak.

Iya madahka, kelimpah ari 415 sekula kelalu jai tauka repuk nya, sekula jai tauka repuk ke bukai agi ulih dikemanahka.

“Sekula ke udah kelalu jai tauka repuk kitai endang patut ngaga baru sereta ke penerang dikena ngaga sebuah sekula primary, bangunan aja beguna ungkus dalam urung RM20 juta.

“Nya enda nyengkaum kereja asas pembinaan ke bukai ti bepanggai ngagai palan sekula nya,” ku iya.

Ngenang pasal penerang Menteri Pelajar, Dr Maszlee Malik ti madahka kenyau perintah Pakatan Harapan (PH) megai, lebih 10 peratus sekula jai tauka repuk ulih dikemanah, Manyin madahka iya enda nemu sekalika nya nyengkaum di Sarawak.

“Enda dipadahka iya nya 10 peratus nya di Sarawak sereta aku enda nemu dini sekula ke dipadahka.

“engka 10 peratus nya sekula di Semenanjung tang ba sarawak aku nemu amat pekara nya,” ku iya.

Manyin madahka, nyentuk diatu perintah besai dibaru PH bedau bejalaika enda ngira bagi projek ngemanah tauka ngaga baru sekula jai tauka repuk ba nengeri tu.

“Ba Sarawak, kenyau Mei iya nya lebuh PH megai perintah, sida nadai udah ngereja utai bekaul enggau sekula jai tauka repuk.

“Nama ti udah dipejalaika maya dibaruh perintah BN, iya nya 116 kontrak projek ngagai 116 buah sekula ti dipansutka ba bulan Februari taun tu iya nya program ngena Sistem Bangunan Berisndutri (IBS).

“Nya ba bulan Februari 2018 maya agi dibaruh perintah BN sereta iya enda ulih didawa dipealaika ulih Pakatan,” ku Manyin.

Ensanus BERNAMA diambi bejaku madahka, Maszlee nerangka, “Naka 2018, kitai udah ulih mutarka 394 sekula, nya udah ngelui tagit 10 peratus sekula jai tauka repuk kenyau kitai megai nyadi pemerintah. Taun baru, kitai ngarapka tejapaika 50 peratus, ngelui ari ke taun tu.

“Aku deka nitihka pemansang tu enggau semak, aku deka nentuka nembiak ulih belajar dalam lantang sereta semua pengajar deka ulih ngajar enggau lantang. (Naka ke diatu), tebal pengawa ngemanah sekula jai tauka repuk di kandang menua ulu Sabah enggau Sarawak,” ku Dr Maszlee. - UTUSAN BORNEO
Sarawak ngarap diungkupka RM2.5 bilion ba bajet taun baru Sarawak ngarap diungkupka RM2.5 bilion ba bajet taun baru Reviewed by Admin on October 07, 2018 Rating: 5

Jematan Long Lama nyungkak tikas ekonomi di Baram

August 25, 2018

LONG LAMA: Projek ngaga Jematan Long Lama ti beungkus RM70 juta nyangka deka tembu pun taun 2019 lalu deka ngerichahka pemansang ekonomi di sitak Baram.

Kaban Kunsil Nengeri (ADUN) Telang Usan Dennis Ngau madah, sepenembu kematan nya ila deka ngemudahka pejalai peranak Baram ke sebedau tu semina ngarapka servis feri meraka Sungai Baram.

“Nengah pemisi jematan nya, mensia mayuh ulih ngelawa Pasar Long Lama, Apoh enggau Tutoh sebarang maya enda nitihka jam servis feri.

“Nengah peneleba sebedau tu nganti feri ti ngambi pengelama bejam sebedau tu, ti ngasuh mayuh peranak di kandang menua nya lembau deka mulai kediri ngagai menua,” ku iya madah lebuh ti ngabas taba projek Jematan Long Lama nya kemari.

Dennis nambah, kelimpah ari nya jemata tu mega meri pengelantang ngagai peranak dia lebuh maya napi penusah ngenyit ke begunaka servis berubat di Sepital Miri sebarang maya dalam timpuh 24 jam.

Ku iya, sebedau tu, peranak ari Baram endang lembau deka beranjungka orang sakit entara pukul 10 malam nyentuk 7 pagi laban servis feri deka bebayar enggau mar.

“Projek tu udah dikemendar perintah besai ke sebedau tu, tang perintah nengeri mega komited nentuka projek tu tembu nitihka langgur projek, lalu baka nya mega enggau projek ngemanah jalai batang. Aku ngarapka perintah besai ari baruh Pakatan Harapan (PH) deka meri pengelebih ngagai projek menua pesisir baka di Baram,” ku iya.

Beserimbai enggau nya, kereja ngaga Jematan Long Lama tu udah berengkah ari bulan Februari 2016 sebedau Pengawa Bepilih Nengeri (PRN) lalu disadang tembu pun taun 2019.

Nitih ku kunteriktor, naka Julai taun tu, projek tu udah tembu dalam 77 peratus. - Utusan Borneo


Jematan Long Lama nyungkak tikas ekonomi di Baram Jematan Long Lama nyungkak tikas ekonomi di Baram Reviewed by Admin on August 25, 2018 Rating: 5

KM andal BN Sarawak ulih ngenan 25 penuduk parlimen

March 27, 2018


KUCHING: Kepala Menteri Datuk Patinggi Abang Johari Tun Openg andal Barisan Nasional (BN) Nengeri ulih ngenanka 25 penuduk parlimen lalu ngerampas sekeda penuduk ari penyakal ba Pengawa Bepilih Besai Ke-14 (PRU14) ti deka datai.

Bejaku ba pengawa ngelanchar ‘Jentera’ Pengawa Bepilih Bagi Nembiak BN kemari, iya madah pengarap nya bepelasarka sukung ari gempung parti dalam BN Nengeri.

“Ba pengawa bepilih besai ti deka datai, kitai deka ngenanka 25 penuduk parlimen.

“Tang ari gaya mua kita semua ditu sehari tu, kitai deka nambah ari 25 nyadi 28 penuduk parlimen,”ku iya ke nyadi Chairman BN Nengeri.

Jaku Abang Johari di Padang Salpas di Jalai Muhibbah ditu nya nerima panjung ‘armada serang’ ari lebih 1,500 iku kaban nembiak ti ngarika empat parti dalam gempung BN Nengeri.

Nengah sukung ke tegap nya, Abang Johari pechaya Sarawak deka ngembuan kuasa minta kelebih agi ba sentang hak Sarawak nengah Sempekat Malaysia 1963 (MA63).

“Kitai dekaka hak nengeri diberi pulai, enda lebih enda kurang.

“Kitai nemu baka ni chara bejaku enggau Datuk Seri Najib. kitai deka ngemansang Sarawak sereta pia mega Malaysia,”ku iya.

Ba pengawa nya kemari, Abang Johari ngelalau bagi nembiak BN nganti bunyi gong ari Datuk Seri Najib Tun Razak ke nyadi Chairman BN Menua.

Maya gong bebunyi kitai deka nyingkang ke mua lalu baka pengawa bepilih nengeri ke udah, kitai deka ngerampas penuduk ari penyakal, tandu Abang Johari.

Ngenang kaul ke sama, iya netapka Sarawak bisi mayuh pengeraja asal lalu deka nyapai pemujur jemah ila ketegal ti bisi raban nembiak ti bepenau ba teknologi.

“Kitai dekaka seiti perintah ti meruan. Bansa Melayu, Cina, Iban, Orang Ulu, Bidayuh enggau ke bukai begempung dalam seiti ruang bilik lalu tu mih ke dikearap kitai,’ku iya.

Ba pengawa nya mega Abang Johari madah udah ngasuh Direktor Operasyen PRU14 Nengeri iya nya Datuk Amar Douglas Uggah(bela ngulu pengawa) ngepunka operasyen.

Nengah sukung ari presiden parti dalam gempung BN nengeri chalun kitai deka menang besai lalu tu mih perintah aku,’ku Abang Johari.

