Jematan Long Lama nyungkak tikas ekonomi di Baram

LONG LAMA: Projek ngaga Jematan Long Lama ti beungkus RM70 juta nyangka deka tembu pun taun 2019 lalu deka ngerichahka pemansang ekonomi di sitak Baram.

Kaban Kunsil Nengeri (ADUN) Telang Usan Dennis Ngau madah, sepenembu kematan nya ila deka ngemudahka pejalai peranak Baram ke sebedau tu semina ngarapka servis feri meraka Sungai Baram.

“Nengah pemisi jematan nya, mensia mayuh ulih ngelawa Pasar Long Lama, Apoh enggau Tutoh sebarang maya enda nitihka jam servis feri.

“Nengah peneleba sebedau tu nganti feri ti ngambi pengelama bejam sebedau tu, ti ngasuh mayuh peranak di kandang menua nya lembau deka mulai kediri ngagai menua,” ku iya madah lebuh ti ngabas taba projek Jematan Long Lama nya kemari.

Dennis nambah, kelimpah ari nya jemata tu mega meri pengelantang ngagai peranak dia lebuh maya napi penusah ngenyit ke begunaka servis berubat di Sepital Miri sebarang maya dalam timpuh 24 jam.

Ku iya, sebedau tu, peranak ari Baram endang lembau deka beranjungka orang sakit entara pukul 10 malam nyentuk 7 pagi laban servis feri deka bebayar enggau mar.

“Projek tu udah dikemendar perintah besai ke sebedau tu, tang perintah nengeri mega komited nentuka projek tu tembu nitihka langgur projek, lalu baka nya mega enggau projek ngemanah jalai batang. Aku ngarapka perintah besai ari baruh Pakatan Harapan (PH) deka meri pengelebih ngagai projek menua pesisir baka di Baram,” ku iya.

Beserimbai enggau nya, kereja ngaga Jematan Long Lama tu udah berengkah ari bulan Februari 2016 sebedau Pengawa Bepilih Nengeri (PRN) lalu disadang tembu pun taun 2019.

Nitih ku kunteriktor, naka Julai taun tu, projek tu udah tembu dalam 77 peratus. - Utusan Borneo