Lima ikar tanah ba Siol Kandis dikemansangka SDNU.

KUCHING: Lima ikar tanah ba Siol Kandis ti diempu Sarawak Dayak National Union (SDNU) deka dike­mansang nengah gempung Opis Menteri Pengawa Berumah (MOH) ke deka digagaka kondominium, apartment tauka flet.

Mandal Presiden I Anthony Banyan madah, pekara nya udah dibantai ngagai Kepala Menteri Tan Sri Datuk Amar Adenan Satem maya kaban SDNU betuaika presiden serakup nya, Tan Sri William Mawan Ikom betemu eng­gau Adenan di Opis Kepala Menteri di Wisma Bapa Ma­laysia ditu, kemari.

“SDNU nyali tanah tang MOH ke ngemansangka tan­ah nya. Adenan udah ngasuh kami ngaga perambu nya lalu dianjung ngagai iya sereta ngagai MOH ngambika ulih dipejuraika enggau silik agi,” ku Anthony madah lebuh dikerandau pengudah enggau kaban SDNU bukai betemu enggau Kepala Menteri ditu, kemari.

Kelimpah ari nya, iya ma­dah SDNU ngelama tu bisi dua iti tanah pendam di Siol Kandis enggau Jalai Chawan ke sama nyauka penuh, nya alai sida (SDNU) bisi minta ngagai Perintah Nengeri nen­gah Kepala Menteri, minta tanah nya digagaka pendam, sereta ngarapka ulih dipe­runding ulih Adenan.

“Tanah Jalai Chawan ukai semina ungkup kitai Iban ke pagan tang pendam en­tarabansa ungkup orang Kristian tauka ukai Kristian, kelebih agi ungkup sida ke datai ari menua pesisir tang parai ditu (Kuching) laban kelalu mayuh belanja enti dibai pulai ke menua, orang baka tu tau ngena perengka guna pendam tu,” ku iya alai SDNU diatu benung ngiga tanah ke patut.

Ba pemansang Rumah Dayak ba Jalai Satok (se­piak Sugar Bun), iya madah pemansang nya 100 peratus udah tembu. “SDNU minta bantu Kepa­la Menteri mutarka OP (Oc­cupation Permit) ke Renggat keterubah projek nya dulu, laban Renggat Kedua deka digagaka sebuah hotel bajet ba projek 12 tingkat nya alai ungkup geran kena ngaga nya ila deka dipinta ari Perintah,” ku iya.

Renggat kedua projek nya ku Anthony, deka nguan 12 ringkat ke patut udah belabuh digaga nitihka timpuh jam kontraktor nya tang pemun pengawa udah belabuh di­gaga.

Sebedau nya, Mawan ti mega nyadi Menteri Pe­mansang Pengawa Rama Sarawak, lebuh dikerandau madahka aum SDNU enggau Kepala Menteri pemun iya digaga laban sigi deka meri jaku selamat ari SDNU nga­gai Adenan ke dichiri man­gku pengawa nyadi Kepala Menteri.

Kelimpah ari nya, iya madah jurai enggau Adenan mayuh mungkur pekara bekait enggau pekara ukai semina ba pemansang adat enggau pengawa rama SDNU tang mega bejuraika chara ngangkatka ekonomi bansa Dayak.

“Ukai semina bejuraika adat sereta pengawa rama bansa Dayak tang mega mungkur sukut ekonomi ke dikena ngangkatka bansa Dayak. Bakani ku kitai (sus­tain ourselves) ngambika kitai Dayak ba singkang ke betul ngereja pengawa kitai sereta betanggungjawap ba pemansang ekonomi bansa Dayak bukai.

“Kelimpah ari nya mega, ngatur pendiau kitai empu nitihka singkang politik pe­mansang kediatu,” ku Mawan lalu nambah Perintah Menua mega berundingka geran ke ulih diberi ngagai SDNU ninting taun.

Ba pekara bekait enggau tanah pendam ke dipinta ari Perintah Menua, iya madah pekara ke sama mega deka dipinta ke pelilih menua Sibu enggau Bintulu ke tuju ke sebaka.

“Laban enti diperatika, kitai bansa Dayak mayuh en­dar udah bepindah ari menua pesisir ngagai nengeri, nya alai bisi pemerat kitai begunaka tanah tu,” ku iya.

Bekait enggau pekara nya mega, tanah SDNU di Sibu ku Mawan, benung dipejuraika enggau Perintah enti tanah nya ulih diganti enggau tanah bukai. Sebedau tu, tanah SDNU di Sibu, ditukar kena ngaga sebuah universiti. Sama bisi nguluka aum nya kemari, Mandal Presiden II SDNU Dato Sri Empiang Jabu.