Pemeresi ai Sungai Sarawak patut ba Kelas IIB

KUCHING: Perintah nengeri nagit deka nentuka kualiti pemeresi ai Sungai Sarawak manggai ba Kelas IIB, tikas enda ngeruga pengerai men­sia mayuh taja pan bisi kena pechik tauka sepuh ai nya.

Pemesai Pengemata Pe­manah Rampa Menua, Opis Pengeraja Asal enggau Rampa Menua (NREB) Nur Aida Az­man madah, dikena ngemujur tagit nya NREB bisi ngatur Program Ngemataka Pemeresi Ai (RWQMP) ti dipejalaika kenyau taun 1999.

Iya madah, atur RWQMP nya bepelasarka pemutus perintah nengeri ti ngemataka pemeresi ai ba semua sungai di Sarawak manggai ba Kelas IIB renggat NWQSM.

“Bisi sekeda sungai kitai udah manggai ba Kelas IIB, tang tagit perintah nengeri diatu iya nya Sungai Sarawak (tagit kelas IIB) laban Sun­gai Sarawak tu ba kandang mengeri, tikas pemeresi patut dikemerat.

“Berindik ari nya, kami nengah atur RWQMP eng­gau juluk deka ngenuku sereta ngenetapka kualiti ai ba semua batang sungai besai, mansik ke­buah penanggul pengamah ai, ngenetapka bansa pengamah ti rarat ke sungai sereta ngumpul penerang sereta nyaran atur ti patut dikereja kena ngemer­anka pemeresi ai sungai.

“Nambahka nya mega kami begulai enggau Opis Parit eng­gau Entali Ai (DID) bejalaika ‘Program Satu Negeri Satu Sungai’ dikena nentuka sun­gai beresi sereta nyadi aset ti pemadu berega,” ku iya.

Nur Aida mansutka pekara nya lebuh ditanya dalam sesi tanya saut pengudah ‘Talks On Sustainable Development’ nyerumba Program ‘Youth Green X-Change’ ti diatur begulai entara NREB, Angka­tan Zaman Mansang Sarawak (AZAM Sarawak), World Wide Fund for Nature (WWF-Malaysia), Trienekens Sdn Bhd (Sarawak), Opis Rampa Menua enggau Sarawak Ener­gy Berhad (SEB) ba Kompleks AZAM ditu, kemari.

Nambahka nya iya madah, NREB mega mekuh ng­atur program begulai enggau komuniti dikena nentuka kualiti pemeresi ari Sungai Sarawak tejapaika tagit Kelas IIB.

“Ambika banding kena mutarka penanggul pengamah ai Sungai Tabuan sebengkah chara kami iya nya ngatur gotong-royong meresi sungai nya enggau komuniti, ti deka diatur udah Hari Raya tu ila,” ku iya.

Nengah program ngema­taka pemeresi ai, Nur Aida madah, penyuah matau tauka ngemataka pemeresi ai nya dipejalaika sebulan sekali, dua bulan sekali, tiga bulan sekali enggau enam bulan sekali.

Ambika chunto, baka Sungai Sarawak kami matau sereta ngemataka iya sebulan sekali laban sungai tu ba kandang mengeri, ku iya.

Nitihku Nur Aida, ba taun 2012 bisi 59 sungai enggau 258 stesyen dikemataka NREB nengah program nya. Ba taun 2012 ku iya entara sungai ke ditemu kamah iya nya Sungai Batang Lupar, Batang Samarahan, Sungai Maong, Sungai Padungan, Sungai Sekama enggau Sungai Tabuan, lalu ke beresi iya nya Batang Skrang enggau Batang Undup di Sri Aman.

“Tikas kualiti pemeresi sungai di Sarawak ba taun 2012 iya nya ari 59 batang sungai ke dikemata, 10 peratus ba tikas beresi, 29 peratus kamah enggau 61 peratus numbas pemeresi,” ku iya.-BP