Naroden ngelalau peranak sitak Simunjan bekelimat ngena ai .

KUCHING: Peranak menua di sitak Simunjan dilalau landik bekelimat ngena ai lebih agi maya kemarau baka ke diatu.

Kaban Kunsil Nengeri (ADUN) Simunjan Datuk Naroden Majais ke bisi ngelawa sitak nya, meda ngena mata diri empu penusah ke ditapi peranak Simunjan kenyau bulan Julai tu tadi madah, penyuntuk ai ti ditapi rayat di sitak nya diatu udah mupuk manah sereta teputar.

Kemarau tu dijangka deka ngerampit datai ngagai pun bulan Setember tu ila, lalu ba sitak ke udah bisi ai paip, Naroden ngelalau mensia mayuh ke diau dia madah, bekal ai deka dibuka belabuh ari pukul 6 pagi ngagai 9 pagi sereta ari pukul 5 lemai ngagai 9 malam ninting hari.

Ku iya, naka ke diatu ai di Simunjan dijangka chukup tang beratika musin kemarau agi panjai sereta bekal ai chukup kena 3 bulan udah tu ila, pengawa bekelimat sereta nyimpan ai patut diatur sereta dipejalaika diatu.

Berebak enggau nya, pengawa nyadung ai dipejalaika nengah opis Pelilih Mit Menua sereta dibantu Tuai Rumah kelimpah ari Nembiak PBB Simunjan mantu magi ai ngagai mensia mayuh ke betapi enggau penyuntuk ai.

“Naka ke diatu, nadai sebarang penanggul belaya ketegal ai baka ke kala nyadi taun siti nyin suba,” ku Naroden madah maya aum media nyerumba pengawa ngabang Hari Raya di rumah iya empu di Demak Height ditu Hari Minggu tu tadi.

Kena nentuka ai nya dibagi sama rata, semua luri begumpul dulu di palan ngengkah kerita di balai polis ditu ke alai luri nya deka diberi tag genturung pendiau endur ai nya dianjung.

Naroden ti mega Menteri Muda di Opis Kepala Menteri (Pemansang Pengawa Dagang Bumiputera) madah, ari bulan nyin tadi. Opis Kereja Raya (JKR) udah minta 15 buah luri nganjung ai ke Simunjan sereta sitak bukai ke besemak enggau nya.

“Diatu gaya penyuntuk ai udah teputar, semina utai ke ngasuh irau iya nya nangika kemarau tu panjai ngelui tiga bulan ti deka datai tu ila. Enti nadai ujan dalam 3 bulan, nyangka besai agi penanggul tu. Ukai semina sitak menua alai aku aja nadai ai, di Kuching pan deka betapi enggau penanggul ke sama,” ku iya ke kala ngelawa Simunjan dalam kandang 3 hari tu ke udah.

Iya nandu, pegirau ati iya mega nyengkaum enam buah genturung pendiau seberai Batang Sadong – Kpg Samsu, Kpg Sateman, Kpg Sabang, Kpg Sg Ba, Lubok Bunting, Lubok Punggor enggau Kpg Benat ke agi bepanggai ba ai ujan enggau sungai.

Ba sitak nya, bisi urung 1,600 iku pengundi ari enam buah genturung pendiau. Naroden madah iya deka ngasuh JKR nganjung ai ngagai enam genturung pendiau nya.

“Ngenang musin kemarau ti agi panjai, dijangka datai ba bulan September tu ila, aku minta rayat ditu besabar lalu ngena barang naka pemisi sida iya enggau bekelimat.

“Perintah beratika penusah ke ditapi rayat. Penanggul bansa tu ukai pekara disadang mensia. Di menua bukai pan sama betapi enggau penanggul, balat agi ari nya, baka Selangor,” ku iya.-BP