Bajet 2015: KM Ngarapka S’wak Bulih Mayuh Ungkup

Agih belanja tu dikena bejalaika atur pemansang ungkup rayat nengeri tu lebih agi sida ke diau di menua pesisir

KUCHING: Bajet Perintah Besai 2015 ti deka dibantai kena 10 Oktober (Hari Lima) tu ila, dikearap bisi meri mayuh agi ungkup dikena ngaduka pemansang ba kandang menua pesisir di Sarawak.

Kepala Menteri Datuk Patinggi Tan Sri Adenan Satem madah dikearapka Bajet Perintah Besai 2015 setipak enggau pemesai nengeri Sarawak kelebih agi dalam ngaduka pemansang menua pesisir.

“Ngarapka iya (Bajet 2015) setipak ungkup Sarawak kelebih agi dalam ngemansangka menua pesisir,” ku Adenan madah lebuh dikerandau pengudah bejadika ‘Majlis Ibadah Qurban 1435 Bersama YAB Ketua Menteri’ di laman Opis Indu Yayasan Sarawak di Jalai Sultan Tengah ditu, kemari.

Mulaika pengingat Bajet 2014 tu tadi, entara pekara ti bisi dibantaika dalam Bajet Perintah Besai 2014 ti bisi nyengkaum Sarawak, iya nya projek Agropolitan enggau industri minyak sawit deka digaga di sitak Koridor Pemansang Sabah, Samalaju Industrial Park enggau Hab ‘Halal’ di sitak Koridor Kuasa Ulih Dikena Baru (SCORE).

Kelimpah ari nya, Padang Bilun Miri, Sibu enggau Mukah deka digaga manah agi nengah ungkup ari RM312 juta, ngemansangka akses internet di Sabah enggau Sarawak, kabel baruh tasik deka digaga dalam kandang tiga taun enggau ungkup RM850 juta, ungkup RM331 juta kena program rega ke sebaka enggau sabsidi nyengkaum kos pengangkut di Sabah enggau Sarawak enggau sekeda pemansang bukai.

Dalam pekara Royalti Minyak 20 peratus ku Adenan, pekara nya tetap dipajakka lalu benung diperunding enggau Perintah Besai.

Pekara bekait enggau Royalti Minyak udah dibantai maya Aum Kunsil Nengeri ke-17 dalam kandang entara 5 Mei-10 Mei taun tu tadi, ulih bala Kaban Kunsil Nengeri menua tu, ke sama disukung ulih kededua piak Perintah Barisan Nsional (BN) enggau raban penyakal.

Maya penemuai Sapit Menteri Besai Tan Sri Muhyiddin Yassin bedau lama tu tadi, pekara Royalti Minyak mega bisi dikenang baru.

Maya nya ku Muhyiddin, atur positif deka dipejurai enggau silik agi lalu beratika BN enda berasai lebu ketegal isu tu.

Seiti ari pekara ke udah digaga dalam kaandang nya, iya nya licha ti udah digaga enggau Perintah Nengeri ulih Petronas dalam timpuh berapa bulan tu ke udah, bekait enggau penguntung sereta operasyen Petronas.

Kelimpah ari nya, Adenan mega madahka dalam bulan November tu ila, Perintah Nengeri Sarawak mega deka mantaika Bajet Menua Sarawak 2015 lalu pekara ke sebaka mega, iya nya pemerat dalam ngemansangka menua pesisir.

Ba atur pengawa ‘Majlis Ibadah Qurban 1435 Bersama YAB Ketua Menteri’, sama digulu ulih Menteri Muda Pengawa Berumah Datuk Abdul Karim Rahman Hamzah, Menteri Muda Pengawa Industri (Promosyen enggau Puku) Datuk Julaihi Narawi enggau Direktor Yayasan Sarawak Dato Abu Bakar Marzuki.

Atur pengawa nyayat tujuh iku chapi belabuh ari pukul 10.30 pagi kemari, ti digaga keterubah iya begempung enggau dua buah surau ari Opis Kepala Menteri Wisma Bapa Malaysia, Surau Ar-Rahman enggau surau Yayasan Sarawak, Ar-Hidayah.

Nangkan nya, dagin chapi Hari Raya Qurban dibagi ngagai urung 500 pengereja pengawa ari kededua bengkah opis nya, anak patu balu Peryatim enggau mensia mayuh ke diau di sitak Semariang.-BP