Ngiga jalai muntang, ngayanka pengurang integriti

KUCHING: Keretas peresa buchur beduduk ari ulah temaha sereta rangka deka ngulihka penyulut ba peresa nengah jalai muntang lalu ngayanka pengurang integ­riti diri.

Menteri Pengintu Penge­lantang Pendiau, Orang Indu enggau Pemansang Ruang Bilik Datuk Fatimah Ab­dullah madah, ulah ti nadai ngemeratka integriti nya meri pangka ti negatif sereta mejal runding nembiak ke ngambi Ujian Penilaian Sekolah Ren­dah (UPSR).

“Pekara ti baka tu enda patut nyadi enti integriti ba atur nyendiaka keretas peresa nya seruran dikemerat, nya alai semua piak ti bekaul enggau nya patut meretika tanggungpengawa diri ngam­bika keretas peresa nya enda buchur.

“Kitai balat rawan, pekara tu nyadi laban sida deka ngu­lihka penyulut ngena chara muntang sereta enda ibuh bebendar. “Pekara tu meri pangka ngagai nembiak, apai indai enggau pengajar laban sida lebih agi nembiak udah be­sedia napi tanya ari subjek nya tang ketegal buchur, ngujungka timpuh diubah baru,” ku iya.

Fatimah mansutka pekara nya lebuh dirandau pengarang berita pengudah bejadika pengawa nutup ‘Program Latihan Pengarah Wanita’ enggau pengerami nyuaka setipikit ba sebengkah hotel ditu kemari.

Kelimpah ari integriti, iya madah, pemansang teknologi kemaya hari tu mega pa­tut ulih ditapi kena nentuka tanya peresa enda muntang buchur. “Kitai patut nemu penge­lemi nyengkaum ba teknologi baru diatu dikena nentuka pekara ti sebaka enda nyadi baru jemah ila baka lebuh peresa Sijil Pelajaran Malay­sia (SPM) tauka Sijil Tinggi Pelajaran Malaysia (STPM) dudi ila,” ku iya.

Iya bepenemu dikena nentuka nadai keretas pere­sa buchur, proses nyen­diaka keretas tanya, nyelak, mungkus enggau nyimpan nyentuk ke nganjung ngagai palan peresa patut diteritka agi sebedau peresa dipe­jalaika.

“Nya alai kitai ngarapka sida ti bekaul enggau pekara tu nerima ukum ti senipak,” ku iya.

Kelimpah ari nya, Direktor Opis Pelajar Nengeri Sarawak Serina Sauni madah, iya nga­rapka piak sekula ulih nyikap baru nembiak sida betapi enggau peresa nya.

“Insiden ti baka tu kala nyadi lalu bisi kebuah iya lalu kitai ba piak Opis Pelajar Nengeri agi nganti pemutus seraya peresa keretas subjek bukai terus diatur baka ke ditimpuh,” ku iya.

Ensanus, Lembaga Peperik­saan ngeluarka penerang iya nya keretas peresa Sains UPSR 018, 028, 038 ditemu buchur ngujungka maya peresa subjek nya ditangguh ngagai 30 September, sepatut diatur 11 September.

Kemari mega, keretas pere­sa Bahasa Inggeris 1 enggau 2 mega ditemu buchur.-BP