Ubah meh chara berunding enti nyema deka maju- Harden

SRI AMAN: Menteri Muda Pemansang Menua Pesisir enggau Pengawa Berumah, Datuk Francis Harden Hollis madahka raban bansa Dayak patut ngubah chara berunding ba semua sukut pengidup enti nyema deka maju.

Raban bansa Dayak patut ka nyingkang setipak enggau bansa bukai ba dunya moden maya hari tu ngambika bela nulung ngemansangka menua udah nya ngubah penemu lama ngagai penemu ke baru nya meh utai ke pemadu beguna ngagai bansa Dayak nyema deka maju baka bansa bukai,laban pemar jeman moden minta kitai nyerungkai mayuh bidang lalu anang bepanggai ba siti bidang aja, ku iya.

Harden ti mega nyadi Kaban Kunsil Negeri (ADUN) Simanggang madah munyi nya lebuh dirandau pemberita pengudah bejadi Program Gawai Dayak Parti Sa’ati Rayat Sarawak (SUPP) 2014 diatur SUPP Pampang Lingga bepalan ba Rumah Inchang, Skirau Ai, Bakong, Sri Aman ensanus.

Bansa Dayak patut neladan bansa China enggau Melayu ke udah maju ba mayuh bidang kelebih agi pengawa dagang lalu mega bisi ngelalau rayat ngambika berunding tebuka lalu nyukung polisi-polisi pemansang ke udah enggau ke deka dipejalaika perintah awakka negeri tu enda tinggal pemansang dudi ari ila.

Sukung penuh rayat ari mayuh bengkah parti kompenen Barisan Nasional (BN) sereta rayat ari pupu raban bansa beguna amat dikena nentuka pemansang ke udah diperambu mujur digaga raban perintah chukup begunaka sukung rayat di negeri tu udahnya enti nadai kerejasama, program-program pemansang ke udah diperambu tentu pedis deka mujur, Nya alai rayat patut landik milih ketuai ke amat-amat ulih ngemansangka rayat, enda ngira sekalika ba mengeri besai tauka ba menua pesisir , tambah iya agi.

Nyentuk ka saritu, rayat ba negeri tu udah nemu lalu majak nginginka pemansang. Nya alai, sukung rayat ngagai tuai perintah Barisan Nasional (BN) endang betul amat.

Sama bela datai asuh program nya, Ketuai Raban Nembiak Parti SUPP Simanggang, Patrick Micheal Malajin, Pengulu Tinggi, Kaunsilor Walterkiller James Junit sereta bala bukai.

Rambau pengerami nya, Harden mega bisi nyuaka geran RM5,000 ari perintah ngagai Komiti Pemansang enggau Pengelikun Kampung (JKKK) rumah panjai nya lalu RM3,000 agi diberi ngagai Gerempung Indu rumah panjai nya.