Asil Randau Perintah Nengeri Enggau Petronas Sentang Tiki Royalti Minyak Dipadah Maya Aum DUN Tu: Adenan

KOTA SAMARAHAN: Asil randau entara Perintah Negeri Sarawak enggau Petronas senentang pinta nikika royalti minyak ngagai 20 peratus mandangka asil ke positif lalu deka dibantaika ba Aum Dewan Undangan Negeri (DUN) ba bulan November tu, ku Kepala Menteri Datuk Patinggi Tan Sri Adenan Satem.

“Diatu kitai keran deka nentuka Sarawak ngembuan mayuh belanja. Enti suba kitai semina diberi royalti minyak 5 peratus aja, diatu kitai minta 20 peratus iya nya nambah empat kali lipat.

“Kitai deka ngambi bagi ba pengawa dagang minyak lalu enggai semina meda aja baka ke udah. Kitai deka nyadi penyereta, nambahka nya minyak enggau gis dipansutka di nengeri tu.

“Aku ngarika perintah nengeri udah berunding enggau Petronas ngambika penyampau royalti minyak ditiki ari 5 ngagagi 20 peratus. Petronas udah setuju lalu penerang senentang pekara tu deka dibantai ba Aum DUN bulan November tu,” ku iya.

Adenan mansutka jaku tu ba pengerami Ketuai Begulai enggau Rayat Pelilih Samarahan ke diatur di Dewan Suarah Kota Samarahan ditu, kemari.

Iya ke mega Menteri Pekara Wang enggau Menteri Pengatur Pengeraja Asal madah, belanja ari royalti nya ila deka dikena ngeransingka agi atur pemansang di menua pesisir.

Ku iya, kitai deka meda Sarawak nyadi sebuah nengeri pemadu mansang dalam Malaysia ke alai tiap iku peranak nengeri tu ngembuan pengelandik ba mayuh bengkah pengawa.

“Perintah nengeri angkun ngemansang urung 5,000 buah kandang menua pesisir di serata nengeri nengah Bajet 2015 sereta ba Atur Pemansang Malaysia Lumpar Ke-11 (RMK11).

“Kitai ngemeratka pemansang menua pesisir. Enti kitai ngira tebal agi orang ke miskin diau di menua pesisir lalu sida udah nyadi penyukung kitai ngelamatu,’ku iya.

Kelimpah ari nya, polisi perintah Sarawak diatu ku Adenan, deka ngemeratka pengawa ngurangka tikas makai enggau nerima suap.

Iya madahka diri udah nesau 1,500 iku orang gawa perintah ngambika datai ngulu kos integriti.

“Kitai enggai meda Sarawak nempa nama buruk ketegal penyalah tu. Juluk tu engka enda ulih dijapai dalam timpuh setaun tang kitai deka belelubah ngurangka tikas kes.

Ba pengerami nya, iya mega netapka perintah enda agi ngeluarka lisin batang lalu deka nambahka penyampau kampung galau ari ke dikemisi diatu.

“Kitai patut ngemeratka pemaik enggau pengelantang rayat, sida udah meri kuasa lalu seagi aku ba penuduk tu, pekara nya tetap deka dikemerat ari pekara bukai,” ku iya.-BP