Ulah Jai Ngena Senapang Di Sarawak Enda Serius

KUCHING: Ulah jai ngena senapang di Sarawak enda serius lalu mujur diintu enggau manah, ku Sapit Direktor JSJ (Jenayah Terancang – STAFOC) Bukit Aman Dato Huzir Mohamed.

Maya dirandau pemberita pengudah nutup Kus CQB Marksmanship Siri 1/2016 di Kem Batalion 11 Batu Kawa kemari, iya madah pekara nya deka seruran dikemata enggau berat lalu opis polis deka chakah agi bejalaika pengawa.

“Aku mega pechaya perintah udah bejalaika atur ke patut, neritka pengawa matau adan menua lalu kitai ulih napi keruga tu,’ku iya.

Penyampau 41 iku pemesai polis ari serata nengeri enggau ngulu kus dua minggu berengkah 15 nyentuk ngagai 29 Ogos 2016.

Sida diajar chara nguna senapang, chara nimbak enggau pekara teknikal.

Ba kus nya, L/Kpl Fahrul Rasi Ahmad Shahbudin ari PGA Sarawak dipilih nyadi penyereta pemadu nyulut ungkup latih luar lalu Sarjan Seah Chin Kwang ari IPK Sarawak ke pemadu nyulut ba semua program kus.

Ngenang kaul ke sama, Ketuai JSJ Sarawak SAC Dev Kumar madah kes jai nguna senapang di Sarawak bebida enggau di Semenanjung Malaysia.

Ku iya, tebal agi di Semenanjung Malaysia kes mungkur ulah jai nguna pistol lalu di Sarawak nguna senapang patah.

“Di Sarawak taun tu bisi 3 kes nguna senapang patah iya nya seiti di Sibu ba bulan Januari, ditangkan enggau kes Bill Kayong enggau kes timbak di Bau.

“Ketetiga kes udah diputar polis lalu enda serius baka ke ba endur bukai,”ku iya.

Senapang patah gaga kediri empu enggau ke enda direjista ke dibai ari menua bukai diguna ba kes jai ditu, tandu iya.-UB