Polis Sarawak ukai semina ngemeratka pengelikun pejalai tang reta tengkira

KUCHING: Pengelikun penumpang bot ekspres entara sebengkah pekara ti dikemerat dalam OP Selamat 5/2014 rambau pengerami Hari Raya ke deka datai tu.

Pemangku Sapit Kepala Polis Sarawak SAC Datu Dr. Chai Kin Chung madah, raban polis marin deka meresa semua bot ekspres ke ngundan penumpang sepemanjai timpuh kimpin.

“Maya OP Selamat serak tu, Sarawak nambahka sebengkah pekara ti dikemerat kelimpah ari pengelikun pejalai, kitai nambah pengelikun reta tengkira tauka rumah ke ditinggal maya kimpin tu.

“Kitai udah ngenukuka sebengkah sistem ke engkeman, ke alai pengelikun penumpang bot ekspres deka dikemeratka.

“Pengudah penusah ke nuntung bot ekspres dua taun suba, kitai enggai penusah ke sama nyadi sekali agi lalu bengkah pekara tu dituku nitihka pematut,” ku iya.

Iya mansutka jaku tu ba sebengkah aum pengarang berita pengudah bejadika OP Selamat 5/2014 sepengelama 15 hari berengkah diterit kemari (21 Julai) nyentuk 4 Ogos tu ila, di Emart Matang ditu.

Chai nambah, raban penerit adat mega deka meresa tiap terminal bot ekspres diserata nengeri dikena nentuka nadai sebuah bot ekspres pan ditemu mai penumpang lebih ari pematut.

Ku iya, semilan terminal deka dikemata enggau terit iya nya di Bintawa (Kuching), Sibu, Kanowit, Song, Bintulu, Kapit, Tanjung Manis enggau dua terminal di Sarikei.

Ngenang kaul ke sama, iya mega madah, 977 raban polis trafik deka ngemata pengelanchar sereta pengelikun di jalai alun rambau kimpin dipejalai.

“Kelimpah ari nya kitai bisi beribu raban polis di serata nengeri ti deka nyaup ngemujur kimpin tu ke alai sida deka matau 31 jalai besai.

“Pengelikun reta enggau rumah ke ditinggal mega deka dikemerat lalu mensia mayuh ti deka mindah diperansang ngisi pom di balai polis ke besemak ngambika polis ulih suah agi matau rumah sida sepemanjai timpuh pemisi,” ku iya.

Dulu ari nya, berebak enggau jaku bejadika kimpin nya kemari, Chai netapka Opis Polis Sarawak nagit tikas kes bebadi di jalai alun semina 5 peratus aja rambau kimpin OP Selamat 5/2014 tu.

“OP dipenyadi enggau tuju nerenak pemereti mensia mayuh senentang guna ngintu pengelikun di jalai alun sereta nemu bansa adat ke diterit dalam timpuh operasyen.

“Kerejasama ari mensia mayuh ditagih ngambika kimpin kitai rambau pengerami Hari Raya tu ulih nyapai juluk ke ditetap,” ku iya.

Bela datai Datuk Bandar Dewan Bandaraya Kuching Utara (DBKU) Datu Abang Abdul Wahap Abang Julai.-BP