Bela datai ketuai bagi nembiak ari 4 parti dalam gempung BN iya nya Gerald Rentap Jabu(BN-PBB), Datuk Snowdan Lawan (PRS), Robert Ayu (PDP) enggau Micheal Tiang (SUPP).-Utusan Borneo
KM andal BN Sarawak ulih ngenan 25 penuduk parlimen KM andal BN Sarawak ulih ngenan 25 penuduk parlimen Reviewed by Unknown on March 27, 2018 Rating: 5

PRU14: PRS agi milih Ugak ngetanka sitak Hulu Rajang

March 20, 2018


KAPIT: Sapit Kepala Menteri Tan Sri Datuk Amar Dr James Jemut Masing ke mega Presiden Parti Rayat Sarawak (PRS) nyemetak madahka penyandang sitak Parlimen Hulu Rajang Datuk Wilson Ugak Kumbong agi dipilih ngetanka penuduk diri ba Pengawa Bepilih Besai Ke-14 (PRU14).

“Penyandang P.216 Hulu Rajang ke nyadi chalun PRS, Datuk Wilson Ugak Kumbong deka ngetanka penuduk iya. Aku minta semua kita meri sukung nadai bebagi ngagai Ugak.

“Baka ba sitak P.215 Kapit, iya dipegai PBB. Barang sapa dipilih PBB ngetanka penuduk nya, kami PRS endang meri sukung.

“Lebuh kami nyukung PBB di Kapit, baka nya mega kami ngarapka sida mega deka nyukung chalun kami di P.216 Hulu Rajang iya nya Ugak enggau Kanowit, Datuk Aron Dagang,” ku lalau Masing.

Berebak enggau nya, Masing ke mega Kaban Kunsil Nengeri (ADUN) Balleh bisi nyuaka agih belanja Projek Mit Pemansang Menua Pesisir (MRP) ngagai 16 bengkah gerempung sepenyampau RM443, 000 di sitak Bepilih Kunsil Nengeri N64 Baleh enggau RM348,000 ngagai 22 bengkah gerempung bukai (luar sitak Baleh) apin lama ke udah.

Pengawa tu udah diatur di bilik konferen Komplek Bletih Nengeri ditu. “Tu MRP renggat keterubah aku ungkup taun tu. Bisi tiga renggat nyuaka MRP. Renggat keterubah sehari tu, dientudi renggat kedua dalam tengan taun lalu kepenudi iya ba ujung taun.

“Kesemua Komiti Pemansang enggau Pengelikun Genturung Pendiau (JKKK) di baruh N64 Baleh nerima bantu belanja nya. Enti nyema kita bedau nerima diatu, nganti ila.

Belanja MRP tu ungkup sekeda tuju. Lebuh kita minta agih belanja tu, bala kita udah madahka aktiviti nya.

Pengudah kita nerima chek, terus pasuk dalam akaun bank lalu udah nya padah ngagai JKKK.

Dulu suba, aku kala nerima kangau nanyaka duit tang lebuh aku meresa, duit nya udah dipasuk dalam akaun,” ku Masing ngelalau.

Ku iya, belanja MRP ungkup sekeda tuju, ambika chunto dikena masang musik kaki lima rumah panjai tauka nyambung paip PVC ungkup bekal ai graviti.

“Pengawa bepilih besai sekalika deka diatur dalam bulan April tauka Mei. Di Sarawak sekali tu dikena milih kaban Parlimen.

Kitai di Sarawak udah ngatur Pengawa Bepilih Nengeri (PRN) kena 7 Mei 2016.

Ngelansa pasal media rama ku iya, iya beratika bisi media rama enggau mayuh berita pelesu, gambar ditandu belama.

Bedau lama ke udah, bisi ayan di media rama, siku orang mantaika SK Temenggong Koh, Ulu Baleh ampuh bah.

“Tang lebuh aku meresa baru, nya ukai bah. Gambar nya diambi dua taun ke udah. Penanggul ditu, mayuh berita pelesu di media rama.

Tu endang salah. Nadai orang ulih nagang mantaika mayuh berita enggau gambar pelesu dalam media rama.

Orang ulih nyidi nuan. Hak kita milih sapa bagi dikedeka lalu anang ngena media rama mejah orang bukai.

Tu salah,” ku Masing nambah.

“Aku bisi macha di Kapit ditu regas ba media rama. Kes ke bukai, gambar orang bulih Ikan Empurau besai.

Tang lebuh aku meda, sida tu enda dikelala, ukai ari Kapit.

Semak enggau pengawa bepilih tu, anang enda bejejaga.

Belajar bisi ati nangi dataika kita ngenukuka pengamat berita ari raban bekaul. Peresa enggau sida polis tauka media chelak,” ku iya ngelalau.

Pemesai Pelilih Kapit Elvis Didit, Pemesai Pelilih Bukit Mabong Douglas Pungga, Sekretari Politik Kepala Menteri Sarawak Nicholas Kudi Jantai, OCPD Kapit DSP Freddy Bian, Principal SMk baleh Lau Yok Huck, Dr Francis Lee ari Sepital Kapit Temenggong Tan Kian Hoo enggau bala bukai.-Utusan Borneo
PRU14: PRS agi milih Ugak ngetanka sitak Hulu Rajang PRU14: PRS agi milih Ugak ngetanka sitak Hulu Rajang Reviewed by Unknown on March 20, 2018 Rating: 5

UPP, SUPP deka nyain MoU

March 19, 2018

KUCHING: Parti Rakyat Bersatu (UPP) enggau Parti Sa’ati Rayat Sarawak(SUPP) deka nyain Sempekat Pemereti Ati (MoU), pia ku Ketuai Nembiak UPP, Johnical Rayong Nyipa.

Ku iya, MoU nya, ti patut disain 18 March tang udah dilanjar.

“Amat, bisi MoU patut disain,tang dilanjar ngagai haribulan bukai lalu aku enda ulih madah ngagai kita (pengarangberita) kemaya hari bulan nya,tang iya (MoU) endang dekadisain,” ku Dr Rayong.

Iya dirandau pengudah ngulu aum pengarang beritaKomiti Raban Nembiak Besai UPP di indu opis parti, JalaiPending, ditu, ensana.

Rayong, ke mega KabanKunsil Nengeri (ADUN)Engkilili madah iya enda ulih madah silik pasal MoU nya,seraya nimbal, semina Kepala Menteri Datuk Patinggi Abang Johari aja nemu.

”Taja pia, pengudah kita(pengarang berita) dulu nemu,aku ngelansa mimit aja,” kuiya madah nyemetak.

Ku iya, dua presiden parti,Datuk Dr Sim Kui Hian(Presiden SUPP) enggau DatoSri Wong Soon Koh (PresidenUPP) deka nyain iya (MoU)seraya dikemata Abang Joharienggau bala ketuai BarisanNasional (BN) bukai.

Iya mega nulak meri sebarang penerang nama kebuah MoU nya dilanjar, tang nyemetak madahka MoU nyaendang pekara ti manah sereta manah ke BN.

Rambau aum pengarang berita nya, ku Rayong, presiden parti udah mantai kachalun ungkup sitak Sibu enggau Lanang, tang bepanggai ngagai bala ketuai tetinggi BN ngaga pemutus.

Iya mega madahka randau antara UPP enggau SUPP benung digaga, seraya nambah,dalam politik, semua pekaratau nyadi.

“Baka ti diperatika MenteriBesai Datuk Seri Najib enggau Kepala Menteru DatukPatinggi Abang Johari Tun Openg, kami (UPP) endang nyukung pengawa ti manahungkup penegap politik,kelebih agi BN di nengeritu.

“Kami deka nyukung sebarang pemutus digaga pulaika penegap politik BN dinengeri tu,” ku iya nandu.

Iya mega nyemetak madahka UPP deka meri sukungrat ngagai chalun SUPP mayaPengawa Bepilih Besai Ke-14(PRU14) ti deka datai.

“Endang amat, UPP dekanyukung laban ila SUPP deka enda ngena lambang sida empu, sida deka ngena tambai BN baka Parti PesakaBumputera Bersatu (PBB),Parti Rakyat Sarawak (PRS),Parti Demokratik Progresif(PDP).

“Kami deka nyukung barang sapa chalun BN laban menteri besai enggau kepala menteri udah bisi jaku barang sapa ngena lambang BN, kami meseti nyukung ungkup penegap politik.

“Nya alai kami dalam UPPbarang sapa ngena lambang BN, kami endang deka nyukung sida lalu nentuka BN menang ba penuduk nya,”ku iya.-Utusan Borneo
UPP, SUPP deka nyain MoU UPP, SUPP deka nyain MoU Reviewed by Unknown on March 19, 2018 Rating: 5

Sarawak bisi kuasa nentuka tusun kereja ba pengawa petroleum

March 19, 2018


KUCHING: Kepala Menteri  Datuk Patinggi Abang Johari Tun Openg ngelar Chong Chieng Jen ‘hot air’pengudah Chairman DAP Sarawak nya mai mosyen merambu ubah ba PetroleumDevelopment Act1974 (PDA74) di parlimen.

