Balai raya di Kpg Kudei deka digaga taun baru, ku Johari

KUCHING: Perintah deka ngaga sebuah balai raya ungkup komuniti di Kampung Kudei enggau sekeda genturung pendiau ke besemak enggau nya, sebuah palan enda entu jauh ari Jembatan Satok tauka tanah alai stor Opis Kunsil Dewan Bandaraya Kuching Utara (DBKU) ke diatu.

Menteri Pengawa Berumah Datuk Amar Abang Johari Tun Openg madah balai nya ila deka digaga begulai enggau DBKU enggau ungkus urung RM3 juta, laban tanah ke endur stor DBKU kediatu agi dipenggi opis kunsil nya.

“Langkar balai nya ila deka digaga lalu dijangka taun baru tu ila baru iya deka belabuh digaga. “Penembu balai nya ila ulih alai ngatur mayuh macham aktiviti genturung pendiau ke semak tu baka pengawa orang nikah sereta atur pengawa bukai,” ku iya.

Johari ti mega nyadi Kaban Kunsil Nengeri (ADUN) Satok madah munyi nya rambau pengawa magi bubur lambuk begulai enggau Menteri Kereja Malaysia, Datuk Fadillah Yusuf di Dewan Serbaguna, Kpg Kudei ditu, kemari.

Kelimpah ari nya, Madrassah (surau lama) ti bisi ba Kpg Kudei nya mega, sama deka dikemanah ungkup komuniti ba endur nya. Program ‘Ihsan Ramadan’ nya digaga ninting taun beserimbai enggau Hari Raya Aidilfitri lalu tuju iya dikena mantu ngurangka penusah sida ke diau di sitak nya, nyambut hari besai nya.

Sekali tu, pemayuh penerima bantu pemakai sereta wang lebih kurang 120 iku. Sama bisi nguluka atur pengawa nya kemari, Ketuai Pemuda PBB Satok, Iskandar Sharkawi.-BP