Nadai guna betalat penemu laban semua pemutus ba jari Chairman BN

KUCHING: Parti Sa’ati Rayat Sarawak (SUPP) majakka penemu sida iya, iya nya kerusi Kunsil Negeri (DUN) Opar, Bengoh, Engkilili enggau Bawang Assan endang ungkup parti sida, tang ni naka pengamat kerusi nya ila deka diari chalun SUPP maya Pengawa Bepilih Besai Negeri ke-11 (PRN 11) bedau diputuska agi.

Penyandang kerusi Bengoh kediatu, ti mega nyadi Menteri Muda Pengerai Rama Datuk Dr Jerip Susil , ni bagi parti ke deka ngempu kerusi nya ila, ukai pemerat tang ke berat sapa ke ulih menang ba kerusi nya ungkup BN.

“Ke penegut enggau penegap BN, iya nya ngulihka pemayuh kerusi enggau naka ulih nengah chalun ke ulih menang, lalu enggau tu, aku pechaya ngagai Kepala Menteri Tan Sri Datuk Amar Adenan Satem ke nyadi chairman BN deka ngena runding iya pengabis manah milih chalun ke dijangka ulih menang ba kerusi nya,” ku iya.

Dr. Jerip madah nadai guna ka betalat pasal sapa ke deka ngempu kerusi nya laban semua pemutus digaga ulih tuai pemesai BN milih chalun sida iya empu.

“Enti SUPP kiruh endar pasal penegap BN, pelaba aku sida (SUPP) iya patut ninga utai ku YAB Kepala Menteri,” ku iya nimbal jaku presiden SUPP Tan Sri Peter Chin ke bisi ditabur ba surat berita sehari tu (kemari).

Nitih ku jaku Chin, kerusi DUN Opar, Bengoh, Engkilili enggau Bawang Assan patut diberi pulai baru ngagai SUPP laban beratika semua Kaban Kunsil Nengeri (ADUN) nya ningkilka diri ari parti kena 15Mei tu tadi lalu masuk Parti Tenaga Rakyat Sarawak (TERAS).

Empat iku ADUN nya, Dato Sri Wong Soon Koh (Bawang Assan), Dr Jerip (Bengoh), Dr Johnical Rayong (Engkilili) enggau Ranum Mina (Opar).

Sama ngulu kaban DUN tu masuk TERAS, iya nya enam kaban ADUN bukai ari SPDP, iya nya ex-presiden SPDP Tan Sri William Mawan (Pakan), sereta raban G4 Datuk Peter Nansian Ngusie (Tasik Biru), Datuk Sylvester Entrie Muran (Marudi), Rosey Yunus (Bekenu), Paulus Palu Gumbang (Batu Danau) enggau ex- sapit presiden Sarawak Workers Party (SWP) George Lagong (Pelagus).

Kelimpah ari 10 ADUN nya, TERAS mega bisi dua Kaban Parlimen (MP), Anyi Ngau (Baram) enggau Mawan (Saratok).

Ke semua sida tu ningkilka diri ari parti laban madahka pemutus nya digaga ngambika nadai betapi enggau sebarang penyarut ke benung nyadi dalam SUPP enggau SPDP diatu.-BP