Lebih 2,000 Ruang Bilik Ngasaika Penguntung Ari Projek BELB Di Balai Ringin -Dr Rundi

KUCHING: Penyampau 20 projek bekal lekterik menua pesisir (BELB) udah tembu dipejalaika di sitak Balai Ringin sereta udah nguntungka 2,267 buah ruang bilik, ku Menteri Muda Perengka Guna Mensia Mayuh Datuk Dr Stephen Rundi.

Nambahka nya, Rundi mega madah, 452 buah rumah di Balai Ringin deka nerima bekal lekterik bulan November 2015 tu pengudah 3 projek ke benung dipejalaika diatu tembu maya nya ila.

“Pengawa bejalaika projek BELB deka dipajak nengah Atur Pemansang Malaysia Lumpar Ke-11 (RMK11) ke alai perintah merambu nyambung kandang endur ke datai jalai tang nadai bekal lekterik.

“Ungkup kandang endur ke nadai jalai, kitai berundingka sistem bukai ke tau nyendiaka bekal lekterik,” ku iya nyaut tanya kaban Kunsil Nengeri (ADUN) Balai Ringin Snowdan Lawan maya Aum Dewan Undangan Nengeri (DUN) kemari.

Sentang genturung pendiau ke bedau nerima bekal lekterik tang udah bisi tiang enggau kabel lekterik, opis menteri ngansak sida ngambi kunteriktor wayar ti dirijista ngadu sambung wayar ba rumah sida lalu ngenataika pinta kutak meter ngagai Sesco, tandu iya.

Nyaut tanya ADUN Piasau, Ling Sie Kiong sentang kebuah mengeri Miri suah putus bekal lekterik, Rundi madah dua penusah putus bekal lekterik ke nyadi bedau lama tu tadi ketegal kabel lekterik rusak dipansa pengawa kompeni ngerumbak tanah.

“Entara kebuah bukai iya nya ketegal pangka kilat. Urung 63 peratus penusah putus bekal lekterik nyadi ketegal sistem enda tetapika pinta bekal lekterik di kandang mengeri nya.

“Sesco diatu masang set 30MW ngambika tau nambah bekal lekterik di kandang mengeri Miri lalu pengawa nya disadang tembu bulan Jun 2015.

“Projek 11KV enggau 33KV udah mega tembu ba pengujung 2014 tu tadi lalu nambah bekal lekterik di Miri,” ku iya.

Rundi mega madah Sarawak Energy Berhad (SEB) nadai ngembuan polisi mayar pampas ngagai orang tauka kompeni ti bisi napi pengerugi ketegal putus bekal lekterik.

Taja pia ku iya, enti penusah putus bekal lekterik nya ngujungka sekeda perengka (industri tauka dalam rumah) rusak, sida tau ngaga ripot polis lalu nganjung ripot nya ngagai SEB ngambika tau dipansik, bayar pampas engka deka diberi enti pekara nya amat nyadi, tandu Rundi.-UB