‘Iya (Chong) nadai agi, iyake hot air (sapa ke hot air, akutauka iya).

“Aku ngasai sida (penyakal) enda ngadang aku ulih ngaga pekara tu (Ngulihka hak Sarawak ngereja minyaknengah Sempekat Malaysia1963).

“Aku nitihka undang-undang sereta konstitusyen,”ku Abang Johari lebuh dikerandau pemberita ba program‘Walkabout di Kampung Bintangor ditu, kemari.

Dulu agi ari tu, Abang Johari udah madah dia PDA74 enggau Territorial Sea Act2012 (TSA) enda diteritka diSarawak.

“Pekara tu udah dulu dipansik aku lalu bepelasarka konstitusyen, aku ngasai kitaibisi hak.

“Kitai deka ngadu kerejasama enggau kompeni bakake Petronas, Shell, Murphy enggau sekeda ke bukai,”kuiya nambah.

Ngenang kaul ke sama,iya madah Sarawak ngembuan kuasa nentuka tusun kereja ba sentang pengawanya (petroleum) bepelasarka konstitusyen.

Kena Hari Dua tu tadi iyanya rambau Aum Parlimen,Chong ke nyadi MP Bandar Kuching mai mosyen ngagaubah ba PDA74.

Chong dekaka ubah mitdigaga Genteran 2(1) PDA1974 iya nya ngemasuk jakuEXCLUDING SARAWAK nangkan leka jaku Malaysia.

Enti perambu mosyennya dikemendar di parlimen,Chong pechaya piakke bempu sereta ngembuankuasa ba petroleum pulaingaga Perintah Sarawak.

Enti ubah nya enda digagaku Chong, petroleum di Sarawak deka mengkang diempu Petronas lalu Sarawak mengkang nerima royalti lima peratus.-Utusan Borneo
Sarawak bisi kuasa nentuka tusun kereja ba pengawa petroleum Sarawak bisi kuasa nentuka tusun kereja ba pengawa petroleum Reviewed by Unknown on March 19, 2018 Rating: 5

Pengeran KM ngambi pulai hak Sarawak nyata ukai retorik

March 15, 2018


KUCHING: Komitmen enggau pengeran Kepala Menteri Datuk Patinggi Abang Johari Tun Openg ke deka ngambi pulai baru hak Sarawak kelebih agi bekaul enggau isu minyak enggau gis udah mandangka nya ukai retorik tauka jaku puang (hot air) aja.

Tang Sapit Kepala Menteri Datuk Amar Douglas Uggah Embas madahka Parti Tindakan Demokratik (DAP) Sarawak ti bejaku puang sereta ngena chara ti udah lama.

“Sebedau tu maya Gempuru Besai PBB Ke-14, ti Dipebasaka Kepala Menteri madahka pengeran enggau komitmen iya pasal hak minyak enggau gis Sarawak nyengkaum meri lisin ngelumbung minyak enggau gis ngagai PETROS.

“Udah nyata nya ukai retorik tauka semaya puang aja laban dipejalaika enggau konkrit, iya nya ngeluarka lisin nya ngagai PETROS. Tu chara ti chukup berani kepala menteri kitai ke mega Presiden PBB,” ku iya.

Iya mansutka pekara nya lebuh bejaku ba ‘Majlis Penghargaan Sekalung Budi Sejambak Kasih’ beserimbai enggau Gempuru Besai PBB Ke-14 ti digulu Abang Johari enggau bini iya, Datin Patinggi Datuk Juma’ani Tuanku Bujang ditu, malam ensanus.

Uggah ke mega Sapit Presiden PBB, madahka chara Abang Johari nya udah dipeda semua rayat Malaysia ke lalu nyangkal dawa DAP kelebih agi Chairman DAP Sarawak Chong Chieng Jen iya nya, nya jaku puang aja.

“Ke bendar iya DAP empu ti bejaku puang lalu chara sida ke deka negika royalti 20 peratus minyak enggau gis nya chara lama.

“DAP iya nya parti asal ari Semenanjung Malaysia lalu aku enda tentu nemu nama ti ditegika Chong ngagai Sarawak....laban ba aku utai ti ditegika iya nadai endar dibandingka enggau kepala menteri kitai,” ku Uggah.

Berindik ari pekara nya ku iya, rayat Sarawak patut ulih berati sereta nulak DAP ba mosyen sida di Parlimen.

Berebak enggau tu uggah madahka semua pengari gempuru besai sereta kaban PBB ke bukai madahka nyukung penuh Abang Johari dalam strategi enggau chara ngambi pulai baru hak Sarawak ari baruh Sempekat Malaysia 1963 (MA63).

Iya madah, ke pemadu beguna iya nya PBB patut beserakup nyadi parti ti tegap sereta ngetanka kaul rapit dikena ngenukuka Sarawak terus maju.

“Gempuru kitai Ke-14 kali ke udah lepas amat mujur tauka nyulut sereta nempa sejarah ti ngenataika pesan beguna ngagai Sarawak,” ku iya.-Utusan Borneo
Pengeran KM ngambi pulai hak Sarawak nyata ukai retorik Pengeran KM ngambi pulai hak Sarawak nyata ukai retorik Reviewed by Unknown on March 15, 2018 Rating: 5

Penembu Tekat Ai Baleh deka nyungkak pengerembai ekonomi

March 06, 2018


KUCHING: Projek Tekat Ai Baleh ke beungkus RM9 bilion nyema udah tembu jemah deka nyungkak pengerembai aktiviti ekonomi ngelingi Baleh, ku Sapit Kepala Menteri Tan Sri Datuk Amar Dr. James Jemut Masing.

Iya madah projek nya mega deka ngemuntang pengawa nyambung jalai alun enggau perengka guna bukai ngagai genturung pendiau ngelingi.

“Jalai benung digaga ari Kapit nuju Palan Tekat Ai Baleh iya nya urung 100 KM. Nambahka nya jalai pemanjai 30KM mega digaga nuju Sungai Tunoh.

“Projek mega mungkur pengawa ngaga Jematan Baleh enggau Jematan Mujong sereta sekeda jematan ke bukai,” ku iya lebuh dikerandau bedau lama tu tadi.

Masing ke mega Menteri Pemansang Perengka Guna enggau Pengangkut nambah projek ngaga jalai nuju Palan Tekat Ai Baleh aja udah begunaka ungkus RM2 Biliun.

Ku iya, penyampau RM11 biliun dibai ngagai Kapit ngambi ulih ngerembaika aktiviti ekonomi ungkup pemaik rayat.

“Perintah udah nyendia mayuh belanja dikena ngemansang Kapit(Palan Tekat Ai Baleh).

“Atur tu meri peluang ngagai peranak di Baleh ngangkatka penatai pemisi diri nengah jalai alun ke digaga,”ku iya.

Masing ke mega Adun Baleh enggau nyemetak madah rayat meseti beambi ulih enggau perengka guna ke disedia perintah.

Anang nyalahka perintah jemah enti kitai enda ulih ngemansangka diri ketegal perintah udah nyendia perengka guna baka ke jalai alun, tandu Masing.

Nitihka penerang Masing, kereja di Palan Tekat Ai Baleh deka berengkah ba bulan Oktober 2018.

Diatu ku iya, pengawa ngaga ‘Diversion Tunnel’ benung dipejalai lalu pengudah nya tembu, kereja bukai deka berengkah.-Utusan Borneo
Penembu Tekat Ai Baleh deka nyungkak pengerembai ekonomi Penembu Tekat Ai Baleh deka nyungkak pengerembai ekonomi Reviewed by Unknown on March 06, 2018 Rating: 5

Semua penanggul tanah patut diputar ba Kort Bumiputera

March 01, 2018


KUCHING: Sapit Kepala Menteri Tan Sri Datuk Amar Dr James Jemut Masing dekaka semua penanggul tanah Adat Bansa Asal (NCR) dipending lalu diputar di Kort Bumiputera.

Masing ke mega Presiden Parti Rakyat Sarawak (PRS) madah, iya berundingka pekara tu berindik pemutus ari atur ngakim Kort Federal ba kes empat iku ke ‘murtad’ kena 27 Febuari ke alai akim madahka semua kes nya patut semina dipending ba Kort Syariah.

