Komuniti Islam Di Sarawak Patut Neruska Pemanah Kaul Enggau Raban Ukai Islam

KUCHING: Sapit Kepala Menteri Datuk Amar Abang Johari Tun Openg ngelalau komuniti Islam di Sarawak patut neruska pemanah kaul sida enggau komuniti ukai Islam.

Kenu ku iya, anang nitihka ‘Fatwa’ sitak menua bukai laban ‘Fatwa’ ditu enda sebaka enggau menua bukai.

Abang Johari ti diberi tanggungpengawa nyaga pekara Islam nengeri tu madahka ‘polarisasi’ komuniti kitai ditu enda sebaka enggau menua bukai.

“Kitai di Sarawak tu mayuh macham pupu bansa sereta pengarap, nya alai enda ibuh bisi menteri ke nyaga pekara bekait enggau Islam ditu, laban aku empu begulai enggau Kepala Menteri Datuk Patinggi Tan Sri Adenan Satem udah chukup nyaga pekara Islam ditu,” ku Abang Johari.

Iya madah munyi nya lebuh bejaku ba atur pengawa meri bantu Kaunsil Islam Sarawak (MIS) ngagai masjid sereta surau Pelilih Menua Kuching di Dewan Kompleks Islam Sarawak ditu, kemari.

Abang Johari mega madahka naka diatu, MIS ninting taun ulih meri bantu ngagai masjid enggau surau di pelilih menua tu laban aset orang Islam, negapka ekonomi orang Islam kelimpah ulih dikena mantu komuniti ke tasah.

Penyampau komuniti Islam di Sarawak ku iya, enda mayuh tang singkang pemungkal, ku iya, naka tu penuduk orang Islam di menua tu tegap.

“Pemesai kitai kenyau ari pegai Tun Pehin Sri Abdul Taib Mahmud suba ngagai Tok Nan diatu, kami dalam perintah deka deka nyambung pengawa tu, lalu enda ibuh meh kitai ketegal ‘fatwa’ ke enda sebaka enggau sitak menua bukai, enda ibuh manjung di pala wong dulu.

“Tang ke berat endar, baka ni ku kitai ulih mantu komuniti Islam? Keterubah, bala anak kitai enda tau enda diberi pelajar dunya enggau ‘akhirat’ (pengudah mati) . Enti pelajar kitai semina ungkup ‘akhirat’ aja, nyangka enda chukup penemu kitai nya laban Islam betatika ngambika kitai lantang nguan dunya enggau ‘akhirat’,” ku iya.

“Laban Sarawak sebuah sitak menua ke nyelai ari orang bukai, nya kebuah kitai enda tau enda majakka kaul kitai ke manah enggau semua komuniti di menua tu enda ngira pengarap tauka bansa.

“Sarawak sebuah menua ke unik, kitai enda kala betapi enggau mayuh macham penanggul bekait enggay bansa enggau pengarap, enda baka di Semenanjung din.

“Nya alai, kaul kitai komuniti Islam di sarawak enggau bansa sereta pengarap bukai, pajakka laban nya udah adat kitai di Sarawak,” ku iya.

Baka komuniti Islam di Singapore ku iya, taja pan mimit tang pangku pengawa nyaga Rampa Menua menua nya sereta Kort Besai dipaduka ungkup orang Islam menua nya.

“Bechuntoka menua Singapore, komuniti Islam di Sarawak enda mayuh tang kitai ngelatih anak Islam ke bekualiti ke ulih diterima komuniti ukai Islam,” ku Abang Johari.

Sama bisi ngulu atur pengawa nya, Menteri Muda Pelajar Tumu Nembiak enggau Pemansang Ruang Bilik Sharifah Hasidah Sayeed Aman Ghazali, ADUN Tupong Fazzrudin Abdul Rahman, Mufti Sarawak Datuk Kipli Yassin enggau Menijar Besai Tabung Baitulmal Datuk Abang Mohd Shiblee Abang Naili.-UB