Opis menteri ngemeratka bekal ai seruran chukup belama jemah ila

KUCHING: Pengawa ngaga tekat ai sereta Skim Mindahka Ai Mata deka dipejalaika kena nentuka bekal ai seruran chukup jemah ila.

Menteri Perengka Guna Mensia Mayuh Datuk Amar Awang Tengah Ali Hasan mansutka pekara nya dalam jaku pengelalu ba pengerami ngintu Genap Taun Ke-10 Opis Menteri Perengka Guna Mensia Mayuh bejalaika pengawa, ti diatur ba sebengkah hotel ditu malam ensanus.

“Dikena ngenukuka bekal ai chukup jemah ila, opis menteri deka terus ngemansangka penatai ai ti seruran chukup nengah pengawa ngaga tekat ai sereta Skim Mindahka Ai Mata’.

“Chara numbuhka sistem Bekalan Air Wilayah deka nyadika kandang endur nimbun ti enda dikena agi deka dikemansangka ngena utai bukai.

“Kitai bisi lebih empat (4) milliun hektar palan penimbun ai ti udah digazet, nya dikena nentuka bekal ai kitai seruran chukup jemah ila,” ku iya.

Bejaku baru iya madah, piak bekuasa bekal ai mega patut nyendiaka ‘Risk-Based Approach’ ke guna sektor ai nengeri tu dalam timpuh ke panjai.

Aku mega udah ngasuh semua piak bekuasa bekal ai nyendiaka ‘Water Safety Plan’ senipak enggau guna kemaya hari tu sereta renggat antarabansa, ku iya.

Nyerumba pengerami ngintu Genap 10 Taun opis menteri nya, sistem aplikasi ‘e-KISS’ tauka ‘e-Key Performance Indicators System for Water Supply Services’ ti dipenyadika temuai ti dipebasaka iya nya Kepala Menteri Tan Sri Adenan Satem. Ku Awang Tengah, sistem aplikasi nya dikena ngemuntangka pengawa nganjung Key Performance Indicator empat bengkah opis dibaruh kuasa opis menteri.

“Tuju sistem aplikasi ‘e-KISS’ iya nya ngemuntangka kompilasi enggau nganjung KPI empat piak bekuasa bekal ai di nengeri Sarawak iya nya Lembaga Air Kuching, Lembaga Air Sibu, LAKU Management Sdn Bhd enggau Jabatan Kerja Raya (pampang Bekal Ai) ngagai opis menteri perengka guna mensia mayuh.

“KPI nya dikategorika ngagai lima pekara, nyengkaum ‘Water Services Performance, Customer Servces Performance, Operational Performance, Financial Performance enggau Environment Performance’, ku iya.

Sama bisi ngulu pengerami nya malam ensanus Menteri Perengka Guna Mensia Mayuh Datuk Amar Awang Tengah Ali Hasan, Menteri Muda Perengka Guna Mensia Mayuh (Bekal Ai) Datuk Sylvester Entrie Muran, Menteri Muda Perengka Guna Mensia Mayuh (Elektrik enggau Perengka Penyambung Datuk Dr Rundi, Speaker Kunsil Nengeri Datuk Amar Mod Asfia Awang Nassar enggau ke bukai.-BP