Opis Menteri Pengeraja Asal enggau Rampa Menua ngarap bulih ungkup besai ari Bajet

KUCHING: Opis Menteri Pengeraja Asal enggau Rampa Menua ngarapka mayuh agi belanja diungkupka ngagai opis menteri nya dalam Bajet 2015 ti deka dibantaika Menteri Besai kena 10 Oktober tu ngambika bisi dikena bejalaika projek nagang penusah bah di serata menua tu.

Sapit Menteri Pengeraja Asal enggau Rampa Menua Datuk Sri Dr James Dawos Mamit madah, ngambika mayuh agi projek penagang penusah bah ulih dipejalaika dikena ngurangka penanggul nya.

“Opis menteri kami udah minta ngambika mayuh agi ungkup belanja dikena bejalaika projek nya  laban diatu penusah bah di menua kitai majak nyadi sereta nambah berindik ari gaya hari ti berubah.

“Enti dibandingka enggau urung taun 60 suba, diatu penyampau ujan di menua kitai niki lebih 30 peratus lalu di Sarawak ba Pelilih Kuching enggau Kota Samarahan bisi 40 peratus.

“Opis menteri kami udah nganjung mayuh lis projek penagang bah di Sarawak lebih agi Kuching, projek tu dipejalaika sempemanjai 8 kilometer ari Kuching ke Santubong. Ba taun 2011 enggau 2012 sepenyampau RM200 juta udah diungkup tang semina dua kilometer udah tembu,” ku iya seraya madahka opis menteri iya ba taun 2014 udah diungkupka lebih RM2 billion tang ungkup projek penagang bah lebih RM600 juta.

Dawos ti mega Kaban Parlimen Mambong mansutka pekara nya dalam aum pengarang berita lebuh dipinta ngenang pekara bekaul enggau Bajet 2015 ti deka dibantaika Menteri Besai kena 10 Oktober tu ti dipelabaka berengkah ari pukul 4.00 ngagai 6.00 lemai.

Dulu ari nya iya nyerahka kunci rumah baru ngagai Benson Bade ba ‘Majlis Penyerahan Kunci Perojek Pembinaan Semula Rumah Terbakar Di Bawah Program NBOS7 Jabatan Bomba dan Penyelamat Malaysia Negeri Sarawak’, ti diatur ba Kampung Sg. Duuh Siburan ditu, ensana.

Ngenang projek ti dipejalaika ejensi tauka opis perintah di menua tu lebih agi ba sitak ke dipegai iya, Dawos madahka diri enda lantang ati laban mayuh projek pemansang ti patut digaga bedau diipejalaika.

Iya madah, projek pemansang nya udah dikemendarka ‘Kementerian Kemajuan Luar Bandar dan Wilayah’ (KKLW) sereta udah  diserah ngagai opis pelilih menua ngambika ngatur sereta ngiga konteriktor ke patut bejalaika projek nya.

“KKLW udah meri ungkup belanja ngagai opis pelilih menua ngambika projek pemansang ke disemaya dipejalaika ke pengelantang rayat. Bisi sebuah jematan bedau digaga tang ripot ngagai KKLW madahka udah digaga.

“Aku enda lantang ati ngagai pengawa ti dipejalaika ejensi ke milih konteriktor ti enda bejalaika tanggungpengawa enggau manah, laban mayuh projek enda tembu.

“Taun 2012 menteri KKLW maya nemuai seraya bejalaika pengawa ba Kampung Git, bisi 14 buah rumah patut dikemanahka ti lalu dikemendarka iya kemaya nya tang lalu enda digaga,” ku iya.

Sama datai ba pengerami nya, Direktor JBPM Negeri Sarawak PKPJB Nor Hisham Mohammad enggau ke bukai.

-BP