Penyerakup entara pupu raban bansa nyaup ngemujur pemansang: Wan

KUCHING: Penyerakup entara pupu bansa ke udah lama ayan di Sarawak patut diintu manah ngambika nengeri seruran likun sereta lantang lalu nya deka nentuka semua program pemansang perintah ulih dikemujur.

Sapit Menteri Dalam Menua Datuk Wan Junaidi Tuanku Jaafar madah penegap penyerakup nya mega entara kebuah rayat di nengeri begulai manah enggau pangan diri.

“Kitai ke nyadi peranak nengeri tu ti diwan mayuh pupu bansa patut ngenanka pengelantang ke udah lama disepi.

“Berindik enggau nya, kitai patut seruran bebasaka pangan diri sereta bekunsi ngangkatka main asal nengeri tu ngambika tau nyaup ngelaku Sarawak ba mata dunya,”ku iya.

Iya mansutka jaku tu ba Pengerami Nutup Gawai Dayak Kampung Sungai Agas Baru, Batu 12 1/2, ditu malam ensanus.

Iya ke mega Kaban Parlimen Santubong madah kelimpah ari penyerakup nya, main asal baka ke tanda ari tiap pupu bansa ulih nyaup matak temuai ari menua luar datai ke Sarawak.

“Tajapan bebida batang pengarap, rayat nengeri tu patut bekunsi sereta bebasaka main asal tiap pupu bansa lalu nengah chara nya penyerakup ke udah lama ayan ulih ditegap ka agi.

“Kelimpah ari nya, pengelantang enggau pengelikun deka matak mayuh agi orang dagang beranakka puku di nengeri tu lalu deka matak mayuh agi temuai ari menua luar datai,”ku iya.

Dulu agi ari nya, Kaban Kunsil Nengeri (Adun) Pantai Damai Dr. Abdul Rahman Junaidi madah pengelantang ke disepi diatu patut diterenak ba runding nembiak rebak baru.

“Nembiak rebak baru deka nyadi peturun kitai ke mega deka nentuka kuing menua jemah, ketegal nya reti penyerakup patut diterenak ba runding sida.

“Setipak enggau juluk nya, raban nembiak ke diatu patut meri chunto ke manah ngagai nembiak rebak baru,”ku iya.

Pengerami Nutup Gawai Dayak digulu semua peranak Kampung Sungai Agas Baru sereta nerima pengabang ari sekeda genturung pendiau ke besemak.-BP