SUPP Deka Numbuhka Baru Pampang Parti -Sim

SIBU: Presiden Parti Bersatu Rakyat Sarawak (SUPP) Senator Datuk Profesor Dr Sim Kui Hian besemaya deka begempung enggau raban parti ditu numbuhka baru lima iti pampang di Sibu kenyau penyarut ke nyadi ba parti nya tiga taun ke udah ti ngujungka parti pambar ngagai dua piak.
 

Maya ke bejaku ba Pengerami Raban Nembiak SUPP Sibu ba sebengkah restoran ditu malam hari Minggu tu tadi, iya madah, penyarut nya udah datai ba pengujung lalu udah maya iya numbuh baru parti nya ke nyadi sebengkah parti komponen Barisan Nasional (BN) ke pemadu tuai ba nengeri tu.

Sim mega minta semua raban parti ngetanka kaul enggau pangan diri.

“Enti kita (raban SUPP Sibu) enda ngelawa aku, aku deka ngelawa kita lalu aku ukai datai deka madah nama patut digaga.

“Aku datai laban deka meri kerejasama ngagai kita ba tuju deka mai raban nembiak di Sibu ditu besaup ngeringka parti,” pia ku iya madah.

Iya mega madah, SUPP deka chakah ngiga mayuh agi raban parti ari raban nembiak ti profesyenal.

“Aku deka suah agi begulai enggau kita di Sibu ditu. Kitai enda kediri laban SUPP Sibu enda labuh laban ditu meh pampang parti ti keterubah iya ditumbuh kenyau ari 55 taun ke udah,” ku iya madahka baru.

Sim madah, lima iti pampang baru deka ditumbuh iya nya Pampang Dudong, Bukit Assek, Pelawan, Nangka enggau Bawang Assan.

“Bala raban SUPP deka gawaka parti enggau rayat tang ukai gawa ketegal pemesai parti.

“Laban kitai ke nyadi parti ke pemadu tuai ba nengeri tu, kitai meseti ngembuan chara baru enggau orang baru megai parti,” pia ku iya.

Bela bisi datai maya tu iya nya Chairman SUPP Sibu Chieng Buong Toon, Ketuai Raban Nembiak SUPP Sibu Michael Tiang kelimpah digulu lebih kurang 100 iku raban Nembiak SUPP Sibu.-BP