Pos JPG Bunan Gega Mongkos Agi Beresi Ari Kes Mai Barang Belalai

SERIAN: Pos JPG Bunan Gega Mongkos, Serian meruan dikemata enggau manah lalu nadai sebarang pengawa mai barang chara belalai meraka adan, ku Kepala Polis (CP) Sarawak Datuk Mazlan Mansur.

Ku iya, naka ke diatu nadai ripot diterima sentang pengawa mai barang chara belalai lalu raban polis (PGA) ke ngintu adan menua nya deka seruran bejalaika pengawa matau.

“Naka ke diatu pengawa nguji mai barang chara belalai nguna jalai chit dikemata enggau manah, enti bisi kitai deka neritka adat.

“Diatu chukup manah, kitai mega bisi kerejasama ari Opis Imigresen enggau ketuai kampong (KK) ngambi ulih nyapai juluk nentuka kandang endur kitai enda dipasuk sekeda orang sengapa.

Enti bisi penerang ke disadung ngagai kitai kelebih ba pengawa mai barang chara belalai, kitai ngelaluka penerang nya,’ku iya.

Mazlan mansutka jaku nya ba aum pengarang berita ba penemuai kereja ngagai POS JPG Bunan Gega Mongkos Serian ditu, kemari.

Ba penemuai nya Mazlan bisi nyuaka kuih raya ngagai raban polis (PGA) ke gawa ngintu pengelikun garis adan menua rambau pengerami Hari Raya tu ila.

Ku iya, penemuai tu dikearap ulih mantu sereta meri sukung mural ngagai sida ngambi ulih bejalaika tanggungpengawa ngintu garis adan menua enggau manah.

“Pengawa mai entuka enchuri meraka garis adan menua suah nyadi lalu tu mih pekara ti deka diseliah kitai,”ku iya.

Mazlan mega bisi mendingka penerang ari Ketuai Kompeni ‘A’ Bn11 PGA ASP Micheal Lacius sentang tanggungpengawa POS JPG Bunan Gega.

Bela datai Komander PGA Briged Sarawak SAC Khaw Kok Chin, Sapit CP Dato Abdul Aziz Yusuf enggau pemesai polis bukai.-UB