Penuduk tetinggi dalam PBB enda diperebutka: Uggah

KUCHING: Bala ketuai tetinggi Parti Pesaka Bumiputera Bersatu (PBB) begulai enggau kaban iya udah sepenemu ke alai pangku pengawa ti pemadu tinggi dalam parti enda diperebutka, laban batang fokus diatu deka ngemansangka Sarawak nyadi nengeri bepenatai pemisi tinggi nyerumba taun 2030, pia ku sapit presiden, Datuk Amar Douglas Uggah Embas.

“Fokus kitai deka ngiga jalai enggau baka ni chara ngemansangka Sarawak kelebih agi raban Bumiputera ngambika nyapai ekonomi bepenatai pemisi tinggi datai ba taun 2030. Ba pekara tu, kitai deka fokus baka ni ngemunaska penyeranta, ngangkatka pemanah infrastruktur enggau pelajar kitai.

“Nya kebuah kaban parti ngaku adat beserakup sereta peragam pemutus ari bala ketuai. Adat tu udah ditampung kami ngelama tu. Nya kebuah kami majak ngerembai ari pengering nyadi majak kering, ke alai parti bukai ngining ,” ku Uggah madah ngagai pengarang berita pengudah nyadi chairman aum komiti mit konvensyen PBB ba Palan Konvensyen Borneo Kuching (BCCK) ditu, kemari.

Uggah, ke mega Sapit Kepala Menteri nyemetak madahka pemutus sepenemu ari kaban parti enggau bala ketuai enda berebutka pangku pengawa ke pemadu tinggi ngayanka penalam adat demokratik dalam parti dikena nentuka nya meruan kering sereta beserakup.

“Parti deka seruran bediri di belakang Kepala Menteri dalam juluk iya deka ngemansang Sarawak nengah ekonomi digital. Nya kebuah rambai jaku kitai ungkup konvensyen tu ‘Mentranformasi Sarawak Melalui Ekonomi Digital’ deka mantaika juluk kami ngerembaika pemansang Sarawak,” ku iya.

Berebak enggau nya, penyandang Sekretari Besai PBB Dato Sri Dr Stephen Rundi Utom madah, taja pan nadai pengawa berebutka penuduk ke pemadu tinggi dalam parti, agi bisi pengawa bepilih ungkup empat pangku pengawa mandal presiden ba Pampang Bumiputera.

“Tu deka nyadi pengawa bepilih ke chukup manah ngagai tujuh iku chalun. Semua sida tu bebakih dalam parti,” ku iya, seraya nambah, sida ti alah deka dichiri mangku pengawa dalam parti.

Tujuh iku chalun ti berebutka penuduk mandal presiden iya nya Datuk Karim Rahman Hamzah, Datuk Talib Zulpilip, Datuk Julaihi Narawi, Datu Len Talif Salleh, Dr Annuar Rafaee, Dr Abdul Rahman Junaidi enggau Dr Abdul Rahman Ismail.

Kebuah iya enda enggau berebutka pangku pengawa mandal presiden kanan Pampang Pesaka, ku Dr Rundi ke mega Menteri Utiliti, endang udah bisi pemereti dalam parti ngawakka Dato Sri Michael Manyin ngambi pangku pengawa nya ari Uggah, ti menang darat nyadi sapit.

“Kitai bela meretika pekara ke alai kitai meri ngagai Dato Sri Michael Manyin, ketuai lama dalam parti. Enda ibuh diperumban ngagai orang bukai. Nya alai aku ngarapka penaluk tim deka seruran bisi dalam parti,” ku Dr Rundi nambah.-Utusan Borneo