Jaku asal semua etnik di Sarawak endang dikemerat

KUCHING: Perintah Sarawak nyukung sebarang pengawa bekaul enggau atur ngetan sereta ngintu jaku asal tiap etnik di nengeri tu, ku Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah.

Muji pengawa Dewan Bahasa enggau Pustaka (DBP) pampang Sarawak ti udah suah ngeluarka ‘Dictionary’ jaku asal etnik, iya pechaya pengawa nya tau bendar nyaup ngetanka penentu jaku asal tiap etnik enda midang ngapa.

“Kitai bisi lebih 28 etnik di Sarawak lalu aku muji penyakah DBP ke seruran ngaul komuniti seraya ngeluarka ‘dictionary’ ungkup tiap etnik nengeri tu.

“Tu meh chara sida ngerembai kelimpah ari ngetanka jaku asal tiap etnik ke alai sekeda leka sebut nya engka enda kala didinga nembiak rebak baru.

“Perintah ngagihka belanja ngambi tau nentu pengawa nya dikemujur lalu tu meh chara perintah meri sukung,’ku iya.

Iya mansutka jaku tu rambau bejadika ‘Malaysian Technical Cooperation Programme’ (MTCP) 2/2015 ke diatur ba sebengkah hotel ditu, kemari.

Iya nambah, ketegal diatu udah mayuh orang bebini belaki ngambi bansa bukai sereta tujah pemansang, jaku asal tetiap etnik engka deka lenyau.

“Kitai meretika pangka nya enggau silik lalu enggau nya mega pengawa ngeluarka ‘dictionary’ deka dipajak,” ku iya.

Kena Hari Lima tu tadi, DBP Sarawak bisi ngelanchar Dictionary Dewan Iban-Melayu Edisi ke-dua pengudah dictionary keterubah dikeluar ba taun 1989.

Kelimpah ari nya Fatimah mega madah, main asal tiap etnik deka seruran diintu enggau manah lalu gerempung ti chakah ba pengawa nya deka diberi bantu belanja.

Ku iya simposium main asal deka diatur sekali dalam dua taun lalu matak semua etnik di nengeri tu.

“Ba simposium tu kitai deka nentuka tiap etnik bisi pengari lalu ukai semina digulu orang tuai tang patut matak sida ke biak.

“Perintah endang ngemeratka pekara tu lalu diatur ngambika tiap etnik ngasaika sida sebengkah ari pengeraja ba main asal tu,” ku iya.

Kena nyaup pengawa ngetanka main asal, Fatimah mega madah, pekit betanda enggau main asal bukai patut dikerembai ba semua sekula ditu.

Bela bisi ngulu atur pengawa nya, Direktor Institut Aminuddin Baki (IAB) Serina Sauni.-UB