Semua Peranak Sarawak Bela Ngayanka Penyiru

KUCHING: Perintah Nengeri Sarawak kemari ngagihka bantu RM2 juta ngagai peranak, menua ke tasah ampuh bah di Semenanjung Malaysia lebih agi sida di nengeri Kelantan, Terengganu, Pahang, Perlis, Selangor enggau Johor.

Bantu nya disuaka Kepala Menteri Datuk Patinggi Tan Sri Adenan Satem ngagai Kumpulan Wang Amanah Bantuan Bencana Banjir ke dikuasa Majlis Keselamatan Negara di Ringkat Lima Begunan Dewan Undangan Nengeri, ditu.

“Perintah Nengeri sinu meda sida dituntung penusah bah ti nyadi di Semenanjung Malaysia lalu bantu ke disua kitai sehari tu ngayanka penyiru kitai mantu sida,” ku Adenan bejaku ngagai pemberita pengudah pengawa nya.

Duit bantu nya kemari diterima Sekretari Majlis Keselamatan Nengeri ke dikuasa Majlis Keselamatan Negara, Opis Menteri Besai Addyhanis Ahamad.

Penyampau 242,792 iku sida ke tasah laban penusah bah di Semenanjung Malaysia dalam timpuh seminggu tu sereta bisi nabanka 10 iku nyawa.

Opis Menteri Besai deka ngagihka bantu nya ngagai sida nengah program bantu ke bekaul enggau penusah bah nya ke dipejalai perintah.

Berindik ari nya, Adenan ngelalau peranak Sarawak seruran bejejaga maya landas tu.

Ngenang kaul bukai, Adenan mega ngenataika penyinu enggau penusah ati ba insiden ke nuntung bilun AirAsia Indonesia QZ8501 ke alai bilun nya mega bisi ngundan seiku orang dagang peranak Sarawak.

Bela datai Sapit Kepala Menteri Datuk Patinggi Tan Sri Alfred Jabu, Sekretari Perintah Nengeri Tan Sri Datuk Amar Mohd Morshidi Abdul Ghani enggau Menteri Muda Dagang Temuai Datuk Talib Zulpilip.-BP