Peranak Sg Lengan, Ng Singat Nerima Abu Seman

SIBU: Peranak Sungai Lengan enggau Nanga Singat berasai lantang ati ba penemuai Sekretari Politik Kepala Menteri Abu Seman Jahwie ngagai rumah panjai sida, kena Hari Minggu tu tadi.

Tuju penemuai tu dikena meretika atur pemansang pemansang ke patut dipejalai sereta penanggul ke ditapi rayat di menua nya.

Keterubah, iya niki Rumah Francis Kiai di Nanga Singat lalu ditangkan ba Rumah Guang, Nanga Sungai Lengan, Rumah Igat enggau Rumah Jingga ke mega ba Sungai Lengan.

Penatai iya disambut rayat ba menua nya enggau ati ti gaga laban ke endang dianti sebedau tu ketegal deka mantaika sebana enggau penusah ke ditapi sida lebih agi bekaul enggau pemansang menua.

Penyanding Penemu Protem Komiti Pemansang Sungai Lengan David Majang maya ngarika sida semenua meri besai terima kasih ngagai penatai Abu Seman taja ukai pengari rayat ke megai sitak Kunsil Nengeri dia.

“Kitai berasai gaga ati sereta beterima kasih ngagai iya laban tu mandangka iya chakah deka nemu enggau silik ni bagi penusah ke ditapi kitai di menua tu,” ku iya maya madah ngagai pengarang berita.

Maya meri jaku pengelalu ba gintir Abu Seman niki Rumah Jinga, Chairman Protem Komiti Pemansang Sungai Lengan, Robert Jinga madahka diri bela temegah ati enggau penatai Abu Seman ngagai menua sida.

Ku iya, sebedau tu sida kala mantaika sebana diri nengah surat berita ketegal beberapa iti projek pemansang ke kala diperambu diberi ngagai menua sida empai kala berengkah digaga.

“Tang sehari tu (hari Minggu tadi) Abu Seman ti mega Kaban Kunsil Nengeri (ADUN) Jemoreng ngarika perintah kitai datai deka nentuka pengamat nama ke diasai kitai.

“Tu mandangka Barisan Nasional (BN) beamat-amat deka mutarka penusah rayat,” pia ku iya madah.

Robert mega maya tu mai sida ba menua nya anang kiruh beterabaika penyakal mantaika sebana bekaul enggau pemansang laban penyakal ku iya enda ulih meri pemansang ngagai rayat.

“Anang bechunto sida ke nyukung penyakal ba kandang mengeri laban sida udah silik diberi pemansang.

“Tang kitai ba menua pesisir mengkang ngandalka perintah BN ngangkat pengidup ari chara meri pemansang lebih agi baka jalai alun, karan enggau bekal ai beresi,” ku iya madahka baru.

Kelimpah ari nya, Robert mega maya tu bisi nyebut tuju komiti sida ditumbuh.

Ku iya, komiti tu ti mega disempulang bala tuai rumah menua nya deka nengkebang ideologi baru ti lebih ngenyemakka agi rayat enggau politik.

Tu ku iya ngambika sida semenua enda tinggal ari program pemansang perintah ke endang udah mayuh disedia ungkup rayat.

“Kitai nadai tuju bukai tang semina enggai jauh ari tinggal pemansang perintah,” pia ku iya sambil madah komiti sida mega deka mai mayuh agi rebak baru ngerijister nyadi pengundi.

Berebak enggau pengawa sehari nya, Robert ngarika komiti sida nyuaka surat ke dituju ngagai Kepala Menteri ngasuh ngabas sida ba menua nya ngagai Abu Seman.-BP