“Pemutus Kort Federal ngemendarka Kort Syariah ngakim kes murtad ti bekaul enggau undang-undang Islam patut diperati pulaika pemaik.”

“Kort engkeman mutarka kes ti engkeman nyadi pengawa ti patut.”

“Baka nya mega petalat tauka penanggul tanah NCR patut diputar Kort Bumiputera laban sida nemu agi pasal adat enggau undang-undang bansa Dayak,” kiu Masing ke lalu nyadi Kaban Kunsil Nengeri (ADUN) Baleh.

“Enti sema Kort Bumiputera nadai ngembuan akim bepenau, sida patut ngambi akim ti bisi penau gawa. Kitai agi mayuh kes bansa asal ti bedau teputar,” ku iya ngansak.

“Kort Besau enda patut mutarka kes tanah NCR laban tebal agi akim besai dipadu mutarka kes tanah NCR nadai pengelandik dalam undang-undang bansa asal,” ku iya.

“Tu (penemu aku) belalauka pasal Kort Syariah nemu agi pasal undang-undang Islam. Nya kebuah, akim Kort Besai nasai tauka nemu mimit aja penemu ba adat tauka undang-undang Dayak, nya alai, nadai penetap deka ngakim pasal pekara ngaul tanah NCR Dayak,” ku Masing.

Parti Bansa Dayak Sarawak Baru (PBDSB) setuju enggau penemu Masing lebuh iya madahka Masing betul lebuh ngeluarka penerang ke alai perintah patut enda ngapil kes NCR ngagai Kort Besai.

Presiden iya, Cobbold John madahka udah umbas endur Kort Bumiputera diberi ‘supremacy’.

Ku Cobbold, iya lantang ati meda Masing beambika chunto ari atur dipejalai Kort Federal ba pekara mendingka kes ‘murtad’ beberapa hari ke udah lalu mansutka pemutus kena Hari Dua (27 Febuari) tu tadi.

Taja pia Cobbold irau enggaika Masing deka ngalih ari penerang iya empu ila.

Iya udah nya ngelalau Masing ngamatka jaku diri lalu mai keretas kereja maya Aum Kunsil Nengeri (DUN) udah tu ila.

“Enti sema iya endang keran, bai isu tu ngagai DUN. Tang, iya patut ingat, tu Perintah Nengeri Sarawak ari baruh ketuai dipegai Barisan Nasional (BN) ti udah ngapil ngagai Kort Federal ba kes penyarut NCR. Iya siku ari sida nya,” ku Cobbold nyemetak.

Cobbold madahka jaku Masing patut diayanka nengah pengawa ti tulin.

“NCR tu rega idup kitai lalu nya patut dijaga. Enda sanggu, endang seruran bisi dua gamal ba duit, taja pia, Dayak patut nyerungkai jalai dikena nyingkang ke mua, lalu nukar pengelemi sida ngagai peluang,” ku iya.

Berebak enggau nya, Cobbold mantaika pengasa diri ba ulah nitihka atur enggau enda patut pengudah ngakim empat kes ‘murtad’ kemari.

Ku iya, ulah ke baka nya endang enda patut lalu raban bekuasa patut bejalaika atur ti patut.

“Aku tekenyit lalu berasai asa enggau ulah enda patut sereta enda nitihka atur ngelaban Roman Catholic Archbishop Simon Poh. Pengarap kita entara kita enggau Tuhan aja. Kitai udah meda video lalu ulah nadai basa ke baka nya endang chukup enda betamadun. Kitai ukai diau.

“Aku mega asa lebuh siku orang ngagauka YB Baru Bian ‘Christian preacher’. Aku udah lama ngelala Baru, lebih ari 30 taun. Baru ukai orang ke baka nya. Naka ke ditemu aku, semina PAS (Parti Islam Se-Malaysia) aja parti jalai pengarap. Nama kebuah irau enti sema nuan bisi tegap pengarap,” ku iya nanya.-Utusan Borneo
Semua penanggul tanah patut diputar ba Kort Bumiputera Semua penanggul tanah patut diputar ba Kort Bumiputera Reviewed by Unknown on March 01, 2018 Rating: 5

Pemutus Milih Chalun Indu PBB Dilempai Ba Presiden BN Menua

February 21, 2018


KUCHING: Dipelabaka chalun indu ari Parti Pesaka Bumiputera Bersatu (PBB)nadai udah nganjung nama chalun ba Pengawa Bepilih Besai (PRU ke-14) tu ila, laban nyerahka pemutus nya ba Presiden Barisan Nasional (BN) ti mega Menteri Besai, Datuk Seri Mohd Najib Tun Razak.

Ketuai Orang Indu PBB,Dato Sri Fatimah Abdullah madah taja pan bisi pemerat ngembuan 30 peratus orang indu mangku pengawa besai, kelebih agi dalam meri pemutus sereta pengari rayat, tang pemutus nya nitihka peneka presiden BN/Menteri Besai (renggat PRU parlimen)sereta Kepala Menteri/Chairman BN Datuk Patinggi Abang Johari Tun Openg (ke renggat PRN).

“Beratika begunaka 30 peratus orang indu ba penuduk ngaga pemutus sereta nyadi ketuai,kami bedau bulih penyampau nya, lalu pengawa nambah peratus nya deka dipajakka,” ku Fatimah madah ba aum pengarang berita ti diatur ba opis menteri nya di Baitulmakmur ditu, kemari.

Fatimah ti mega nyadi Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit madah, chalun indu ke PRU tauka PRN sigi ulih dipinta tang pemutus ke penudi endar bepanggai ba Menteri Besai enggau Kepala Menteri.

“Kami tau minta, tang pemutus ke penudi bepanggai ba Menteri Besai enggau Kepala Menteri.Taja pia, kami orang indu ba PBB deka bebendar agi gawa nyapai 30 peratus nya nengah kapasiti meri kuasa ngagai orang indu kami,” ku iya.

Taja pia, iya madah, 30 peratus orang indu nyadi ketuai sereta ulih ngaga pemutus ukai semina ba pengawa politik aja, tang mungkur semua industri sereta pengelandik.

“Tiga puluh peratus pengari orang indu ukai ba politik aja, tang nyengkaum orang indu ke gawa ba opis perintah, bala tuai komuniti, industri nyengkaum tetiap renggat batang pengawa ke bepengelandi.Nya pekara ke holistik, nyengkaum pengawa bepilih,” ku iya seraya madahka baru rintai nama chalun pan bepanggai ba konsensus.

Naka ke diatu, penyampau penyandang orang indu ari PBB ke bediri di PRU ke udah nyengkaum Menteri di Opis Menteri Besai, Dato Sri Nancy Shukri (Batang Sadong), Kaban Parlimen Rubiah Wang (Kota Samarahan), Kaban Parlimen Norah Tun Rahman (Tanjung Manis) enggau Menteri Orang Indu, ruang Bilik enggau Komuniti, Dato Sri Rohani Abdul Karim (Batang Lupar).

Penyampau orang indu ke nyadi kaban PBB di serata menua (direjista naka Disember 2017) nyapai urung 153,962, lalu sepiak indu parti (323,043) enggau Nembiak (36,068).
Pemutus Milih Chalun Indu PBB Dilempai Ba Presiden BN Menua Pemutus Milih Chalun Indu PBB Dilempai Ba Presiden BN Menua Reviewed by Unknown on February 21, 2018 Rating: 5

4 Penyandang PRS Dichalun Baru Ba PRU14- Masing

February 21, 2018


KUCHING: Empat penyandang ari Parti Rakyat Sarawak (PRS) ti deka dichalunka baru maya Pengawa Bepilih Besai Ke-14 (PRU14) ti deka dipadahka bala ketuai tetinggi parti, pia ku presiden iya, Tan Sri Datuk Amar Dr James Jemut Masing.

Taja pia, dua iku penyandang iya nya di Lubok Antu enggau Selangau nadai dipadah, nya alai parti deka enchalunka orang baru ungkup kededua penuduk nya.

“Kitai udah nerima perambu ari ADUN nengeri ungkup empat penuduk iya nya Hulu Rajang, Julau, Kanowit enggau Sri Aman,lalu nama sida udah dianjung ngagai ketuai tetinggi BN ngambika diperunding.

