Penguna ‘Internet’ Deka Ditinggang Ukum Ke Berat Enti Ngelanggar Atur

SIBU: Penguna internet di menua pesisir dilalau enda ngena chara ke salah ngenataika penyarut entara raban bansa, ngutuk pengarap bukai, ngachuk sereta ngugut mensia mayuh nengah mayuh chara.

Kaban Parlimen (MP) Julau, Datuk Joseph Salang Gandum madah, enti sema bisi ripot polis diterima bekaul enggau ulah ke enda menuku nya, raban Suruhanjaya Komunikasyen enggau Multimedia (MCMC) Malaysia deka bejalaika pansik sereta nyidi sida ke ngelanggar atur nya.

“Sida ke ditemu ngelanggar atur tu deka ditinggang ukum ke terit ti udah disediaka perintah,” ku iya.

Iya mansutka jaku nya lebuh bejadika pengawa ngemunka Pusat Internet 1Malaysia Nanga Meluan di Julau kena Hari Enam tu tadi.

Salang ke mega Ex-Sapit Menteri Informesyen, Komunikesyen enggau Adat Asal Menua Malaysia madah, nya sebengkah ari penyiru perintah nyendiaka palan ngagai rayat menua pesisir di menua nya ngulihka mayuh informesyen enggau ngasaika pemansang teknologi komunikesyen sebaka enggau rayat ke diau di mengeri.

“Teknologi internet mayuh diguna kemaya hari tu kelimpah ari dikena ngerapitka kaul enggau raban bansa bukai sereta ulih belajarka penemu dalam awak dagang,” ku iya.

Kelimpah ari nya, Salang mega madah, sebuah menara komunikesyen deka digaga ungkup rayat di menua Julau enda lama agi.

Projek nya sebengkah ari 12 perambu ke udah disediaka perintah ngagai rayat di menua nya.

Salang ke mega Presiden Dewan Dagang enggau Industri Dayak (DCCI) madah, gerempung nya deka nyediaka sebengkah website ungkup kaban gerempung DCCI.

“Website tu ila ulih dikena raban bukai bejalaika promosyen sida ngagai menua bukai.

“Nya alai, aku ngelalau rayat ke diau di menua pesisir ke nyeretai gerempung tu awakka ngembuan pengelandik dalam komputer laban ulih ngenataika mayuh penguntung ngagai kitai,” ku iya.

Berebak enggau nya, Salang bisi nemuai ngagai Rumah Budi Utih ke pemanjai 14 pintu.

Ba penemuai nya, iya bisi nyuaka bantu bangku roda ngagai seiku peranak rumah panjai nya Tiong Luna ke beumur 60 taun sereta baru gerai ari sakit strok.

Nitihka jaku ke dipansutka Chairman Komiti Pemansang Meluan, Belayoung Jampong, kerusi roda nya sebengkah ari pemeri ari kaban Jaya Rotary Club Kuching.

Sama bisi datai ba penemuai nya, Ketuai Indu SPDP Julau Elizabeth Ting, Pengulu Micheal enggau Pengulu Bundong.-BP