Pengeran KM Sarawak dipuji Chairman PPPR

KUCHING: Chairman Panel Perunding enggau Penyeliah Ulah Makai Suap (PPPR),Tan Sri Johan Jaffar netapka Perintah Nengeri nengah embing Kepala Menteri Datuk Patinggi Tan Sri Adenan Satem udah ngerintis jalai ke manah ba atur ngelaban keruga pengawa ngereja batang nadai belisin.

Ku iya, pengeran Adenan sentang isu nya chukup manah lalu iya bebendar nesau raban penerit adat nentuka pengawa ngereja batang chara belalai nadai agi nyadi di Sarawak.

“Tu seiti atur ti positif lalu kitai (PPPR ) meri sukung ba sentang pekara tu.

“Diatu mayuh sumil di nengeri tu udah ditutup ketegal raban penerit adat ransing bejalaika tanggungpengawa sida,’ku iya bejaku ngagai pengarang berita pengudah nemuai meri basa ngagai Adenan di Wisma Bapa Malaysia kemari.

Ngenang pekara bukai, Jo”

“han pechaya Komiti Nagang Ulah Makai Suap Malaysia (SPRM) pampang Sarawak ulih bejalaka tanggungpengawa enggau manah.

SPRM pampang Sarawak ku iya, ngembuan tusun pengawa diri dikena nentuka tanggungpengawa dikemujur.

“PPPR semina deka matau pekara ke nyadi ketegal kitai pechaya, lalu ngemeratka pengeran kepala menteri ngambika mayuh ubah ulih digaga di nengeri tu,”ku iya.

Ba penemuai raban PPPR nya, Johan madah sida mega berandauka chara ngelaban keruga ulah makai suap nyengkaum ngenegapka sistem komputer enggau tusun pengawa perintah.

“Kitai seruran ngelalau ejensi perintah kelebih agi raban penerit adat ngambika sida ngemujurka tanggungpengawa enggau lurus, terit sereta profesional.

“Kami ari PPPR ngasaika tusun pengawa ti udah diatur perintah nengeri deka nempa asil ke manah,’ku iya.

Nitihka penerang Johan, dulu agi ari tu sida udah nemuai meri basa ngagai ketuai di nengeri Melaka lalu pengawa ke sama deka diadu di nengeri bukai jemah.

“Ari dua penemuai basa ke udah diatur PPPR, asil randau kitai chukup manah ke alai kededua nengeri udah besemaya deka meri komitmen tinggi mantu SPRM sentang pekara ke bekaul,”ku iya.

Iya mega madah tikas penyalah makai suap di Malaysia diatu enda balat ngirauka lalu SPRM udah bisi tusun pengawa dikena ngelaban keruga penyalah nya.-UB