KUCHING: Pengereja pengawa Opis Pengintu Pengelantang Mensia Mayuh (JKM) diatu benung mansik pengerusak ketegal ribut ti balat nyadi di Miri ensanus, sebedau ngenukuka bantu ti patut.
Pekara nya dipadah Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah, kemari.
“Diatu pengereja pengawa JKM benung ngabas sereta bejalaika pansik bekaul enggau enam buah rumah di Sibuti lalu sebuah rumah panjai iya nya Rumah Awing, Sg Semurok, Niah ti betapi enggau pengerusak ketegal ribut apin lama.
“Bepelasarka penerang ari pengereja pengawa JKM di Miri, enam buah rumah enggau sebuah rumah panjai nya semina bisi pengerusak ba atap aja, lalu nadai dipindahka ngagai palan pengenduh sementara.
“Diatu JKM benung mansik pengerusak sereta deka meri bantu nitihka pengerusak, laban semina atap aja ke rusak dipelabaka deka diberi bantu kereban dikena ngaga rumah baka atap,” ku iya.
Fatimah mansutka pekara nya lebuh dikerandau maya Program Bebeli Barang Hari Raya 2015 begulai enggau Rumah Kanak-Kanak Kuching, Batu 12 enggau Rumah Kanak-Kanak Datuk Ajibah Abol, Sri Aman ba sebuah kedai di mengeri Kuching, lemai kemari.
“Taja pia penyampau peranak rumah panjai sereta enam ruang bilik ti kena penusah ribut nya bedau ditemu, lalu deka dipadahka ngagai Bilik Operasyen Penusah Ngenyit Hari Satu minggu baru,” ku iya.
Kelimpah ari nya lebuh ditanya bekaul penyadi tanah berenyang di sebuah Genturung Pendiau Pepatung, Padawan kena Hari Empat tu tadi, iya madahka nadai nerima pemadah bekaul enggau pekara nya.
Nitihka ripot sebengkah penerang, dua buah ruang bilik di Genturung Pendiau Pepatung, Padawan betapi enggau pengerusak baka dinding merekah enggau tile ti tekebak sereta pechah.
“Naka ke diatu kami nadai udah nerima berita bekaul enggau penusah nya,” ku iya seraya madahka deka ngenukuka pengamat sereta bejalaika pansik bekaul enggau pekara nya.-UB
Pengerusak Ketegal Penusah Kabut Di Miri Benung Dipansik
Reviewed by Unknown
on
July 12, 2015
Rating:
Reviewed by Unknown
on
July 12, 2015
Rating:
No comments: