Projek jematan baru di Sungai Bawang Asan deka tembu 2016

Kira RM6.7 juta agih belanja udah dikemendarka perintah Barisan Nasional dikena nukar jematan kayu sebedau tu


SIBU: Perintah Barisan Nasional (BN) udah ngemendarka agih belanja kira RM6.7 juta dikena ngaga jematan besi dikena nukar jematan kayu ke dikena ngelayang Sungai Bawang Assan.

Menteri Wang Kedua Dato Sri Wong Soon Koh madah, projek ngaga jematan baru 60.3 meter pemanjai nya deka begunaka awak 21 bulan endur tembu.

Iya madah, projek nya mega nyengkaum pengawa ngaga jalai sepemanjai 100 meter ba dua kededua piak jematan nya udah berengkah 1 Julai tu tadi lalu dipelabaka tembu kena 31 March, 2016.

“Sehari tu kitai berasai gaga laban perintah BN udah mendingka juluk kitai ke deka ngaga jematan baru,” ku iya rambau Pengawa Mungkal Tanah Taba Ngaga Jematan Bawang Assan, kemari.

Sama bisi datai chairman pengatur pengawa Andrew Shilling, Sekretari Politik Kepala Menteri Christopher Thomas, Sapit Residen Sibu (Pemansang) Sapiah Daud, Injinir Opis Kereja Raya (JKR) Menua Sibu, Tiong King Wei, Pemancha Stanley Gramong, Penghulu James Semilan sereta bala bukai.

Menteri Perintah Pelilih Menua enggau Pemansang Raban Bansa nya mega madahka, pengawa ngaga jematan nya deka ngemuntangka peranak ba kandang menua nya bejualka asil utai tanam sida ngagai pasar Sibu enggau ngaga endur bukai.

“Enti jematan nya udah tembu ila, kitai ditu deka ngasaika seiti agi perengka infrastruktur ba Bawang Assan,” ku iya seraya ngarapka projek jematan nya ulih tembu tumu ari raban konteriktor Titanium Sdn Bhd.

Kaban Kunsil Negeri (ADUN) Bawang Assan nya mega ngarapka nengah jematan baru nya deka mayuh agi projek pemansang ulih diberi ngagai sitak Bawang Assan enggau Sibu.

Berindik ari nya, Wong ngarapka rayat enggau pengundi di DUN Bawang Assan deka terus nyukung BN ba pengawa bepilih besai (PRN) ke deka datai.

Iya mega madah, agi bisi genturung pendiau ba sitak DUN Bawang Assan baka Sungai Pinang, Rassau, Kampung Bungan Besar, Tutus enggau Sungai Sebedil bedau ngasaika pemansang diberi perintah baka jalai raya, bekal ai beresi enggau elektrik.

Tang ku iya, sida deka terus naka ulih ngulihka peminta ari Opis Menteri Pemansang Menua Pesisir enggau Kandang Menua awakka ulih nyediaka perengka guna nya.-BP