Semua Peranak Malaysia Patut Ngemesaika Jaku Bansa: Adenan

KOTA SAMARAHAN: Kelimpah ari pengereja pengawa ba opis perintah, sektor peribit mega patut beratka atur ngena jaku bansa dalam pengawa dagang enggau pentusun atur kereja lebih agi ke bisi mungkur raban bansa.

Kepala Menteri Datuk Patinggi Tan Sri Adenan Satem madah, laban semua rayat Malaysia endang patut bejalaika tanggungpengawa ti sama ngenegapka jaku bansa dalam semua aspek pengidup nyengkaum tusun atur kereja.

“Tanggungpengawa ngenegapka jaku bansa ukai semina dipegai Dewan Bahasa dan Pustaka sereta ejensi bukai baka Opis Pelajar aja.

“Aku minta semua rayat Malaysia besaup enggau perintah ngemujurka pengawa ngerembaika pengawa ngena jaku bansa dalam mayuh bengkah bidang di nengeri tu,” ku iya.

Iya mansutka pekara nya nengah teks ti dibacha Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah ba Majlis Pelancaran Bulan Bahasa Kebangsaan 2015 Peringkat Negeri Sarawak di Dewan Suarah Samarahan ditu, malam ensanus.

Sama datai ngagai pengerami nya kaban Parlimen Kota Samarahan Kota Samarahan Rubiah Wang, Direktor Dewan Bahasa dan Pustaka Sarawak Dr. Hazami Jahari enggau Residen Bahagian Samarahan Abdul Rahman Sebli.

Kelimpah ari nya Adenan mega minta rebak baru tauka raban biak di nengeri tu lebih agi ke agi besekula enggau ba renggat universiti landik lebih ari sebansa jaku.

Ku iya nambahka jaku bansa nya, rebak baru enggau dudi nya mega patut landik dalam jaku bukai baka Jaku English, Mandarin enggau ke bukai.

“Tu dikena nambahka sereta meri pengelebih awakka bepeluang sereta ulih besemekih lebih agi maya ngiga pengawa,” ku iya.

Kelimpah ari nya, Adenan ti ngenang Bulan Bahasa Kebangsaan Peringkat Negeri Sarawak diintu betaun ke udah ukai semina program ninting taun ti dipejalaika tang deka pajak diatur perintah dikena ngenukuka peranak nengeri tu seruran sepenemu sejuluk.

Nambahka nya, program nya ulih meransang peranak nengeri tu masuk mayuh bengkah program ti diperambu dalam mayuh bengkah bidang lebih agi kebahasaan, persuratan enggau kebudayaan.

“Elemen bansa jaku nyadi faktor beguna dikena nempa nilai diri menua bansa lalu nya alai, faktor bansa jaku enda ulih dikemaruhka.

“Nyadi tanggungpengawa kitai semua terus nanam sereta ngenegapka jaku bansa dalam raban bansa lebih agi di Sarawak tu,” ku iya.-UB