KKMM Nagit 95% Pengerembus Internet Di Serata Malaysia Ba Taun 2020

KUCHING: Opis Menteri Penyambung enggau Multimedia (KKMM) chakah deka mutarka penanggul penyambung ti nyengkaum pengulih, peneras arus enggau bungkur internet dikena ngenukuka Malaysia tejapaika 95 peratus pengerembus internet lebuh manggai ba taun 2020.

Menteri opis nya, Datuk Seri Dr Salleh Said Keruak madah munyi nya ngambika juluk Malaysia deka tejapaika 95 peratus pengerembus internet nyadi nyata.

“Di Sarawak naka ke diatu peratus pengerembus internet urung 78.3 peratus, lalu di Sabah mega sama bela urung nya (peratus di Sarawak) tang di Semenanjung Malaysia tinggi agi.

“Tang pemadu beguna juluk kitai lebuh manggai taun 2020 deka tejapaika 95 peratus pengerembus internet di serata Malaysia nyengkaum menua pesisir.

Nya alai di Malaysia, kitai chukup ngemeratka pengulih,pengelaju arus enggau bungkur internet sereta beratika ekonomi kitai.

“Berindik ari pekara nya, perintah besai nengah Suruhanjaya Komunikasi dan Multimedia Malaysia (SKMM) naka ke diatu udah ngungkupka sepenyampau RM450 juta dikena ngaga menara telekomunikasyen di Sarawak.

“Sepenyampau 149 menara telekomunikasyen benung digaga di nengeri Sarawak, lalu sepenyampau 85 menara telekomunikasyen agi diperambu,” ku iya.

Salleh mansutka pekara nya dalam aum pengarang berita opis menteri iya ti diatur ba sebuah hotel ditu, pagi kemari.

Nambahka nya entara projek bukai ti deka dipejalaika di Sarawak ku iya, nyengkaum Projek Sistem Kabel 1Rakyat Malaysia (SKR1M) ti mungkur pengawa nyambung kabel di dalam tasik ti baru ke nyambung Semenanjung Malaysia enggau Sabah sereta Sarawak.

“Bisi empat iti tampung kabel di dalam tasik ke deka digaga iya nya di Mersing, Kuching, Miri enggau Bintulu berengkah suku kedua taun 2016,” ku Salleh.

Projek ‘Jalur Lebar Berkelajuan Tinggi (HSBB)’ Fasa 2 dipejalaika dikena ngerembaika internet ti deras agi enggau pengelaju nyentuk 100Mbps di kandang mengeri, ku iya ti madahka bisi 34,566 port deka disediakan berengkah ari taun 2015.

“Projek ‘Jalur Lebar Pinggir Bandar (SUBB)’ bisi dipejalaika dikena ngangkatka agi tikas peneras tauka pengelaju nyentuk ngagai 20Mbps ba kandang menua nya.

Bisi 21,664 port deka disediaka berengkah ari taun 2015,” ku iya.

Kelimpah ari nya, iya mega madahka ‘Small Cells’ mega deka dikemanah awakka ulih nyendiaka servis ti dibungkur 2G enggau 3G ba kandang menua ti kurang dibungkur servis nya.

Lalu bisi 60 menara ‘compact’ benung dipejalaika berengkah suku ketiga taun 2015.

“Ungkup peranak di menua pesisir enggau kandang endur ti kurang bungkur internet kami mega bisi nyendiaka Palan Internet 1Malaysia (PI1M) ti nyendiakka servis internet enggau mayuh macham kelas latih ICT.

“Sepenyampau 23 PI1M benung dalam proses dipejalaika sereta dipelabaka tembu bererenggat berengkah ari suku keempat 2015 nyentuk suku keterubah 2016.

“Nambahka nya ungkup peranak menua pesisir ti dipilih ke kurang bungkur bisi disediaka WiFi Komuniti (WK).

Bisi 108 WK benung dalam proses dipejalaika sereta dipelabaka tembu bererenggat berengkah ari suku keempat 2015 nyentuk suku keterubah 2016,” ku iya.

Nyempulang iya ba baum enggau pengarang berita kemari, ketuai Direktor Penerang Malaysia Datuk Ibrahim Abdul Rahman, Sapit Ketuai Sekreteri (Operasyen) KKMM ,Datuk Che Azemi Haron enggau Direktor Opis Pemadah Nengeri Sarawak Abang Sardon Abang Hashim._UB