‘Sumpah Integriti’ Ngemegahka Semua Peranak Sarawak -Abdul Rahman

KUCHING: Atur pengawa ‘Sumpah Integriti’ ti diungkupka ngagai semua menteri kabinet nyengkaum ejensi bukai enggau Kelab Barisan Nasional Backbenchers (BNBBC) nyadi sebengkah rikod pemungkal di Sarawak enggau di Malaysia ke ngasuh semua rayat Sarawak temegah ati laban menua tu keteerubah ngepunka pengawa nya, ku Kaban Kunsil Nengeri (ADUN) Pantai Damai Dr. Abdul Rahman Junaidi.

Abdul Rahman madah, pekara ke berat ti digaga Kepala Menteri Datuk Patinggi Tan Sri Adenan Satem, iya nya nunda chunto integriti maya bejalaika Perintah Menua Sarawak, pekara ke berat dalam Aum Kunsil Nengeri sekali tu.

“Aku nyukung pengawa ke terit sereta berani ti digaga Kepala Menteri nya.

“Dalam timpuh setaun, YAB Kepala Menteri udah meri impak dalam timpuh ke panjai. Berindik ari tu, pengawa angkat Sumpah Integriti ti dipejalaika lalu nyadi rikod pemungkal di Sarawak, di Malaysia, kabinet menteri kena nyeliah pengawa makai suap.

“Nya pekara ke ngasuh kitai temegah ati, ulih semua rayat Sarawak laban menua tu menua keterubah bejalaika atur pengawa nya,” ku iya.

Abdul Rahman madah munyi nya lebuh mantaika debat iya bekaul enggau penerang Tuai Pemegai Menua (TYT) lebuh bejadika Aum Kunsil Nengeri (DUN) ke-17 minggu nyin tadi, maya Aum Kunsil Nengeri Hari ke-6 ba Dewan Kunsil Nengeri ditu, kemari.

Nangkan nya, iya madah, pengawa ‘gangster’ di nengeri, kedai nyual lumur judi ke enda berlisin nyengkaum kedai lumur ekor taja belisin tang ngemendarka orang Islam bejudi.

“Taja pan udah terang ditulis, ditampal ba dinding kedai nagang orang Islam meli tang sida tu agi meli, nya alai, kami minta perintah ngambi atur ke patut,” ku iya.

Nangkan nya, iya madah bisi rayat ari menua luar ke gawa di palan pemerindang di menua tu ke ngena pas sosial taja pan tu pekara biasa di serata menua Malaysia, di Sarawak. Kitai deka beratika pengawa nya dipunaska.

“Nangkan nya, pengawa besadungka pil Psychotropik balat endar nyadi kelebih agi ba bala nembiak di sekeda endur di negeri tu,” ku iya lalu nambah, semua sadang tu deka diberi iya ngaga ejensi ke bisi di menua tu.

Ba penutup debat Abdul Rahman kemari, iya minta bala Kaban Kunsil Nengeri ke ngena jaku diri (baka jaku Iban, Bidayuh sereta jaku bukai) dilalau nyalin jaku ti dikena sida iya ba DUN ngambika ulih ditemu tauka dibacha raban ADUN bukai nyengkaum pemberita.-UB