GST Enda Nating Pengidup Peranak Menua Pesisir

KANOWIT: Peranak menua pesisir enda ibuh nangi senentang pengawa deka ngatur Chukai Barang enggau Servis (GST) ba menua tu, pia ku Sapit Menteri Pemansang Menua Pesisir enggau Kandang Menua Datuk Alexander Nanta Linggi.

Ku iya, perintah Barisan Nasional (BN) enda ngatur GST ketegal deka nating pengidup rayat lebih agi rayat menua pesisir.

“Pengidup rayat ba menua pesisir enda dikeruga GST laban penatai pemisi sida enda ari baruh atur chukai.

“Nambahka nya, perintah mega udah ngerintaika enda kurang ari 900 bansa barang ti enda dirintai ba GST,” pia ku iya madah maya nemuai ngagai Rumah Sao Asing di Nanga Sedabai, Sungai Poi ditu, kilah ensana.

Dulu agi ari nya, Nanta disempulang Kaban Parlimen Kanowit Datuk Aaron Ago Dagang enggau Kaban Kunsil Nengeri Ngemah Alexander Vincent nemuai ngagai palan projek Jalai Nanga Poi-Nanga Ngungun.

Nanta ti mega Kaban Parlimen Kapit madah, sida ke patut mayar chukai enda ulih ngelarika diri agi enti GST udah belabuh dikena berengkah 1 April taun ti deka datai.

Nya alai, iya ngarapka rayat ba menua pesisir anang tepawah runding nyema raban penyakal ngena isu nya maya pengawa bepilih nengeri ila.

Ngenang projek Jalai Nanga Poi-Nanga-Ngungun, iya madah, naka ke diatu projek nya udah 88 peratus tembu.

“Projek tu nyengkaum ngaga jematan Sungai Poi, Sungai Dang, Sungai Dap enggau Sungai Buloh.

“Kebendar iya projek tu laun 10 peratus tembu nitihka pelin. Konteriktor ke megai pengawa ngaga projek tu madah deka tembu ujung taun tu.

“Kami mega udah ngelalau konteriktor ngambika sida chakah agi ngereja pengawa lalu tembu nitihka pelin sebedau tu,” pia ku iya madahka baru.-BP