Perintah BN deka terus meri pemansang ba DUN Semop

BINTANGOR: Kaban Kunsil Nengeri (ADUN) Semop Abdullah Saidol chakah deka nyikap pemansang menua nya enggau projek jalai alun, karan enggau ai beresi.

Iya madah, pengeransing iya nya bepun ari perintah nengeri tu enda belampung ati mubuhka projek pemansang ba menua pesisir nyengkaum sitak Kunsil Nengeri (DUN) Semop ketegal pemujur Barisan Nasional (BN) ngelama tu endang ari sukung rayat menua pesisir.

“Kepala Menteri empu bebendar ngansak bala pengari rayat ngambika chakah tauka ransing nyidi penanggul ke ditapi rayat ba menua pesisir.

“Nya alai, kami (pengari rayat) deka berani bejaku ngagai perintah besai ngambika bulih bantu dikena numbuhka pemansang ba menua pesisir,” pia ku iya madah.

Abdullah mantaika jaku tu maya ngulu Pengerami Ngiling Bidai ba Rumah Peter Minggat, Sungai Mupong Ulin ditu kena hari Enam minggu seiti nyin tadi.

Sama bela bisi datai nyempulang iya maya tu iya nya bini iya Nora Ashikin Ibrahim Sapit Residen (Program Pemansang) Sarikei Badjuri Bidin, Sapit Chairman Parti Pesaka Bumiputera Bersatu (PBB) Pampang Meradong Morsili Bakar, Sapit Chairman PBB Pampang Semop Kaunsilor Tuai Rumah Nicholas Abu Seman, Ketuai Raban Nembiak PBB Pampang Meradong Kaunsilor Helmi Morsili, Kaunsilor Nick Penghulu Augustine Pau sereta bala ke bukai.

Nambahka nya, ku Abdullah ti mega Ketuai Sekretari ngagai Kepala Menteri, perintah nengeri tu mega enggau naka alah nyaga ati rayat menua pesisir ngambika enda ringgat semina ketegal pekara mit lebih agi ba pekara bepintaka projek.

Berindik ari nya, iya madah, sida naka alah mutarka nama-nama penanggul ke bisi ditapi rayat nyengkaum rayat ba rumah panjai.

Kelimpah ari nya, ku iya, bala kaunsilor enggau tuai rumah ngembuan tanggung pengawa matau pemujur pejalai projek perintah ke bisi ditumbuhka ba menua sida.

Abdullah madah, ngelama tu bisi sekeda projek ke digaga ba menua pesisir enda nitihka stindit ke patut ngujungka rayat napi penusah bukai.

“Tanggung pengawa tuai rumah iya nya meda sereta matau projek perintah ke diberi ngagai menua sida.

“Enti bisi penanggul ba projek nya bai ngagai opis ti bekaul tauka padah ngagai kaunsilor ngambika penanggul nya ulih dipansik nama kebuah tau nyadi,” pia ku iya madah.

Berebak enggau tu mega, Abdullah madahka diri deka berandau enggau opis ti bekaul senentang peminta peranak ba Rumah Peter Minggat ke minta digagaka jalai alun penyauh empat kilometer ari Jalai Tanjung Manis/Sibu ngelawa rumah panjai sida.

“Aku deka berandau enggau Opis Residen minta Opis Kereja Raya (JKR) matau menua tu ngambika kitai ulih minta projek jalai tu digaga.

“Nyema enda besai tauka enda dibelangkin nadai salah jalai tu disimen dulu asal aja ulih ditengah,” pia ku iya madahka baru.

Dulu agi ari nya, Abdullah enggau bala raban ke bukai bisi ngabang ngagai pengerami ke sebaka ba Rumah Seli Judi, Sungai Mupong lalu ke penudi ngabang ngagai Rumah Anggi Enggol, Nanga Bangkit, Bintangor. -BP