Ketuai raban bansa,kaunsilor patut landik sereta bepelajar enti semak udah dipadu nyadi ketuai.

KUCHING: Orang ke dipadu nyadi ketuai raban bansa enggau kaunsilor patut ngembuan penemu enggau pemandai ba pelajar nyengkaum raban bansa China.

Sapit Chairman ‘Federation of Chinese Associations Sarawak’ (FCAS) Datuk Dr. Ngu Piew Seng madah, nya ngambika sida ti ngarika nembiak redak ulih berandau sereta ngenataika peminta tauka penanggul ngagai perintah.

Iya madah, taja pan Kepala Menteri madahka pengawa maduka ketuai raban bansa enggau kaunsilor nya ukai ari politik tang ngarapka pekara nya ulih diperatika.

“Kami minta ngagai perintah nengeri meri awak enggau kuasa ngagai FCAS nentuka bagi nama tauka orang ke senipak dipadu nyadi ketuai raban bansa enggau kaunsilor dalam raban bansa China.

“Lalu ketuai raban bansa enggau kaunsilor ke dipadu nya patut ngembuan pelajar laban ke diatu pengelandik bejaku Bahasa Malaysia enggau English amat beguna, enti enda nemu jaku nya baka ni deka berandau enggau perintah,” ku iya lebuh dikerandau pengarang berita.

Dulu ari nya Ngu enggau Chairman FCAS Datuk Dr. Wong Aik Loung sereta kaban (FCAS) ke bukai bisi meri penemuai basa ngagai Kepala Menteri Tan Sri Datuk Amar Adenan Satem di Wisma Bapa Malaysia ditu, kemari.

Nambahka nya iya madah, entara pekara ke dikerandau enggau Kepala Menteri bekaul enggau pengawa ngaga Sepital Baru Sri Aman ti udah disemayaka perintah besai.

Iya madah, enti nitihka langgur sepital ti dipadahka Menteri Besai maya pengawa bepilih taun 2011 suba, patut tembu dalam taun 2014 tang diatu projek nya agi ba renggat ‘piling’ enggau ‘filling’.

“Kami minta perintah nengeri gawa enggau opis menteri pengerai ngambika sepital baru di Sri Aman ulih digaga enggau jampat.

“Maya berandau tadi Kepala Menteri madahka diri deka betemu enggau perintah besai,” ku iya. Kelimpah ari nya, Wong lebuh dikerandau pengudah meri penemuai basa mega madah, entara pekara bukai ti dikenataika ngagai Kepala Menteri baka bekaul enggau pemansang infrastruktur, pelajar sereta ekonomi di nengeri tu.

Sama nyempulang penemuai basa nya kemari, menteri ti megai tanggungpengawa nyaga raban bansa China Dato Sri Wong Soon Koh ti nyadi Menteri Kaunsil Kandang Menua enggau Pemansang Raban Bansa sereta Temenggung Lu Kim Yung enggau kebukai.