Pengawa menih remang enda diketu

KUCHING: Pengawa menih remang deka dipajakka taja pan dalam dua, tiga hari tu tadi udah bisi ujan, ku Menteri Pengeraja Asal enggau Rampa Menua Kedua Datuk Amar Awang Tengah Ali Hassan.

Iya madah, nitihka rikod ari Opis Metereologi, musin kemarau tu dijangka deka mungkur datai ngagai pun bulan September tu ila.

“Baka ke udah dipadahka Opis Metereologi dalam aum tu tadi, musin kemarau dijangka deka ngerampit datai ngagai pun bulan September, taja pan dalam kandang dua tiga hari tu tadi, menua kitai udah bisi tata ujan.

“Nya alai, pengawa menih remang deka terus dipajakka kelebih agi ba sitak menua ke amat-amat betapi enggau penanggul nadai ai, ngambika udah nya bisi ujan lalu tau nambahka ai ba palan ke suntuk ai,” ku Awang Tengah.

Iya madah munyi nya rambau aum pasal atur ti deka diatur lebuh betapi enggau suntuk ai maya kemarau ditu baka ke diatu, begulai enggau bala menteri, menteri muda, enggau sekeda ejensi perintah bukai di opis iya ba Wisma Sumber Alam ditu, kemari.

Iya madah ejensi ke bisi bekaul enggau ai, iya nya Opis Kereja (JKR), Opis Ai Kuching (KWB), Sibu (SWB), Laku enggau semua opis kandang menua bukai udah ngaga atur ngesah penusah tekala nya lalu udah besedia lebuh kitai betapi enggau musin kemarau.

“Nya kebuah pengawa menih remang patut dipejalai enggau jampat, laban ke diatu opis ke ngemeranka tanggungpengawa ngaga pengawa menih remang nya benung bejuraika pekara tu, alai menih remang tu deka diatur nyangka dalam kandang dua hari tu ila, kelebih agi ba sitak menua ke balat endar betapi enggau kemarau.

“Nangkan ke nya diatu, udah bisi puput angin ke balat, lalu berindik ari nya mega udah bisi remang, ke manah endur pengawa menih remang,” ku iya lalu ngarapka penanggul sereta penusah rayat ulih diputarka enggau jampat.

Kelimpah ari nya mega, iya madah di serata menua Sarawak, rikod Indeks Pengamah Angin (API) dipeda baruh ari 100, ti tau dikumbai manah ke pengerai, lalu ‘tumpuk angat’ ti bisi ditemu naka pukul 5 lemai kemari bisi 6 kes dikereja sida ke bumai mit.

“Aku udah ngasuh Opis Pengeraja Asal enggau Rampa Menua (NREB) nginsil semua lisin sida ke deka nunu peneka ati.

“Nya alai, naka ke diatu, nadai permit dikeluarka datai ngagai maya nya ila, musin kemarau udah nadai agi, lalu atur nya nyengkaum kebun-kebun bedandang besai,” ku iya lalu minta NREB neritka agi atur.-BP