“Aku ulih madah ngagai kita, pengawa udah dikemeranka parti ke alai kami semina nganjung siti nama aja ungkup enam penuduk laban pechayaka kami ba penuduk pemadu manah nemu sapa bagi chalun pemadu engkeman menang ba penuduk tu ungkup BN,” ku Masing madah ngagai The Borneo Postkemari.

Ku iya nambah, berindik ari nadai perambu ari bala pengari ADUN ari kededua penuduk di sitak Lubok Antu enggau Selangau lebuh hari bulan tembu ujung taun nyin tadi, parti nadai pilih bukai tang enchalunka dua iku orang baru.

“Lalu ketegal nadai perambu ari ADUN ngagai penyandang Lubok Antu enggau Selangau lebuh jenila ditambit, nya kebuah PRS udah enchalunka dua iku orang baru,” ku Masing.

Penyandang Lubok Antu iya nya Datuk William Nyallau Badak lalu penyandang Selanagu iya nya Sapit Presiden, Datuk Joseph Entulu Belaun.

Lebuhka ditanya sekalika parti deka pambar nyema dua iku ketuai tu ditingkil, ku Masing pekara nya enda nyadi, laban iya belalauka pemutus bala ketuai tetinggi parti.

“Parti BN bukai mega ngereja pekara ke sama dikena nentuka iya deka meruan tegap sereta beserakup,” ku iya madah nyemetak.

Berebak enggau nya, Masing nyamin parti deka nempa sejarah laban deka nyabung chalun indu Dayak ungkup keterubah iya.

“Naka ke ditemu pengari orang indu dalam PRS, parti udah enchalunka abis nadai siku indu nyadi pengari kitai ba PRU14. Pekara tu ngayanka PRS beratka perati pengari orang indu dalam parti. Dikearap nyema iya menang bepilih, iya ulih nempa sejarah laban iya deka diangkat nyadi MP indu Dayak keterubah.

“Pekara tu mega ngayanka PRS ngenang penyukung indu ti nyadi setengah ari baka kaban iya,” ku Masing, seraya nambah, parti nya mega belubah nyingkang ari nyadi parti politik belalauka sida ke lelaki.

Berita ngerimbas pending madahka ketuai pampang indu PRS enggau ex-Sapit Speaker Dewan, Datuk Seri Doris Sophia Brodie, udah diberi ‘pemendar’ bediri minta pilih di Lubok Antu. Taja pia, PRS udah kala nyebut chalun ulih menang di Selangau.

“Kededua chalun bepenau kitai ba dua sitak menua tu udah berengkah gawa ba renggat baruh lalu udah diterima manah bala rayat,” ku Masing nambah.-Utusan Borneo
4 Penyandang PRS Dichalun Baru Ba PRU14- Masing 4 Penyandang PRS Dichalun Baru Ba PRU14- Masing Reviewed by Unknown on February 21, 2018 Rating: 5

Perintah chakah ngatur pemansang ke pengelantang rayat

February 15, 2018


SRI AMAN: Sapit Menteri Dalam Menua II Datuk Masir Kujat madah seriris enggau pemansang dunya kemaya hari, perintah seruran ransing gawa mai pemansang enggau pengelantang ngagai semua komuniti di nengeri tu, kelebih agi peranak menua pesisir.

Nitih ku iya, pengawa tu ulih dipeda nengah bemacham program pemansang ti udah, benung enggau chakah dipejalai perintah nengeri ti pulaika pemaik enggau pengelantang rayat.

Iya ke mega Kaban Parlimen (MP) Sri Aman mansutka jaku nya lebuh bejaku bejadika Program Mobile Community Tranformation Centre (CTC) Boat Siri 1/2018 diatur Pejabat Persekutuan Sarawak (PPS) bepalan di Rumah Encharang, Kampung Batu Tembang, Banting semak ditu.

Taja pia ku iya, pengawa pemansang perintah deka mar dijalai enti sema rayat enda ngena memanah semua wak enggau perengka guna ti udah disediaka perintah.

“Pekara tu tentu deka ngerugi kitai semua lalu tau ngasuh pejalai projek pemansang di nengeri tu tejanggal,” ku iya.

Berindik ari nya ku iya, kitai enda ilih majakka ulah diau dir aja lalu semina ngandalka semua bantu enggau subsidi ari perintah aja. Tang kitai ulih gawa ngatika diri, bisi inisiatif lalu ngerebut semua awak ti disedia ungkup kitai dalam sektor pengawa industri, dagang, teknologi pemadah enggau arus penyambung (ICT), ladang, pelajar, dagang temuai, servis enggau ke bukai.

Ba pekara tu, kitai patut bisi penau mereti sereta nerima ubah enggau penemu baru ari ngubah chara kitai berunding enggau kereja ngambika kitai enda tinggal ari arus pemansang. Tu kelebih agi kitai patut nyikap diri enggau penemu pengelandik ti chukup berengkah ari diatu, dikena nyapai juluk menua nyadi menua mansang datai ba taun 2020 ila.

Ku Masir nambah, napi jeman globalisasyen empas ICT, pengawa nambahka ‘Komunikasyen Pemansang’ nyadi beguna endar enggau pemisi peminta nempa komuniti bepenemu enggau beinformasyen tauka K-Society.

“Nya kebuah, kuasa berunding komuniti enggau penau gawaka inovasyen patut diberi pemerat ngambika sida ulih besemekih lalu napi pemar ekonomi-rama kemaya hari. Nengah chara tu, kitai deka meri penyedar, ngubah ulah enggau runding, meransang komuniti angkunka penemu sereta nerima enggau ngujika penemu baru dikena ngangkatka tikas idup sida.-Utusan Borneo
Perintah chakah ngatur pemansang ke pengelantang rayat Perintah chakah ngatur pemansang ke pengelantang rayat Reviewed by Unknown on February 15, 2018 Rating: 5

Penuduk tetinggi dalam PBB enda diperebutka: Uggah

February 08, 2018


KUCHING: Bala ketuai tetinggi Parti Pesaka Bumiputera Bersatu (PBB) begulai enggau kaban iya udah sepenemu ke alai pangku pengawa ti pemadu tinggi dalam parti enda diperebutka, laban batang fokus diatu deka ngemansangka Sarawak nyadi nengeri bepenatai pemisi tinggi nyerumba taun 2030, pia ku sapit presiden, Datuk Amar Douglas Uggah Embas.

“Fokus kitai deka ngiga jalai enggau baka ni chara ngemansangka Sarawak kelebih agi raban Bumiputera ngambika nyapai ekonomi bepenatai pemisi tinggi datai ba taun 2030. Ba pekara tu, kitai deka fokus baka ni ngemunaska penyeranta, ngangkatka pemanah infrastruktur enggau pelajar kitai.

“Nya kebuah kaban parti ngaku adat beserakup sereta peragam pemutus ari bala ketuai. Adat tu udah ditampung kami ngelama tu. Nya kebuah kami majak ngerembai ari pengering nyadi majak kering, ke alai parti bukai ngining ,” ku Uggah madah ngagai pengarang berita pengudah nyadi chairman aum komiti mit konvensyen PBB ba Palan Konvensyen Borneo Kuching (BCCK) ditu, kemari.

Uggah, ke mega Sapit Kepala Menteri nyemetak madahka pemutus sepenemu ari kaban parti enggau bala ketuai enda berebutka pangku pengawa ke pemadu tinggi ngayanka penalam adat demokratik dalam parti dikena nentuka nya meruan kering sereta beserakup.

“Parti deka seruran bediri di belakang Kepala Menteri dalam juluk iya deka ngemansang Sarawak nengah ekonomi digital. Nya kebuah rambai jaku kitai ungkup konvensyen tu ‘Mentranformasi Sarawak Melalui Ekonomi Digital’ deka mantaika juluk kami ngerembaika pemansang Sarawak,” ku iya.

Berebak enggau nya, penyandang Sekretari Besai PBB Dato Sri Dr Stephen Rundi Utom madah, taja pan nadai pengawa berebutka penuduk ke pemadu tinggi dalam parti, agi bisi pengawa bepilih ungkup empat pangku pengawa mandal presiden ba Pampang Bumiputera.

“Tu deka nyadi pengawa bepilih ke chukup manah ngagai tujuh iku chalun. Semua sida tu bebakih dalam parti,” ku iya, seraya nambah, sida ti alah deka dichiri mangku pengawa dalam parti.

Tujuh iku chalun ti berebutka penuduk mandal presiden iya nya Datuk Karim Rahman Hamzah, Datuk Talib Zulpilip, Datuk Julaihi Narawi, Datu Len Talif Salleh, Dr Annuar Rafaee, Dr Abdul Rahman Junaidi enggau Dr Abdul Rahman Ismail.

