Menteri Muda Pemansang Menua Pesisir enggau Pengawa Berumah Datuk Francis Harden Hollis madah, lebuh raban nembiak nyereta gerempung sida tentu ulih ngisi maya lepa enggau pekara ke beguna sereta tetemuka pekara baru.
“Nama utai ke dipeda kitai, tu mega chara dikena nyeliahka sida nembiak ari ngereja pengawa ke nadai menuku,” ku iya.
Iya madah munyi nya rambau nutup Pekit Main Bol Keranjang Nembiak Umur 17 Taun Menua Sri Aman diatur Gerempung Main Bol Keranjang Menua Sri Aman bepalan ba Stadium Lau Ngee Mung ditu malam kemari.
Ku iya, raban nembiak ke nyereta mayuh bengkah gerempung ukai semina ulih nyeliah sida ari dituntung penanggul rama tang mega ulih nempa sida nyadi ketuai ungkup menua tu jemah ila.
Iya madah, raban nembiak patut nimbal peminta perintah ke ngasuh sida besaup enggau ketuai dalam ngaduka pemansang menua.
“Endang udah nyadi juluk perintah deka meda raban nembiak nyadi orang ke menyana lalu nyadi penganti bala ketuai diatu nampung agenda pemansang menua dudi hari ila.
“Nya alai, raban nembiak empu patut ngubah diri nyadi orang ke menyana ngagai menua setipak enggau pesan bala ketuai iya nya deka meda nembiak ke nyulut, pintar sereta jelai rita,”ku iya.
Sama bisi datai ba pengawa tu iya nya Chairman Gerempung Temenggong Sii Toh Peng, Kapitan Kuek Aik Seng, Kapitan Tay Siaw Chuan sereta kaban gerempung ke bukai.-BP
Raban nembiak patut nyereta mayuh aktiviti ke diatur gerempung
Reviewed by Unknown
on
June 30, 2014
Rating:
No comments: