Agi mayuh rayat saru runding sentang juluk konsep GST

SRI AMAN: Mensia mayuh ke diau ba pasar enggau menua pesisir dilalau meretika konsep Chukai Barang enggau Servis (GST) ti ditengkebang perintah sereta deka diteritka di menua Malaysia berengkah ari 1 April taun baru.

Sapit Kanan Direktor Kastam II, Bagi GST, Pampang Pengemata Perengkaguna, Fasilitasi enggau Konsultansi, Opis KASTAM Diraja Malaysia, Kuching, Noelle Lily Ronald Morsa madah, agi mayuh rayat di menua pesisir enggau kandang nengeri mengkang saru runding enggau GST ti ditengkebang perintah ke dikumbai sida ‘GST Talukka Rayat’.

Ku iya, GST nya chukai ba utai ke dibelanja lalu ukai chukai ba penatai pemisi.

“GST deka berengkah dipejalaika kena 1 April taun baru ke alai konsep nya udah disebut Menteri Besai Malaysia, Datuk Seri Mohd Najib Tun Razak ba aum bejuraika bajet 2014 taun seiti nyin tadi.

“Penyampau GST ke deka dipejalaika di Malaysia pemadu baruh 6 peratus enti dibanding enggau menua bukai iya nya 27 nyentuk ke 30 peratus,”, ku iya.

Iya bejaku munyi tu ba Program Nerangka Pasal Chukai Barang enggau Servis (GST) ngagai mensia mayuh di Sri Aman ke diatur Opis KASTAM Diraja Malaysia ba Hotel Seri Simanggang ditu pagi kemari.

Ku iya baru, naka ke diatu bisi 75 peratus ari 150 buah menua di serata dunya udah bejalaika GST lalu 25 peratus ari 49 buah menua di dunya tu mengkang bedau bejalaika GST nya.

“Batang tuju GST tu dipejalai ngambika ulih dikena nyaup ngemansangka menua Malaysia lalu laluh ari GST nya deka dikena mantu rayat nengah mayuh macham bansa bantu baka Bantu Rayat 1 Malaysia (BR1M), bantu sekula bala anak enggau sekeda bansa bantu perintah ke bukai.

“Nya alai, kitai anang ngumbai GST nadai guna ngagai sesebuah menua laban asil ari GST nya ukai semina dikena mantu ngemansangka menua aja tang mega dikena mantu rayat,” ku iya.

Ku iya, ke bendar udah lama perintah bejalaika chukai ke baka tu tang semina rayat aja enda nemu.

“GST nya chukai utai ti diguna ke di chukai ba barang enggau servis ba semua tikas dagang. GST nya kena nyilih chukai asil ari bejual enggau chukai servis (CPJ) ngambika sistem chukai di Malaysia ngasi agi, efisyen sereta tampak dipeda,” ku iya.

Iya arap nengah penerang nya, rayat nemu lebuh ke napi GST nya ila.

Dulu ari nya, program tu udah dipenyadika Residen Bagi Menua Sri Aman, Jonathan Lugoh.

Bela bisi ngulu licha nya DO Sri Aman, Ismawie Salleh.

Urung 200 iku bala pengereja pengawa perintah, kaban gerempung ukai dikuasa perintah (NGO) enggau bala ketuai raban bansa di pelilih mit Sri Aman udah ngulu penerang nya.-BP