Kebuah iya enda enggau berebutka pangku pengawa mandal presiden kanan Pampang Pesaka, ku Dr Rundi ke mega Menteri Utiliti, endang udah bisi pemereti dalam parti ngawakka Dato Sri Michael Manyin ngambi pangku pengawa nya ari Uggah, ti menang darat nyadi sapit.

“Kitai bela meretika pekara ke alai kitai meri ngagai Dato Sri Michael Manyin, ketuai lama dalam parti. Enda ibuh diperumban ngagai orang bukai. Nya alai aku ngarapka penaluk tim deka seruran bisi dalam parti,” ku Dr Rundi nambah.-Utusan Borneo
Penuduk tetinggi dalam PBB enda diperebutka: Uggah Penuduk tetinggi dalam PBB enda diperebutka: Uggah Reviewed by Unknown on February 08, 2018 Rating: 5

Agi mayuh pemansang deka diadu perintah ba sitak Julau

January 29, 2018


PAKAN: Kaban Parlimen Julau Datuk Joseph Salang madahka iya besetuju dichalun baru bediri ba penuduk nya ketegal ti ngasaika agi mayuh pengawa pemansang ke besai agi deka diadu dia nangkan tu ila.

Iya madah, taja udah mayuh dikereja sereta mujur ngelama tu tang iya agi ransing deka mai pemansang ngagai Parlimen Julau.

“Juluk ati aku deka mai pemansang ke mayuh agi udah tu lalu tu begunaka sukung ke manah ari rayat ti besaup nentuka Barisan Nasional (BN) mengkang ngarika penuduk tu,” pia ku iya madah maya datai ngulu bejadi Hari Diri Sebilik ke diatur Kaunsil Pemansang Orang Indu enggau Ruang Bilik ba Rumah Inting, Nanga Lasi ditu, kemari.

Pengawa tu bela digulu Kaban Kunsil Nengeri (ADUN) Meradong Datuk Ding Kuong Hiing enggau Sekretari Politik Kepala Menteri Maurice Giri.

Nambahka jaku iya ku Salang, bisi penemu semina madahka pemansang menua tu baka jalai alun, sekula, kelinik, bekal ai beresi tauka legit telekomunikasyen aja.

“Tang kelimpah ari pemansang fizikal ke nyengala dipeda baka nya pemansang menua ke bela beguna iya nya pemansang ba aspek rama.

“Tu nyengkaum baka pengeransing apai indai ti nyukung program ba sekula anak.

“Kediatu, nitihka dipadah Opis Pelajar Julau, kerejasama apai indai di pelilih Julau pemadu manah antara pelilih ba nengeri tu,” ku iya madah baru.

Pekara tu ku Salang nyungkakka agi tikas pemujur pelajar nembiak lalu pia mega ba pekara lumba enggau main.

“Aku lantang amat ati meda pemujur tu.

“Aku mega gaga laban aku bela bekaul enggau pemujur tu laban aku enda kala enda ngelalau bala apai indai ngambika sida bekempit enggau sekula ninting maya bisi niki rumah panjai,” pia ku iya madah.

Salang madah, ba pemansang fizikal, enti dibida enggau 18 taun ke udah, maya iya baru nyadi pengari rayat dia, diatu Julau enggau Pakan udah mayuh berubah.

Ba pekara bukai, iya madahka diri udah minta belanja ari Menteri Pemansang Infrastruktur enggau Perengka Pengangkut Tan Sri James Jemut Masing dikena ngaga jematan ngelayang sungai Julau di Balut.

“Jematan tu beguna amat lalu enti digaga deka bekenaka awak ke besai.

“Kitai enda ulih ngaduka projek tu tekala nya tang ukai reti kitai enda ngaga enti kita empai meda projek tu empai belabuh,” pia ku iya nerang.

Ding ba jaku iya minta rayat dia nandu sukung ngagai Salang ti ba penemu iya Salang siku pengari rayat ti ransing bejalaika pengawa sereta siruka rayat.

“Iya nyadi pengari rayat kita empat penggal ke udah lalu kitai meseti nemu enggau silik baka ni ulah iya.

“Nya alai, aku ngarapka kitai anang nerima sapa-sapa chalun ke bukai kelimpah ari Salang ngambika kita ditu deka lantang ngasaika pemansang dalam kandang lima taun agi,” ku iya madah.-Utusan Borneo
Agi mayuh pemansang deka diadu perintah ba sitak Julau Agi mayuh pemansang deka diadu perintah ba sitak Julau Reviewed by Unknown on January 29, 2018 Rating: 5

Aum PMPG udah nerima timbal ke manah ari ketuai raban bansa

January 26, 2018


KUCHING: Urung empat ratus lima puluh iku nyeretaAum Ketuai Pupu Raban Bansa bekaul enggau Pulau Galau (PG) enggau Pemakai Menua (PM) di sebuah hotel ditu, kemari.

Aum nya ke betuaika Sapit Kepala Menteri ti mega nyadi Chairman pengereja pengawa tanah adat, Datuk Amar Douglas Uggah anak Embas madahka aum tu nerima timbal ari ketuai raban bansa ke chukup manah.

Ari penyampau 450 iku pesereta, 368 datai ari serata menua Sarawak ari komuniti Iban, Melayu, Melanau, Bidayuh enggau Orang Ulu.

“Pekara bekaul enggau PG enggau PM, siti pemerat ngagai kitai semua laban PG enggau PM ukai semina penanggul ba komuniti Dayak aja tang mungkur semua komuniti Bumiputera di Sarawak.

“Mayuh udah di sebut, dikejaku sereta ditimbal mensia mayuh pasal PG enggau PM ba laman rama, sereta media chelak.

“Mayuh mega timbal ke dibacha, bisi sekeda nya nganu madahka perintah enda sinu ngagai sida ke ngempu tanah adat,” ku iya.

Tang penatai Kepala Menteri Datuk Patinggi Abang Johari Tun Openg enggau ke ngulu aum nya, mandangka perintah komited deka mutarka penanggul PG enggau PM, ku iya.

Nimbal pasal pengereja pengawa ti dibetuaika iya empu, iya madah komiti udah ngatur mayuh aum, mutarka tanah adat ke nuduh Opis Majlis Adat Istiadat Sarawak (MAIS) nyadi indu opis sekretariat pekara tu, ke mega ngibun adat Bumiputera di Sarawak.

Uggah ti mega nyadi Menteri Pengawa Betanan Betupi Moden, Tanah Adat enggau Pemansang Menua Pesisir madahka, komiti nya mega nerima mayuh sadang sereta timbal ari NGO sereta korporat.

“Semua sadang nya deka dipansik perintah,” ku iya.

Pengudah aum nya kemari, tetiap iku ketuai pupu raban bansa digempuru nitihka komuniti sida iya, ke deka bejuraika reti PG enggau PM.

“Kami nemu tetiap pupu raban bansa tu bisi ngembuan penemu definisyen PG enggau PM, sekeda nya sebaka lalu sekeda komuniti nya enda sebaka,” ku iya.

Jurai ke sehari tu (kemari) dibantaika ketuai pupu raban bansa ti deka dibai ngagai komiti sebedau dianjung ngagai Kepala Menteri.

“Tetiap timbal deka diperundingka,” ku iya.-Utusan Borneo
Aum PMPG udah nerima timbal ke manah ari ketuai raban bansa Aum PMPG udah nerima timbal ke manah ari ketuai raban bansa Reviewed by Unknown on January 26, 2018 Rating: 5

Pemutus aum nyadi malin mutarka penanggul PMPG

January 25, 2018


KUCHING: Simpul penemu ari Aum Ketuai Pupu Raban Bansa bekaul enggau Pulau Galau (PG),Pemakai Menua (PM) pengudah dipesetuju semua ketuai pupu raban bansa deka dikena ba semua komuniti.

Kepala Menteri Datuk Patinggi Abang Johari Tun Openg madah simpul ari aum pasal PG enggau PM enda tau enda dipesetuju semua komuniti.

“Ambika chunto, PG ni naka garis entara ti dipesetujuka semua. Nya alai, awakka sida ke landik dalam adat mutuska pekara tu.

“Anang ngaul PG enggau PM enggau politik” ku Abang Johari.

