Sarawak likun ari keruga penyelawai, ku Wira

SIBU: Nengeri Sarawak likun ari dikeruga pengawa penyelawai tauka militan, pia ku Komisyener Polis (CP) Sarawak Datuk Wira Muhammad Sabtu Osman.

“Kami enda ngelakka pekara ti bekaul enggau pengawa penyelawai enti bisi ditemu nyadi ba nengeri tu.

“Kami semampai matau pengelikun laban ditu mega bisi orang datai ari menua luar,” pia ku iya madah ngagai pengarang berita pengudah ‘berbuka puasa’ enggau raban Muslim di Indu Opis Polis Sibu ditu, lemai kilah ensana.

Nitihka ripot Bernama, taun tu polis udah nangkap 19 iku rayat Malaysia ke dipelaba bisi kaul enggau pengawa penyelawai nyengkaum seiku pengelicha Pengajian Islam Universiti Malaya (UM), Dr Mahmud Ahmad, 35, Mohd Najib Husen, Muhammad Joraimee Awang Raimee, 39 enggau dua iku peranak Tawau, Sabah, Mohd Amin Baco, 30 enggau Jeknal Adil.

Kelimpah ari nya, Muhammad Sabtu mega ngelalau bala sida ke bisi ngembuan senapang gaga diri empu ngambika nyuaka senyata nya ngagai polis.

Ku iya, sida ke bisi senyata tu tau didawa nengah Akta Senjata Api laban nadai lisin enggau permit.

“Aku ukai nangi pengawa mai senyata api ari menua sepiak enggau chara belalai tang aku nangi laban mayuh agi senapang gaga diri empu ke dirampas di Sibu enggau Miri empai lama tu tadi,” pia ku iya nerangka.

Iya madah, mayuh agi senapang gaga diri empu nya dirampas maya Ops Cantas.





sumber