Anang mudah pechayaka penerang ti disadung nengah media sosial

SIBU: Penguna aplikasyen media sosial dilalau anang kelalu pechayaka penerang ti disadung sekeda orang ngena aplikasyen nya.

Kaban Parlimen Kapit Datuk Alexander Nanta Linggi madah,mayuh pekara ti disadung nya petenah ti dikena ngamahka imej perintah.

“Anang kelalu pechayaka utai disadung nya tang pansik dulu laban tebal agi nya petenah ti dikena ngelabuhka pengari rayat ba sesebengkah sitak sereta ngamahka imej perintah,” ku iya.

Iya mega Sapit Menteri Pemansang Menua Pesisir enggau Kandang Menua madah,enti bisi enda puas ati enggau pengawa ngaga sesebengkah projek pemansang, sida tau mantah lalu ngiga chara mutarka nya, ukai betenah sengapa.

Bejaku bejadika Pengerami Mini Konvokesyen Tabika Kemas Parlimen Lanang di ditu ensanus ku iya, petenah nya ukai semina deka ngamahka nama pengari rayat tauka perintah aja tang mega deka diasaika orang bukai.

Seraya meri chunto, iya madahka bisi ulah ti nyadung gambar sebuah tabika Kemas ti semina bisi atap tang nadai dinding di sebuah rumah panjai di Bagi Menua Kapit ngena aplikasyen WhatsApp dikena mandangka perintah enda siru enggau utai ti dikedeka rayat.

“Kebenar rumah sekula tabika nya digaga sechara beripai lalu amat empai tembu endar.

Ulah nya ngasa sereta ngemediska ati peranak rumah panjai laban sida udah bebendar nirika rumah sekula nya,” ku iya.

Nangkanka nya, Nanta lalu nyuaka setipikit nembuka pelajar ba tabika enggau perais penyulut ngagai lebih 200 iku nembiak ari 40 Tabika Kemas Parlimen Lanang. — BP