Iya madah munyi nya lebuh ke bejaku ba aum media pengudah Bejadi Aum Ketuai Pupu Raban Bansa bekaul enggau Pulau Galau,Pemakai Menua ti diatur perintah nengeri, Majlis Adat Istiadat Sarawak enggau Institut Pemansang Sarawak (SDI) di sebuah hotel ditu, kemari.

Aum nya mega digulu urung 450 ketuai pupu raban bansa ari serata memua Sarawak, pemesai sereta kabinet nengeri Sarawak.

Abang Johari ti mega Menteri Rampa Menua madahka pemutus kort besai dalam bulan Disember 2016 ke enda ngelala PG enggau PM, laban nadai kuasa undang-undang ba PG enggau PM.

“Maya nya (kes kort 2016), sigi nadai kuasa undang-undang ba PG enggau PM, taja pan dalam adat kitai bisi PG enggau PM.

“Nambah enggau nya, dalam kod tanah kitai pan nadai ungkup undang-undang nya.

“Tang laban maya nya, ex-Kepala Menteri kitai, niang Pehin Sri Adenan Satem berati endar ke pekara tu, iya madahka penanggul PG enggau PM enda tau enda diputarka,” ku iya.

Nya alai, iya madah Perintah Nengeri Sarawak sigi deka mutarka penanggul PG enggau PM ke ulih diterima semua pupu raban bansa.

Pengudah aum ketuai pupu raban bansa tu ila, siti memorandum deka diserah ketuai pupu raban bansa ngagai perintah nengeri nyengkaum memorandum ari gerempung bukai.

“Ba sukut perspektif, sida ke diau di menua din nemu agi pasal PG enggau PM.

“Perintah deka mansik memorandum tu ila, lalu tanggung pengawa tu bela di gaga semua pemesai (ukai semina Kepala Menteri aja) dalam perintah.

“Perintah sedia mendingka langgur penemu ke deka dibantaika ketuai pupu raban bansa tu,” ku iya.

Ba kes kort plaintiff ti alah ba kes nya sebedau tu, dipelabaka enda ulih ngena undang-undang nya.

“Chara kitai mutarka tanah diatu ngena Sistem Torren, nya alai ba kes kort ke udah, pemutus ke digaga undang-undang nitihka proses undang-undang baka ke diatu.

“Dalam adat kitai sigi bisi PG enggau PM tang nadai kuasa undang-undang laban ukai kod tanah kitai.

“Nya kebuah, lebuh akim meri pemutus, sida nitihka atur undang-undang baka ke diatu,” ku iya.

Ketegal nadai kuasa undang-undang ku iya, nya kebuah perintah deka ngungkupka kuasa undang-undang ba kod tanah ke mungkur PG enggau PM.

“Nya alai, perintah kitai deka meri kuasa undang-undang ba PG enggau PM nengah ubah ba kod tanah, lalu atur tu enda tau enda diterima semua komuniti.

“Kod tanah kitai bisi pengurang, nya kebuah kitai enda tau enda negapka kod tanah kitai.

“Sida ke bisi kes ba kort pasal tanah adat sida, ulih ke enda ngapil, bepanggai ba ni maya atur kuasa kod tanah nya deka diterit tang sigi enda ulih ditarit pulai baru ke belakang,” ku iya seraya madahka pemerat ngulihka timbal ari ketuai pupu raban bansa.

Sama bisi enggau aum nya kemari, Sapit Kepala Menteri, Tan Sri Datuk Amar James Masing, Datuk Amar Awang Tengah Ali Hasan, Speaker Datuk Amar Asfia Awang Nasar, Sekretari Perintah Nengeri, Tan Sri Datuk Amar Morshidi Abdul Ghani, Sapit Sekretari Perintah Nengeri, Datu Jaul Samion, Chairman Opis Majlis Adat Istidat Sarawak (MAIS),menteri muda, kaban kunsil nengeri sereta menteri kabinet.-Utusan Borneo
Pemutus aum nyadi malin mutarka penanggul PMPG Pemutus aum nyadi malin mutarka penanggul PMPG Reviewed by Unknown on January 25, 2018 Rating: 5

Joseph Salang mekang dikearap ngetanka penuduk di Parlimen Julau

January 24, 2018


JULAU: Ketegal ti balat ngarapka Kaban Parlimen Julau Datuk Joseph Salang ngetanka penuduk nya dia sebagi ari penyukung bisi meri iya siti terabai ti nyadika tanda dikena nyaga diri sebedau Pengawa Bepilih Besai Ke-14 (PRU14) diatur.

Terabai tu disuaka Tuai Rumah Mathew Jana ba sebengkah pengerami ba rumah panjai iya, 74 pintu, di Batu Matup, Julau, kilah ensana.

TR Jana madah, terabai nya nyadika kelai nyeliahka Salang ari majak dipetenah enggau jaku bula sida ti ngenggaika iya ngetanka penuduk Parlimen Julau serak tu.

“Nyadi terabai ke diberi kami tu deka dikena iya nyaga diri empu ari diserang orang bukai kelimpah ti bela tau mai pengering ngagai iya.

“Enti dulu kelia, terabai dikena bansa Iban maya ngayau sereta disempulang enggau senyata bukai,” pia ku iya madah maya nya.

Ku Tr Jana, bala penyukung Salang semampai madah ngagai Salang ngambika ngelaban orang ti bejai iya nyengkaum sida ke gawa perintah.

“Tang iya enda kala besetujuka penemu kami laban ku iya nya ukai chara iya,” ku iya madah.

Sukung sida ku iya, endang semampai tegut diberi ngagai Salang ngambika mujur nyadi pengari rayat ungkup kelima penggal ba Parlimen nya.

Salang ti bela dipebasa bejaku ba pengerami maya nya madahka iya semampai nyikap diri ngetanka penuduk nya.

“Aku ngaga pemutus bediri baru ditu laban aku agi ulih gawaka rayat sereta nadai penanggul ba pengerai.

“Aku mega pechaya kediri empu agi ulih mai mayuh pemansang ngagai rayat udah tu ila,” pia ku iya madah.

Iya madah, sida ti enda lantang ati lalu ringat nadai tuju ngujungka diri empu rugi laban semampai ringat sereta enggai meda iya.

Tang ku iya, iya enda nyima ba pekara nya sereta enda nemu kebuah ti bebatang orang enggai meda iya.

“Siti ari kebuah aku deka ngetanka penuduk tu laban aku meda rayat ditu agi mayuh ngarapka aku nyadi pengari rayat,” ku iya madah baru.-Utusan Borneo
Joseph Salang mekang dikearap ngetanka penuduk di Parlimen Julau Joseph Salang mekang dikearap ngetanka penuduk di Parlimen Julau Reviewed by Unknown on January 24, 2018 Rating: 5

Konvensyen PH enda ulih narit ati peranak Sarawak: Rundi

January 18, 2018


SIBU: Peranak Sarawak patut nemu pengawa ditegika Pakatan Harapan (PH) sereta tebal agi sida enda alah penemu nyukung gempung penyakal enggau manifesto sida ti enda ulih dikearap, pia ku penemu Sekretari Besai Barisan Nasional (BN) Nengeri, Dato Sri Dr Stephen Rundi, kemari.

Ku iya, kelebih agi enggau chairman dikena baru, ti diberi 22 taun sereta puntan ngemansangka nengeri ke peranak Sarawak.

Dr Rundi, Menteri Bekal Ai enggau Elekterik Menua Pesisir, ditanya sekalika Konvensyen PH keterubah di Hotel Paramount di Sibu kena 20 Januari tu deka nerima sukung ari peranak Sarawak maya Pengawa Bepilih Besai Ke-14 (PRU14) ti deka datai, kelebih agi ba pengawa ngetanka penuduk sitak parlimen Sibu enggau Lanang.

Presiden Parti Pribumi Bersatu Malaysia (PPBM) Tan Sri Dato Muhyiddin Yassin enggau Sekretari Besai Parti Keadilan Rakyat (PKR) Dato Saifuddin Nasution Ismail antara 300 pengari ti deka ngulu konvensyen nya, ti deka ditangkanka enggau pengawa ngelancharka Manifesto PH Sarawak (Bagi II).

Ba pekara tu, Dr Rundi ke mega Kaban Kunsil Nengeri (ADUN) Kemena madah, kami di Sarawak endang nemu pengawa ditegika PH enggau semua gaya ulah sereta penempa ulah dikaul, aku pechaya enda ulih narit ati peranak Sarawak kelebih agi chairman dikena baru, ti diberi 22 taun sereta puntan ngemansangka nengeri kitai, baka ti dikearapka kitai.

