‘Beyond 1AZAM’ Ila Dikearap Ulih Mansutka 150 KIR Ari Penyeranta

KUCHING: ‘Beyond 1AZAM’ deka ditumbuh sereta berengkah dipejalaika dalam taun 2015 kena mantu 150 Ketuai Ruang Bilik (KIR) ari baruh Program 1AZAM ngambika mujur pansut ari garis penyeranta.

Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah madah, opis menteri iya ti diberi tanggungpegawa bekaul enggau e-Kasih nengah program 1AZAM semina matau.

Iya madahka raban ke dibantu nengah inisiatif baru nya deka dibantu ejensi pekara belanja bukai.

“Taun baru, kami nagit 150 KIR dibantu nengah inisiatif Beyond 1AZAM. Beyond 1AZAM tu sebengkah inisiatif baru dikena mantu pesereta 1AZAM ke udah bisi sereta udah mujur dalam aktiviti sida awakka ulih ngagai tikas ti lebih tinggi agi.

“Sida deka diberi lalau enggau latih lanjut agi, akses pengawa dagang, mai sida ngagai ejensi ke meri pinjau baka bantu mikro-kredit sereta bantu ke bukai ke patut awakka pesereta (150 KIR) nya ulih ngerembaika aktiviti nambahka ekonomi sida.

“Sida ti nyereta Beyond 1AZAM enda agi nerima bantuan (program 1AZAM) laban sida udah pansut ari garis penyeranta tang sida deka dibantu ejensi kewangan baka TEKUN enggau kebukai, taja pia sida deka terus dipatau,” ku iya.

Fatimah mansutka pekara nya dalam aum pengarang berita pengudah nyadi chairman Mesyuarat Focus Group Pembasmian Kemiskinan Peringkat Negeri Sarawak Bil.5/2014 ti diatur ba Bilik Gerakan Negeri, Tingkat 2, Wisma Bapa Malaysia ditu, ngalih hari kemari.

Nambahka nya iya madahka opis menteri iya ti diberi tanggungpengawa program munaska penyeranta enggau pengelantang rayat negeri Sarawak nengah Program 1AZAM diberi tagit mantu 5,000 KIR dalam lis e-kasih negeri tu.

“Program 1AZAM ungkup taun 2015 kami nagit 5,000 KIR nerima bantu 1AZAM.

“Dalam taun 2014 kami nagit mantu 7,500 iku pesereta nyereta program 1AZAM tang kami mujur mantu ngelui ari penyampau nya iya nya 7,584 iku pesereta Sarawak tauka 101.12 peratus,” ku iya seraya madahka nya Prestasi NKPI 1AZAM KKWPK keterubah.

Bejaku baru iya madah, Prestasi NKPI 1AZAM kedua iya nya nagit 3,000 pesereta 1AZAM ulih nyungkak penatai pemisi ambis kurang RM300 enda ngira timpuh tiga bulan.

Ari penyampau ke ditagit (3,000 pesereta) semina 1,920 iku pesereta tauka 64 peratus ti mujur nambahka penatai pemisi abis kurang RM300 dalam timpuh tiga bulan, ku iya.

“NKPI 3 kami iya nya nagit 7,500 pesereta 1AZAM masuk Program Financial Literacy tang semina 4,387 pesereta ti mujur nyereta program,” ku iya.

Kelimpah ari nya Fatimah madah, status penyereta pemadu baru dalam sistem e-kasih iya nya angka 30 November 2014 di Sarawak iya nya 105,755 KIR.

“Ari penyampau nya (105,755 KIR) ke dipasuk dalam lis Miskin Tegar iya nya 25,204 KIR ti teulihka penatai pemisi RM600 sebulan, Miskin 33,617 KIR (RM920 sebulan), Mudah Miskin bisi 9,152 KIR ti teulihka penatai pemisi RM1,500 sebulan, lalu 37,782 KIR udah pansut ari garis penyeranta laban ti ulih nyungkakka penatai pemisi,” ku iya seraya madahka ke tuju pematau lis ke pansut ari penyeranta agi disengkaum dalam sistem e-Kasih.

Nyempulang Fatimah dalam aum pengarang berita kemari iya nya pengari Sekretari Mendam KKWPK Stanlee Kunchet enggau Ketua Penolong Pengarah Pegawai Pembanguan Negeru (SDO) Masnah Abang Abu Bakar.-BP