Perambu Sitak DUN Baru Bedau Ulih Dibantai Ba Aum Parlimen

KUALA LUMPUR: Ripot kepenudi kar baru sitak bepilih kunsil nengeri (DUN) Sarawak bedau ulih dibantai ba Aum Parlimen (Kunsil Menua) ke bepun hari Satu tu, berindik ari pengawa mendingka bantah ari mensia mayuh bedau tembu.

Chairman Komiti Pengawa Bepilih Besai (SPR) Tan Sri Abdul Aziz Mohd Yusof madah, naka tu agi bisi 10 iti agi bantah bedau dipendingka sida.

“Perambu kar baru nya bisi nerima 64 bantag tang asil peresa SPR semina 41 aja engkeman nitihka atur bantah.

“Enti pengawa mendingka bantah ari mensia mayuh udah tembu, perambu tu deka dibantaika baru, nyema nadai bantah diterima, baru ripot kepenudi ulih tembu,” ku iya madah ngagai Bernama.

Iya madah, ripot kepenudi nya deka dianjung ngagai Menteri Besai lalu tepulai ngagai iya bejuraika pekara nya ba Aum Kunsil Menua ba maya ke patut.

Entara sitak Parlimen ke bisi nerima bantah kenyau perambu nya digazet sekumbang sekumbang bepun 5 Jan tu tadi iya nya Kuching, Kapit, Sarikei, Bintulu, Miri enggau Saratok.

Abdul Aziz madah, SPR ngembuan timpuh dua taun belabuh haribulan nya endur ngaduka gazet sereta mutarka pekara nya (kar baru).

“SPR andal 11 sitak baru ke diperambu nya ulih dikena ungkup Pengawa Bepilih Kunsil Negeri (DUN) ke deka datai,” ku iya ti benung gawa ba Sarawak ngulu pengawa mendingka atur nya.

Berindik ari kar baru nya, DUN Sarawak ke bisi 71 kerusi deka betambah nyadi 82.

Sebelas sitak baru tu iya nya N.13 Batu Kitang, N.17 Stakan, N.18 Serumbu, N.23 Triboh, N.26 Gedong, N.40 Kabong, N.57 Telian, N.63 Selirik, N.66 Murum, N.70 Samalaju enggau N.78 Long Lama.

Pansik baru pasal kar deka digaga ambis nadai lapan taun sekali lalu kepenudi digaga sebedau tu maya 2003.- Bernama