BN Nengeri disadang ulih menang ngelui ari majoriti mudah ba PRN11

 

LUNDU: Barisan Nasional (BN) Nengeri disadang menang ngelui ari majoriti mudah ba Pengawa Bepilih Besai Nengeri ke-11 (PRN11),”Ku Kepala Menteri Datuk Patinggi Tan Sri Adenan Satem.

Bepelasarka gaya pekara ke diatu, Adenan ke mega Chairman BN Nengeri pechaya sekeda orang ke enda nyukung BN ba pengawa bepilih ke udah disadang ngalih sukung ngagai BN ba PRN11.

“Aku ulih ngasai pekara tu deka nyadi ke alai raban ke enda nyukung BN ngelamatu deka ngalih lalu nyukung kitai,”ku iya ba seiti aum pengarang berita pengudah Ngelanchar Jentera Parti Pesaka Bumiputera Bersatu (PBB) N.3 Tanjung Datu di Dewan Suarah Lundu kemari.

Ba pengerami nya, Adenan ke mega presiden PBB dibantai ngagai urung 1,000 kaban PBB ke nedat Dewan Suarah Lundu nyadi chalun BN di penuduk N.3 Tanjung Datu.

Nyaut tanya pemberita sentang rintai chalun ti deka ngarika BN, Adenan madah iya diatu udah berengkah mantaika nama chalun chara bererenggat.

“Aku diatu udah mantaika sekeda rintai chalun BN lalu nyadang semua rintai nama nya deka dipansut ba pengujung bulan tu,”ku iya.

Ngalihka lemai tu lagi iya nya ba sebengkah pengerami begulai enggau rayat di Kampung Rasau, Seruan.

Adenan deka mantaika nama chalun ungkup penuduk Tebedu, Tarat enggau Kedup.

Pengudah abis mansutka semua rintai nama chalun BN ba semua 82 sitak bepilih, Adenan madah diri deka betemu enggau Tuai Pemegai Menua (TYT) ngambi atur madamka Kaunsil Nengeri (DUN) ulih diadu.

“DUN deka dipadam enda lama agi, udah nya baru Komiti Pengawa Bepilih (SPR) ulih bejalaika tanggungpengawa sida,”ku iya.

Iya mega madah barang sapa chalun ti bediri nguna dachin deka nyadi chalun tim BN nengeri.

Ba pengerami nya mega, Adenan bisi nyuaka menira PBB enggau BN ngagai Direktor Operasyen Jentera PBB N.3 Tanjung Datu ke mega Kaban Parlimen Santubong Dato Sri Wan Junaidi Tuanku Jaafar.

Bela datai bini Adenan Datin Patinggi Dato Jamillah Anu enggau bini Wan Junaidi datin Feona Wan Junaidi enggau orang bukai.-BP