Program Pemansang Raban Nembiak nyaup ngenegapka gerempung nembiak: Mawan

LUNDU: Program Pemansang Raban Nembiak ti komprehensif agi sereta setipak enggau arus moden enggau pemansang diatu, ulih kena ngenegapka gerempung raban nembiak.

Menteri Pemansang Rama Tan Sri Datuk Sri William Mawan Ikom madahka program nya dipejalaika ari dibaruh opis menteri iya.

“Tuju Program Pemansang Raban Nembiak tu ukai semina kena nyeliah sereta mutarka penyalah rama aja tang mega dikena ngemansangka intelektual, kompetensi rama, pengulih kognitif enggau nempa penaluk ngagai menua.

“Nambahka nya mega dikena nempa raban pemesai ti dikearapka ngiring menua jemah ila ti kreatif, inovatif sereta ngembuan juluk ati.

“Nya alai ngambika juluk program tu ulih dijapai, pemesai gerempung raban nembiak ti nyadi kaban tauka ejen rama ari perintah patut ulih berati sereta beratka ubah kemaya hari tu ngambika ulih matak raban nembiak nyereta program ti diatur,” ku iya.

Mawan mansutka pekara tu dalam jaku pengelalu pengerami Hari Belia Negeri Sarawak 2014 ti diatur Opis Menteri iya di Kompleks Lumba enggau Main Pelilih Mit Lundu ditu kemari.

Pengerami ti ngena rambai leka jaku ‘Dari Belia Untuk Belia’ udah dipenyadi Kepala Menteri Tan Sri Datuk Amar Adenan Satem.

Ngenang pasal pengerami nya, Mawan madahka nya dikena meri terima kasih ngagai raban nembiak ti mayuh udah mantu perintah ngatur sereta ngemansangka nengeri tu.

Raban nembiak reta ti pemadu beguna dalam pemansang menua, ku iya.

“Raban nembiak ti nyadi dikearapka nampung sereta ngelangkar pemansang menua jemah ila, sida enda tau enda ditegap sereta disikap ngena mayuh macham penemu enggau pengelandik ngambika ulih nampung pemansang menua ke ditinggalka rebak ke dulu ngagai nembiak rebak baru enggau dudi,” ku iya.

Nyerumba pengerami Hari Belia Negeri Sarawak 2014, Opis Menteri Pemansang Rama bisi meri semilan bengkah Gelar Ikon Belia Negeri Sarawak.

Semilan bengkah gelar nya, Gelar Ikon Belia Kesenian (Stanley Meringai David Impi); Gelar Ikon Belia Sukarelawan (Sulhie Salleh); Gelar Ikon Belia Sukan (Audrey Nu Alexander Mula); Gelar Ikon Belia Usahawan (Mohammad Hafidz Rahani); Gelar Ikon Belia Inovasi (Ahmad Zaiwin Mohd Kassim).

Gelar Jasa Belia Wira (ASP Yeoh Chun Syan); Gelar Ikon Belia Istimewa (OKU) (Lumba enggau Main)(Batricia Richeal Sentau); Gelar Ikon Belia Istimewa (OKU) (Kesenian) (Shamri Hamdan) enggau Gelar Jasa Persatuan Belia ke dimenang Pertubuhan Belia Kebangsaan Bersatu Sarawak (SABERKAS).

Sama bisi datai ngulu pengerami nya kemari, bini Adenan, Puan Sri Datuk Jamilah Anu, Menteri Muda Pemansang Nembiak (Menua Pesisir) Datuk Dr Stephen Rundi, Sapit Menteri Dalam Negeri Datuk Dr. Wan Junaidi Tuanku Jaafar enggau bala ke bukai.