#PrkTjgDatu: BN udah sedia napi PRK

KUCHING: Barisan Nasional (BN) sedia napi Pengawa Bepilih Mit (PRK) ungkup Sitak Kunsil Nengeri(DUN) N.3 Tanjong Datu.

Direktor Operasyen, Datuk Seri Dr Wan Junaidi Tuanku Jaafar madah komiti BN diatu semina nganti hari nganjung nama chalun ti deka diatur kena 4 Februari tu.

“Taja Parti Keadilan Rakyat (PKR) udah netap enda nganjung chalun ba PRK nya, komiti operasyen kitai tetap nyikap diri enggau manah.

“Tu ketegal kitai dekaka BN menang besai di penuduk nya ke nyadi kubu tegap BN kenyau dikuasa Niang Datuk Patinggi Tan Sri Adenan Satem.

“Kitai enda ngira sekalika PKR tauka parti bukai bisi nganjung chalun tauka enda, kitai tetap deka nyikap diri naka pemanah,”ku iya lebuh dikerandau kemari.

Dikena ngenegap komiti Operasyen PRK BN, Indu Opis Parti Pesaka Bumiputera Bersatu (PBB) ku iya udah numbuhka komiti renggat tinggi ngambika ulih meri bantu.

Iya ke mega Menteri Pengeraja Asal enggau Rampa Menua sereta MP Santubong madah sida mega deka dibantu parti bukai dalam serakup BN iya nya PRS, SUPP enggau SPDP.

“Kami komiti bagi PBB deka baum kena pagi 1 Februari tu sebedau baum enggau Kepala Menteri Datuk Amar Abang Johari Tun Abang Openg muaka lemai.

“Aku mega nyadang kepala menteri ke mega Chairman BN Nengeri enggau Presiden PBB deka mantaika nama chalun maya aum nya ila,’ku tandu iya.

Ditanya sentang chalun ke dipilih, Wan Junaidi madah sapa aja ke dipilih kepala menteri deka nyadi chalun BN sereta PBB.

“Enda ngira sapa ke dipilih nyadi chalun, iya deka nerima sukung penuh ari kami,’ku iya.-UB