#PrkTjgDatu: PAN sedia nganjung chalun bediri ba DUN Tanjong Datu

Rapelson Richard Hamit

KUCHING:Parti Amanah Negara pampang Sarawak sedia nganjung chalun bediri ba sitak Kunsil Nengeri(DUN) Tanjong Datu enti diberi pemendar ari Pakatan Harapan(PH).

Kaban Komiti Amanah Nengeri (Sarawak), Rapelson Richard Hamit madah aktivis tanah NCR enggau orang dagang entara sekeda chalun ti diperunding Amanah bediri ngelaban Barisan Nasional(BN) di sitak nya.

Tajapia iya madah, DAP mega entara ke disebut PH ti deka nganjung chalun ba Pengawa Bepilih Mit(PRK) ke deka diatur kena 18 Februari 2017.

“PH meseti nganjung pengari ba PRK Tanjung Datu. Kitai deka nyukung bagi parti ti ngarika PH.

“Entara Amanah tauka DAP deka nganjung chalun ba PRK nya ila, kitai nganti ba maya nganjung nama chalun,”ku iya lebuh dikerandau kemari.

Ngenang kaul ke sama, Rapelson ke nyadi Chairman Amanah pampang Batang Sadong sereta aktivis tanah NCR madah pemutus sentang parti ti deka ngarika PH deka ditentu ba aum tu ila.

Aum nya ku iya deka digulu parti dalam PH nengeri iya nya Amanah, PKR, DAP enggau PBDSB diadu pengudah pengerami ngintu Taun Baru China.

“Pemutus deka ditentu nitihka pemereti semua parti dalam PH. Amanah deka nyukung parti ke dipilih,”ku iya.

Bedau lama tu tadi Chairman PKR Nengeri, Baru Bian udah netapka parti sida enda nganjung chalun di PRK Tanjung Datu.

Pemutus nya ku baru dikena meri basa ngagai pengawa manah ke udah digaga ex-ADUN Tanjong Datu ke mega kepala menteri Niang Datuk Patinggi Tan Sri Adenan Satem.

Komiti Pengawa Bepilih (SPR) bedau lama tu tadi udah netapka hari diak pengawa nganjung chalun PRK Tanjung Datu kena 4 Februari sereta muai undi kena 18 Februari.