Bida Penemu Politik Dikembuan Peranak Sarawak Ukai Nyerekang Penyerakup- Adenan

BAU: Taja bebida penemu dalam politik peranak Sarawak endang tetap ngembuan kaul ti rapit entara pupu raban bansa enti dibandingka enggau gaya peranak di Semenanjung Malaysia, ku Kepala Menteri Datuk Patinggi Tan Sri Adenan Satem.

“Aku gaga ati meda Yang Berhormat ari Parti Pesaka Bumiputera Bersatu (PBB), United People’s Party (UPP), TERAS enggau Parti Progresif Demokratik Sarawak (SPDP) taja pan belaya pasal politik, tang ulih duduk begulai ngabang ngagai pangan diri.

“Anang enda ingat, taja pan bebida penemu politik, kitai tu semua anak Sarawak dalam menua Malaysia, tu menua kitai, pengelikun dalam jari kitai semua,” ku Adenan.

Iya madah munyi nya lebuh bejaku ba sebengkah pengerami Jom Singgah Raya di Dewan Suarah ditu, ke bela digulu bini iya, Datin Patinggi Datuk Jamilah Anu, Menteri Muda Pemansang Raban Bansa ti mega patron sereta pengatur pengawa nya, Datuk Peter Nansian enggau bini iya, Datin Rosalind, Speaker Kunsil Nengeri Datuk Amar Asfia Awang Nassar enggau bini iya, Datin Amar Fatimah Iskandar, Menteri Muda Pengerai Mensia Mayuh Datuk Dr. Jerip Susil, Kaban Parlimen (MP) Mas Gading Anthony Nogeh, ex-Kaban Parlimen Mas Gading Datuk Tiki Lafe, enggau ketuai raban bansa, pemesai sereta kepala opis perintah.

Hari Raya di menua Sarawak ukai semina ungkup orang Melayu aja, tang Cina, Bidayuh, Iban, Orang Ulu, ku iya.

“Peda kita seharitu, semua pupu bansa bisi datai ditu, enda kira Laut, Bidayuh, China….Tu meh menua Sarawak, taja pan kitai enda sama bansa, pengarap, kitai agi ulih duduk sama, ngirup sama, makai begulai.

“Enda baka di Malaya din, tiap-tiap hari ka belaya, kitai di Sarawak enda bansa nya, pendiau kitai pendiau ke manah. Enti bisi penemu ke enda sebaka, belaya mimit tang anang belaya kelalu lama,” ku iya.

Ba atur pengawa nya mega, Adenan madah, penemuai seduai melaki bini sekali tu nyambut Hari Raya di Bau mega, ketegal ngingatka pendiau asal bini iya.

“Udah tu lagi Jamilah deka meri jaku iya dalam jaku Hakka sereta Bidayuh…..Iya meh indu ari Bau,” ku Adenan enggau jaku tundi iya.

Nangkan nya, Jamilah berasai gaga ati laban bepeluang nemuai ngagai endur iya diau, kala besekula di Bau maya agi dara kelia.

“Sehari tu aku nemuai ngagai endur asal aku empu, aku beratika mayuh endar mua ti dikelala aku, nyengkaum bala pengajar aku ke kala ngajar aku kelia maya besekula di St Stephen.

“Lebuh aku pulai ngagai kampung aku baru, aku gaga endar ati. Indai aku bisi 14 iku diri menyadi di Bau. Perunding kita dia berapa mayuh bala petungal aku di Bau. Tambah mega aku kala besekula di St. Stephen, lalu maya taun 1962, maya Sarawak nyain sempekat kelia, aku sigi udah besekula, lalu maya nya mega aku kala ngasaika jeman Perintah Bekurung.

“Apai aku asal orang Dalat tang baka sehari tu, aku meda bansa China, Dayak, Melayu ari Bau. Tang ba entang kami diri sebilik, enti nyau datai ba anak uchu, aku nyau enda ngelala agi, semina di keingatka aku, nama aku ba ruang bilik kami dikangau enggau nama ‘Mak Lut’, laban aku lumur dua biak ari 8 iku diri menyadi. Aku biasa idup merinsa, biasa hidup tusah,” ku Jamilah.

Sebedau nya, ba jaku Nansian, iya meri terima kasih ngagai San Chin Reality Sdn Bhd ti betuaika Chairman kompeni nya, Lee Nyan Choi ke udah meri bantu ngagai 9 buah genturung pendiau Melayu ke nerima RM50,000, Gerempung Indai Tunggal (RM20,000) sereta gerempung anak mit patu balu (RM30,000).

“Sehari tu kitai meda ‘Anak Indu ari Bau’ pulai ke Bau (Datin Patinggi Dato Jamilah Anu), kitai meri besai terima kasih ngagai iya laban nemuai pulai baru ngagai asal endur iya empu. Maya penatai iya tadi, mayuh endar kaban belayan ngambat iya, lalu sehari tu mega, keterubah iya, Kepala Menteri datai di Bau nyambut pengerami Hari Raya begulai enggau kitai,” ku Nansian.

Ba atur pengawa nya kemari, urung 2,000 iku mensia ngabang Jom Singgah Raya, ke bela digulu peranak ari genturung pendiau Melayu di Bau ditu.-UB