Kembuan Pengelandik Ba Pekara Teknikal: Adenan

Nembiak Sarawak diperansang ngembuan pengelandik teknikal ngambika muntang napi minta pengawa

KUCHING: Kuing nuju ekonomi ti bepelasarka pengawa industri begunaka mayuh raban orang ti ngembuan penau ba pengelandik teknikal.

Ketegal nya, Kepala Menteri Datuk Patinggi Tan Sri Adenan Satem ngansak peranak Sarawak lebih agi raban nembiak ngulihka penau enggau pengelandik teknikal.

“Aku enggai meda nembiak kitai diau bekerendut dada ba genturung pendiau enda ngereja seba-rang pengawa. Anang ngelusu…..!

“Aku deka meda semua sida ngulihka pengelandik ba palan pematih teknikal. Diatu, setipikit SPM enda chukup dikena ngulihka pengawa.

“Kitai patut ngembuan penau enggau pengelandik ba bidang teknikal ngambika muntang bulih pengawa,” ku iya.

Adenan mansutka jaku tu ba Pengerami Konvokesyen Keterubah Centre of Techinical Excellence Sarawak (CENTECS) di Dewan Yayasan Sarawak ditu, kemari.

Ku Adenan nambah, pengelandik ba bidang teknikal chukup diguna diatu sereta jemah ila ketegal pekara nya deka nentuka pemujur pengawa industri di nengeri tu.

Dikena nentuka nembiak nadai penanggul ngambi kos ba pekara teknikel, Adenan madah deka minta Palan Pematih Industri (ILP) di nengeri tu nendurka penerit atur masuk.

“Aku arap ILP ulih nendurka penerit atur masuk lalu nerima mayuh agi nembiak kitai ngulihka penau teknikal ke alai aku mega merambu numbuhka mayuh agi sekula teknik di Sarawak,” ku iya.

Ba pengerami nya, Adenan ngansak CENTECS nerima mayuh agi nembiak ngulihka pengelandik di palan nya.

Ku iya, kapasiti 500 iku nembiak ti ulih dilatih CENTECS patut disi lalu nya nyengkaum raban sida nembiak Indu.

Bisi 93 iku nembiak nerima setipikit ari Adenan rambau Pengerami Konvokesyen Keterubah Centre of Techinical Excellence Sarawak (CENTECS) keterubah nya kemari.

Bela datai Chairman CENTECS ke mega Sekretari Perintah Nengeri Tan Sri Datuk Amar Mohd Morshidi Abdul Ghani, Speaker DUN Datuk Seri Mohd Asfia Awang Nassar, Menteri Pemansang Rama Tan Sri William Mawan enggau Menteri Muda ba Opis Kepala Menteri (Pengatur Pemansang Pelajar Teknikal) Datu Len Talif Salleh.-BP