“Tentu mega, manifesto enda ulih dikearap, baka ni sida ulih gawa dalam timpuh lima taun ti deka datai.”

Diatu, PH bisi enam penuduk sitak parlimen di Sarawak, iya nya Kuching, Stampin, Sibu, Lanang, Sarikei enggau Miri.

Kaban Parlimen (MP) Sibu enggau Chairman Biro Pelajar Politik DAP Pampang Sibu, Oscar Ling, udah madah ba aum pengarang berita ditu kena Hari Dua ke alai Parti Keadilan Rakyat (PKR) deka diagihka 16 iti penuduk, DAP (semilan) enggau Amanah Sarawak (enam).

Ba PRU 2013, Barisan Nasional (BN) Sarawak menang 25 penuduk parlimen - 14 dimenang PBB, enam ari PRS, empat ari SPDP lalu ke bukai ari SUPP.-Utusan Borneo
Konvensyen PH enda ulih narit ati peranak Sarawak: Rundi Konvensyen PH enda ulih narit ati peranak Sarawak: Rundi Reviewed by Unknown on January 18, 2018 Rating: 5

PH deka ngatur Konvensyen Keterubah kena 20 Januari

January 17, 2018


SIBU: Presiden Parti Pribumi Bersatu Malysia (PPBM) Tan Sri Dato ‘Muhyiddin Yassin dipelabaka deka datai ngulu Konvensyen Keterubah Pakatan Harapan (PH) ti deka diatur kena 20 Januari ti deka datai ba Paramount Hotel.

Kelimpah ari iya, Sekretari Besai Parti Keadilan Rakyat (PKR) Dato Saifuddin Nasution Ismail mega bela datai nyempulang 300 iku deligit ke bukai maya nya.

Pekara tu dibantai Ketuai Biro Pelajar Parti Tindakan Demokratik (DAP) Oscar Ling.

Iya mega madah, konvensyen nya ila mega deka dikemujurka Mandal Chairman PH Menua Chong Chieng Jen, pemesai ke bukai baka Baru Bian, Chiew Chiu Sing, Irene Chang, David Wong, Alan Ling Sie Kiong enggau Salahuddin Ayub.

“Konvensyen tu diatur sehari berunggu berengkah 8.30 pagi nyentuk 4 lemai,” pia ku iya madah.

Ku iya, PH Sarawak ti mungkur DAP, PKR enggau Amanah dipelabaka deka nganjung deligit sida maya nya.

Muhyiddin deka meri jaku keterubah pukul 1 lemai lalu ditangkan enggau pengawa bejadi Manifesto PH Sarawak Bagi II, pukul 2 lemai.

Nambahka nya, 13 iku pemesai PH nyengkaum ketuai raban nembiak enggau indu ari tiga iti parti tu bela deka bejaku maya nya.

Ba pekara bukai, Oscar Ling madahka, PH Sarawak udah netapka semua penuduk Parlimen enggi sida maya Pengawa Bepilih Besai Ke-14 ti deka datai.

Ku iya, PKR deka bediri ba 16 penuduk, DAP (semilan) enggau Amanah Sarawak (31).

“Pekara tu udah dirandau semua pemesai tiga bengkah parti tu ba indu opis DAP Sibu ujung minggu tu tadi,” ku iya madah.

Naka ke diatu, PH bisi enam iti penuduk parlimen iya nya Kuching, Stampin, Sibu, Lanang, Sarikei enggau Miri.

“PH Sarawak andal amat ulih ngetanka enam iti penuduk parlimen tu maya PRU14,” pia ku iya madah baru.-Utusan Borneo
PH deka ngatur Konvensyen Keterubah kena 20 Januari PH deka ngatur Konvensyen Keterubah kena 20 Januari Reviewed by Unknown on January 17, 2018 Rating: 5

Chong minta Kepala Menteri nerang silik ungkus ngaga LRT

January 16, 2018


KUCHING: Ketuai Parti Tindakan Demokratik (DAP) Sarawak, Chong Chieng Jien minta Kepala Menteri (KM) Datuk Patinggi Abang Johari Tun Openg nerang enggau silik ngagai rayat Sarawak penyampau ungkus ke deka dikena ngaga sistem LRT (Light Rail Transit), ari wang turu perintah.

Chong madah naka kediatu, Kepala Menteri lalu bedau meri penerang pasal penyampau ungkus ke deka dikena ari wang turu nya.

“Kepala Menteri naka diatu lalu bedau nyaut pemerat tanya bekait enggau sistem LRT nya.

“Berapa penyampau ungkus ke bendar dikena ngaga sistem LRT nya, laban iya (Abang Johari) madahka, Perintah Nengeri deka melanja ungkus ngaga (sistem LRT) ngena duit menua tu lalu nadai minta sesen ari Perintah Besai,” ku iya madah ba aum media ti digaga di Indu Opis DAP ditu, kemari.

Chong ti mega nyadi Kaban Parlimen (MP) Bandar Kuching madahka Kepala Menteri ‘berutang’ meri penerang ngagai rayat penyampau ungkus ngaga, laban enti bepelasarka ungkus ngaga LRT di Semenanjung Malaysia, penyampau nya dalam urung RM25 billion bedau nyengkaum ‘inflation rate’, enti projek nya digaga dalam berapa taun tu ila, ku iya.

“Lalu ni pemayuh orang ke deka nepan LRT nya ila, berapa penguntung ke deka di ulih ari sistem nya taja pan chukup ke mungkur ungkus operasi…Tu tanya ngagai semua projek infrasturktur.

“Ungkus nya ngena duit rayat, ke deka dikena mayar ungkus projek tu, ke tau ngabis duit simpan menua tu,” ku iya.

Sistem LRT tu entara pemayuh projek ke deka nyungkak ekonomi Sarawak, sereta entara pemayuh projek digital ke dipungkal ulih Abang Johari.

Ba penyampau ungkus ke deka dikena tu digaga nengah Bank Pemansang Sarawak (DBOS) ke betatika projek pemansang di Sarawak, baka Ekonomi Digital, Pengangkut ke Mensia Mayuh di Mengeri, Kuasa ke Tau Dikena Baru, Pengerai, Pengawa Betanam Betupi Moden enggau infrastruktur.

Ba lansa bukai, bekait enggau chairman Pakatan Harapan (PH) Tun Dr. Mahathir Mohamad, Chong madahka, tuai pemesai Barisan Nasional (BN)Sarawak ke ‘nyerang’ Dr. Mahathir madahka iya ngaga mayuh utai ke enda manah ke Sarawak, semina seraban orang ke (hypocrites), ku Chong.

“Enti Mahathir amat baka ku sida iya, udah ngaga ‘mayuh utai ke enda manah ke Sarawak’, tang ‘utai ke enda manah’ ku sida iya, pekara ke dikemendarka sida iya empu (BN Sarawak) lebuh Dr. Mahathir agi nyadi Menteri Besai suba,” ku iya.

Iya mega madahka sekumbang Dr. Mahathir nyadi Menteri Besai dalam kandang 22 taun, semua raban politik Sarawak muji iya enggau polisi iya.

“Sida (BN Sarawak) ngangau iya Apai Pemansang, sida iya mega beguai nyium jari iya lebuh maya iya ngelawa Sarawak. Nadai siku ke mantah polisi iya maya nya,” ku iya.

Taja pan udah pinchin dalam taun 2003, lebih 10 taun, ba tuai pemesai Sarawak,polisi sereta pengawa Dr. Mahathir manah magang.

“Semina lebuh Dr. Mahathir udah enggau masuk PH, semua pengawa ke kala digaga ulih Menteri Besai nya suba nyau nyadi utai ke jai.

“Kati ulah ketuai BN Sarawak bansa tu, enti nya ukai melakun ke pengabis besai, bakani ku ngangau nya? Mayuh ari ketuai BN Sarawak (maya nya) enda munyi tang semina muji iya aja, nyangka nya semina ngemeratka diri empu aja tauka takut,” ku iya.-Utusan Borneo
Chong minta Kepala Menteri nerang silik ungkus ngaga LRT Chong minta Kepala Menteri nerang silik ungkus ngaga LRT Reviewed by Unknown on January 16, 2018 Rating: 5
Subscribe to: Posts ( Atom )
ads 728x90 B
Powered by Blogger.