Ketuai PAS Sarawak ngansak KM lengkas mutarka isu tanah

KUCHING: Kepala Menteri (KM) Datuk Amar Abang Johari Tun Openg patut mendingka sebana sereta bejalaika pengawa ke patut ba penanggul ke ditapi rayat kelebih agi peranak menua tu sereta mega penanggul tanah adat orang Melayu ba kandang menua enda jauh ari mengeri diambi ungkup pengawa pemansang.

Nitih ku Ketuai Parti Islam Se-Malaysia (PAS) Sarawak Jofri Jaraiee, peranak tebal agi diau di menua pesisir enggau besemak mengeri betapi enggau pemar dalam arus pemansang ketegal mayuh tanah sida udah diberi ngagai pemaju ngambi dikemansang laban sida nadai ngembuan hak ngempu tanah.

“Sida tu nyadi kampar ba tanah diri pengudah tanah sida diberi ngagai pemaju alai pemaju ari luar diberi pengelebih nguasa sereta beambi ulih ari tanah sida,” ku iya madah ngagai pengarang berita kemari.

Ku iya nerang silik, mayuh kes ke bansa nya nyadi di kandang menua Lusut, Tukau Jaya, Pujut Padang Kerbau enggau Kuala Baram, ti kala endur diau sereta diperimba peranak asal Sarawak rambau dipegai perintah Rajah Brooke.

“Sida minta kasih ngagai perintah ngambika anang ngambi tanah sida sereta diberi ngagai pemaju ungkup pengawa pemansang laban sida mega begunaka tanah endur diau sereta daya pengidup besehari-sehari enggau pengawa betanam betupi,” ku iya.

Nya alai, iya ngansak piak bekuasa bekaul mansik nama kebuah ke bendar ngujungka tanah Adat Bansa Asal (NCR) enggau Tanah Temuda ulih diempu piak pemaju enggau peribit.

Tambah mega ku iya, piak bekaul patut meri pemerat sereta berundingka nasib rayat ke lenyau alai diau sebedau meri awak ngagai piak pemaju ke semina ngemeratka penguntung aja nadai berundingka nasit ke nuntung rayat.

“Opis Tanah enggau Survey patut meri penerang ke tegap nama kebuah sida muntang endar meri hak ngempu tanah menua tu ngagai pemaju enggau dalih ungkup pemansang.

“Nyauka semua rega rumah dikemansang piak pemaju semina ulih diberi sida ke begaji besai tang orang menua pesisir semina ulih meda aja,” ku iya.

Berebak enggau nya, Jofri madah mayuh penanggul tanah adat enggau tanah Temuda peranak asal Sarawak agi bedau diberi hak ngempu ari perintah lalu pengujung iya diempu piak peribit enggau pemaju.

“Pekara ke agi nyadi tanda tanya, nama kebuah pekara tu tau nyadi taja sida udah suah minta pala tanah ari perintah sereta nganti kelalu lama peminta sida diputar, tang nerima berita tanah sida udah diempu piak pemaju enggau peribit,” ku iya.-UB