#PrkTjgDatu: Nembiak PBB meri sukung penuh ngagai sebarang chalun dipilih KM

KUCHING: Ketuai Pemadah Nembiak Parti Pesaka Bumiputera Bersatu (PBB), Fazzrudin Abdul Rahman madahka sida endang nyukung barang sapa ke deka dipilih Kepala Menteri (KM) Datuk Amar Abang Johari Tun Openg ngetanka penuduk Kunsil Nengeri (DUN) Tanjong Datu ba Pengawa Bepilih Mit (PRK) ke deka diatur tengan bulan Februari.

Fazzrudin, ti mega nyadi ADUN Tupong madah, Kepala Menteri nemu agi ni bagi chalun ke pengabis manah ulih mai pemenang ke besai ungkup Barisan Nasional (BN) ke sitak Tanjong Datu.

“Barang sapa ke dipilih YAB Ketua Menteri, kami Nembiak PBB tetap nyukung 100 peratus dikena nentuka penuduk Tanjong Datu ulih menang besai (nyema bisi disatup pengari bukai).

“Kami nadai pinta enti sema chalun ke dipilih YAB Kepala Menteri nya, chalun ari Nembiak tauka chalun bukai, kami tetap meri sukung penuh sapa ke dipilih kepala menteri,” ku Fazzrudin madah lebuh dirandau pengudah bejadika pengawa ‘Reach Out….Give a Little…Bring Change’ di Surau An-Nur, Taman Palma Indah, Matang, semak ditu kemari.

Pengawa Nganjung Nama ungkup PRK Tanjung Datu deka diatur kena 4 Februari lalu hari ngundi udah ditetapka Komiti Pengawa Bepilih (SPR) kena 18 Februari tu ila. -UB